سبحان الله انا حصل لي حزن مابعدو حزن من كلام عم السر وخفت خوف شديد .. واتمنيت الزمن يرجع بي لي وراء عشان .. ما امد يدي لي حق زول .. قدر ماحنستو وقلت ليهو بديك جزء من القروش وتعفى لي الباقي .. قال لي لالا نهائي بس حقي كامل ..
قنعت منو ومشيت محتار حيرة شديدة ياربي احكي لمنو ؟ مشيت صليت الضهر ودعيت ربنا كتير .. انو مايضلني عن طريق الهداية
ويوفقني في الحكاية دي .. وشغال في حسبي الله ونعم الوكيل ..
وفي كل الفترة دي ما حاسي بوجود الجني نهائي .. ولاوشوشة ولاكلمة .. بعد صلاة الظهر نمت في المسجد .. شفت رؤيا .. انو انا في البحر راكبين في لنش زي الكأنو جايين من توتي .. والمركب اتقلبت.. والناس الفيها واحدين غرقو . واحدين يسبحو . بس مكان القيف بعيد شديد .. بالشرق بعيد وبالغرب بعيد .. وانا شغال اعوم واعوم .. بس لمن قربت للقيف .. جسمي انهار ويدي ماتن .. وغلبني احرك كرعي .. وبقيت غاطس .. ومابيني وبين القيف اكتر من عشرة متر .. وشايف ناس كتيرين فوق القيف .. بتفرجو .. ومافي زول نزل عشان ينقذنا .. بس في واحد شايل سلبة (حبل طويل . بنشلو بيهو من البير) .. جدع لي الحبل وانا ماصدقت قبضت في الحبل وانا في اخر مرحلة في الغرق .. وجروني مرقوني .. وجدعوهو لي زول تاني .. وبقو شغالين في الناس وانا بعاين ..
لمن صحيت من النوم حسيت انو .. دي بشارة من رب العالمين انو ح ينقذني من الدرك والخطر ..
لكن كيف الله اعلم .. المهم وانا محتار حيرة شديدة.. قمت مشيت المنطقة لانو اليوم ده ماكان مشيت مع ابوي .. حصلت ابوي هناك .. ولقيتو خلاص في اخر اليوم وعايز يرجع البيت .. قال لي عارف انت مشيت وين؟ .. قلت ليهو كان عندي مشوار ضروري في الله ..
قال لي ربنا يتقبل .. وهنا جاني احساس قوي اني احكي لابوي لاول مرة ..
لانو قلبي كان شايل تقيل وخلاص تعبت من الحاصل علي ..
قمت حكيت ليهو ..قلت ليهو ابوي انا عايز اتكلم معاك .. ممكن نمشي لينا على حتة تانية غير البيت وعشان نقعد ونحكي بي راحتنا بدون امي ماتقاطعنا؟
قال لي مافي مشكلة يا عارف لكن امك دي الخير والبركة وانا عمري ماقاعد ادس منها حاجة .. كل شي بيناتنا مكشوف حتى لو انت حكيت لي انا لازم اوريها لانها ماقاعدة تدس علي ..
انا من راي نمشي نحكي قدامها لاننا نحن التلاتة حاجة واحدة .. قلت ليهو خير البتقول عليهو تحت امرك ..
ومشينا البيت واتغدينا .. وابوي قال لي امي نحن ماشين بيغادي .. تعالي لينا عندنا موضوع ضروري ..
المهم جو قعدو لي الاتنين .. وانا لمن شفت امي وابوي الاتنين قاعدين مقابلني .. ومنتبهين وعايزين يشوفوني انا عايز اقول شنو؟
قلت ليهم انتو عارفين انا انسجنت سنتين في السجن عشان شنو؟
ابوي قال لي انا عارفك .. اشتريت بيت .. بي شيك .. وماعارفك وديت قروشو وين .. لمن جات مواعيد الشيك قفلوك ..
الضابط الجا هنا حكى لينا الحاصل ..
قلت ليهو طيب انا احكي ليك.. الضابط ده هو ولد الراجل الاشتريت منو البيت . المهم حكيت ليهو الحصل بالتفاصيل المملة ..
وانو مشيت مصر بي تلتين المبلغ .. وحصل لي حادث هناك .. وفقدت القروش .. بس ماحكيت ليهم حكاية الجني والامور دي ..
ابوي قال لي ده كلو حصل عليك وما تكلمنا بيهو .. والله طلعت زول غتيت ياعارف .. قلت ليهو كنت ضال واهبل .. المهم يابوي هسي انا حسيت اني ظلمت الراجل ده .. وعايز ارجع ليهو حقوقو .. اها مشيت ليهو الليلة وقلت ليهو كيت كيت .. وقال لي كيت كيت ..ورفض يامحني؟
ابوي قال لي ياتو حقوق ياخوي العليك ؟ قلت ليهو باقي قروشو.. قال لي انت . موش سددت كل القروش وعلى ضوها طلعوك من السجن؟ يعفا ليك شنو تاني؟ قلت ليهو بس يا ابوي .. انا دفعت ليهو القروش بعد سنتين .. والقروش بتكون نقصت .. قال لي لكن في حاجة فايتة عليك .. انت ماعارف انو اي زول يبيع ليك حاجة بي شيك بديك ليها زايدة من سعرها الحقيقي؟؟
قلت ليهو ايوة صاح.. والله دي اصلا ما انتبهت لي الحتة دي .. سبحان الله .. يعني اصلا البيت زايد من سعره الحقيقي .. فعلا" والله .. طيب صح لكن بس برضو ماممكن يكون البيت زايد ستين مليون؟؟ .. قال لي طيب الزول ده سجنك.. هل السجن ده ماعندو تمن؟ المهم ياعارف .. تصرفك ده ماصحيح .. وانا ماحاسي انو الراجل ده عفوهو ممكن يقدم او يأخر شي ..
قلت ليهو حتى لو كلام صح يا ابوي بس انا ما مرتاح نفسيا" وحاسي بي ضيق ماطبيعي ..
قال لي ولايهمك انا باكر بمشي معاك ليهو .. واصل معاهو لي حل ..موش عشان عشان هو عندو حقوق .. بس عشان انت ترتاح ..
اها باكر ونحن ماشين على عم السر ابوي قال لي انا البتكلم معاهو انت اصلا" ماتتكلم .. قلت ليهو حاضر ياابوي ..
والله ابوي وصل الراجل وقال ليهو جنس كلام ..سبحان الله اول مرة اعرف ابوي زول منطق بالطريقة دي ..
بعد السلام والتحية .. الراجل لمن شاف معاي ابوي صلح قعدتو طبعا" ابوي زول هيبة ولبيس تقول معتمد محلية .. قال ليهو طبعا" انا ابوهو لعارف .. طبعا ياحاج عارف ده اليومين ديل عندو زيادة في الايمانيات .. عشان كدا حاسي بانو ح يموت في اي لحظة ..
وشغال في الناس اعفو لي اعفو لي .. وانا يتخيل لي دي فترة مؤقتة وح يرجع زي ماكان .. المهم طبعا الزول ده قال حاسي انو ظالمك .. وانا وضحت ليهو مافي ظلم ..وقلت ليه انت اتسجنت سنتين .. وطلعت دفعت المبلغ العليك كلو .. ولو ماكدا ماكان القانون طلعك من السجن . هو بتكلم عن نقصان القروش في فترة السنتين .. لكن كل الناس قالو ليهو اي زول ببيع بي شيك بكون زايد السعر .. انا عايزك ياحاج تقول لي الحقيقة .. عشان هو يسمعك .. انت البيت ده بعتو ليهو بي سعرو الحقيقي؟ .. ولا زايد من سعرو؟ .. ودي حاجة بسألك منها ربنا..
عمك السر بلع ريقو وصلح نضاراتو ولقى نفسو في موقف لايحسد عليه .. قال ليهو فعلا كان سعرو اكتر من الشي الجابو في السوق .. لكن طبعا ما قدر زيادة الستين .. قال ليهو اسمع ياحاج انا عارفك لاقانونا" ولاشرعا" ماعندك حاجة عند ولدي .. ونحن مامسؤولين من زيادة الاسعار .. ولافي زول بعلم الغيب .. انا جيتك هسي عشان حاجة واحدة انا الولد في حالة بتاعة تجلي ..انا ماعايزك تبقى سبب في رجوعو لطريق الغلط .. بعد ما بقى كويس ورجع .. اديهو كلمة العفو الخالص .. قال ليهو خلاص انتو لازم تدوني جزء من الخسارة .. ابوي قال ليهو مافي خسارة ولا شي .. انا طبعا" نطيت قلت ليهو انا بديك عشرين مليون .. ابوي قال لي عارف ممكن تسكت ؟
بس عمك السر مسك في العشرين مليون .قال لي خلاص جيب العشرين مليون وانا عافي ليك لوجه الله .. ابوي سكت ساي وعاين لي كدا بي صرة ..في البداية ماكان رضيان من تدخلي ..مارضيان نهائي .. بس لمن طلعنا .. وماشين نجيب ليهو القروش .. ابوي شافني انا فرحان ومرتاح ومبسوط .. قال لي يازول العشرين مليون اصلا مشكوك فيها ..اديها ليهو وريح ضميرك .. ربنا يعوضك .. قلت ليهو يا ابوي انا أصلا ما ح ادخلها علي ..
المهم يازول انا رجعت البيت في نفس اليوم شلت القروش وديتها ليهو .. قال لي كدا انا راضي .. وربنا يوفقك وامشي في طريقك ماترجع للحرام .. قلت ليهو بي قلبي لا احسن ماترضى.. والله غايتو عمك ده صعب صعوبية .. لكن البركة في ابوي القعدو ليك في علبو .. رجعت بالمساء واتصلت على انور .. وسألته من الاخت مودة .. قال لي والله لي يومين مالاقيتها .. لكن بكرة عندي معاها مواعيد في السوق العربي .. عندها اوراق عايزة تطلعها .. المفروض امشي معاها .. قلت ليهو ياخي الزولة انا عايزها .. قلت ليهو خلاص باكر نتلاقى انا بوريك عايزها في شنو بس انت ماتكلمها اني جاي ..
طبعا طيلة الفترة دي انور مالاقاني من يومو الجابني من المطار ..
اتلاقينا الصباح .. قال لي ياعارف انت اتغيرت شديد .. وطريقة كلامك اختلفت .. قلت ليهو الحمد لله انا مسكت طريق ربنا خلاص وخليت الهلس والصياعة الماعندها طعم .. ولاقينا مودة لمن شافتني اتفاجأت مفاجأة عجيبة .. وقالت هي عان عارف!!! انت ميت ولاحي يا هناي ؟ انا كنت قايلاك موتا في السجن .. قلت ليها والله حي والحمد لله .. مودة انتي بتتذكري اخر يوم وانتي زعلانة مني قلتي لي انا ماعافية ليك وقلتي لي لو ربنا ما انتقم منك انا بنتقم منك
والله انا ربنا انتقم مني وحصل لي حادث في مصر وفقدت كل ما املك والان انا على الحديدة .. وجيت طالب منك العفو والسماح
قالت لي مالك بقيت مسكين كدا؟؟ انا اساسا الموضوع ده نسيتو وانور نساني رجال الدنيا كلهم .. ونحن هسي بنجهز في حاجاتنا .. ماكلمك؟ قلت ليها مبروك والله يعني صافية لبن .. قالت لي والله عافية ليك انا اصلاا مابعرف اشيل في قلبي .. ياها الزعلة ديك وانتهينا .. قلت ليها تسلمي يازوجة اخوي .. ربنا يبارك فيك .. قالت لي لالا انت بقيت مولانا عديل .. المهم انا انتهيت من المهمة وصفيت كل الحسابات اي نعم رجعت صفر زي الاول لكن استفدت تجربة تتكتب .. بس صراحة جواي احساس بي حاجة غريبة .. خوف كدا ماعندو سبب .. وتردد شديد .. شوف انا هسي اترددت في اني اجي هنا كتير خلاص .. وعندي وسوسة ما منطقية
واوضح ليك اكتر ..عندي تشكيك في المسلمات حتى في العقيدة .. حتى في القران .. انا بكون بقرا في القران وشاكي فيهو ..لكن ماشغال بالموضوع .. وقلت يمكن وسوسة شيطانية .. بس ماصوت الجني البسمعو داك .. يعني وسوسه زي الوسوسة العادية البتجي لاي زول .. غايتو هسي اتغلبت وجيت .. وانا مستعد لاي اجراءات علاج بس انا يتخيلي ابراصوم ده طار ومافي .. ودي حاجات طبيعية ..
قلت ليهو ده كلام برضو؟ ابراصوم قاعد ياعارف .. ومابقدر يخدعني بالخنسة والاختفاء .. وانا مابسيبو .. بس في حاجتني محيرني في قصتك ممكن توضح لي بالنسبة للحاجات الحصلت في مصر ..
انت قلت مشيت النادي وقعدت في طاولة القمار .. في زول بقعد في القمار بدون مايكون عندو قروش ؟؟ انت قلت كنت مفلس ..
قال لالا كان عندي قروش بسيطة مافايتة ليها سبعين جنيه مصري
حتى في الاول استهترو بي لكن القانون بسمح لي باللعب واكلتهم كلهم بالقروش البسيطة دي ..
قلت ليهو طيب .. انت قلت الجني قال ليك اكتب حسابك بي اسم زول
كيف القصة دي مافهمتها ..
قال لي طبعا" في مصر ماممكن تفتح حساب في البنك الا تطلع اقامة من وزارة الداخلية .. انا كان طلعت اقامة تلاتة شهور .. وفتحت حساب باسمي .. اها في اليوم الانت بتتكلم عنو ده ..الجني اداني اسم الزول بالكامل ..وكان عندو حساب في نفس البنك.. بس حولت ليهو المبلغ في اسمو موضوع عادي ..
قلت ليهو خير يا عارف انا ح ابدا معاك بكرة ان شاء الله واعمل ليك جلسة كشفية ..استكشاف بايات الله والرقية. عشان اشوف هل الجني ده فعلا غادر ولا موجود .. تعال لي بكرة مهما حصل ليك من العوارض والعراقيل لازم بكرة تجيني .. واديني تلفونك عشان اتابع معاك ..
قال لي جدا بس انا هسي من كلامك ده جاتني خوفة ماطبيعية .. لكن ابشر ان شاء الله بكرة معاك باذن الله من الصباح ..
.. الى اللقاء
أنت تقرأ
العسل المسموم ... طارق اللبيب
Poetryارجو ان قد تنال رضاءكم .. انما ننشد الفائدة ممانكتب .. ولانعشق ضياع .. الوقت بين الحروف .. والمحبة العندي ليكم .. مابتقل في يوم وتمسخ.. كل يوم رافع مقامكم .. واحترامكم عندي يرسخ.. ياحلاة زول مني يقرا .. ويطرا ناس تانين وينسخ..
