طبعا" انا فرحت شديد بحكاية اني انا ح اكون رجل اعمال دي .. لكن ما اسافر السودان دي كيف دي؟ .. قلت ليهو يا ابراصوم السودان ده اهلي ؟؟ .. قال لي انت من هسي عاوز تعاكسني؟؟ وعمل صوت انين كدا غريب .. اممممم زي صوت بداية صفارة النجدة .. فجأة جاني ليك وجع في رجلي الشمال.. لمن قعدت اكورك وادردق في الارض .. كأنه في زول غرس ليهو سكين في فخذي الشمال .. والصوت وقف قريب الربع ساعة .. وعاود يتكلم .. قال لي دي قرصة اضان صغيرة .. فاهم؟.. قلت ليهو جدا .. تاني مابخالف والله مابخالف ..
قال لي يلا انا ماشي يوم الاحد بجيك راجع عندنا شغل كبير شد حيلك .. واتلاشى الصوت ..
اخر ظهور ظهر لي كصورة في النادي .. تاني بس بقى يجيني عبارة عن صوت.. في اضاني .. زي صوت التلفون .. لكن بس واضح اي كلمة براها .. وماحصل يوم اتكلم .. وما سمعتو كويس .. واضح جدا .. لدرجة اني مرات بتخيل لي.. الناس بسمعو معاي ..
الحقيقة انا بقيت خايف.. وما مطمئن بالرغم من فرحي بالقروش .. خايف فعلا ..بس متبلد في اللحظة دي والقروش عامياني .. واليوم داك شلت قروش.. ومشيت سهرت.. ولفيت على اماكن الصياعة وماخليت حاجة .. اسال الله العفو والعافية ..
وشتريت لي ملابس غالية جدا .. وجزم واي حاجة تعجبني في السوق بشتريها .. وبرضو خايف من الجني ده.. وحاسي انو ح يتحكم في حياتي.. ويمشيني زي ماداير .. وفعلا ده الحصل بالضبط .. انا والله ماقادر اوصف ليك احساسي في الوكت داك.. يعني فعلا حاسي باني انحدرت لاسوء مستنقع .. ولسع ماشي منحدر .. لكن عامل عادي .. ومستمتع بي حياتي.. وحاسي باني حتى لو موتا.. في اي لحظة.. زي ما انا حاسي باحساس الموت حايم حولي .. في اي لحظة .. برضو مقوي راسي ومقوي قلبي .. ماعارف الحاصل علي بالضبط شنو ؟؟..
المهم يوم الاحد بدا الصوت في اضاني بي وشوشة .. وقال لي اتحرك من هنا.. امشي المكان الفلاني.. في معرض بتاع تأجير سيارات .. استاجر عربية جديدة .. بي سواقها لمدة اسبوع .. وتمشي زي ما انا بوصف ليك .. قلت ليهو طيب وريني الفهم .. قال لي تمشي الشارع الفلاني .. في المكان الفلاني .. المكتب التجاني رقم كدا .. تلقى في جماعة قاعدين عندهم اجتماع في بيعة ضخمة بتاعة وسكي .. وهم عاوزين كاش .. وفيها ربح كبير تشتري الكوتة كلها.. وفي مكانها في زول بجي يشتريها منك .. وبتشوف الارباح بي عينك .. ارح انا معاك الليلة ..
قلت ليهو طيب ياخي كدا المواضيع كلها حرام في حرام .. والله انا اتضايقت.. قال لي انت ذاتك بقيت حرام .. تاني مافي اي حلال.. ارح .. قلت ليهو ارح اصلها بايظة بايظة ..
ومشيت نفذت المهمة .. واشتريت الوسكي بالكراتين .. اظن قريب الاربعمية كرتونة .. بي مبالغ ضخمة ..وقبل ما ارحل الويسكي من مكانه جو ناس شركة واشتروهو مني .. والربح كان شي لايتصور .. وكلو بي املاءات من ابراصوم .. ولاعاصوم ولازفت ده ..
بعد رجعت والقروش كلها نزلت في حسابي .. قال لي اطلع من الشقة دي.. امشي اجر ليك جناح في فندق كدا فندق كبير ومشهور ..
وعيش حياتك .. وطبعا" انت عارف الفنادق هناك والحريات الفي مصر .. مشيت اجرت جناح بي مبالغ ماتتصورها .. واتغمست في المعاصي .. مافي داعي اقول ليك قدر شنو .. وانا شهر كامل بالطريقة دي .. كل يوم احد واربعاء بمشي بعمل عملية تجارية .. في حاجة .. والحاجة لازم يكون فيها ضرر.. او حرام ..
وخلاص القروش مسخت علي.. وبقيت متضايق من حياتي .. وببكي الليل والنهار.. والبنات المعاي في الجناح اتنين من اجمل ماشفت في حياتي .. كل مرة بسألوني يقولو لي ياسوداني .. نحن ماحصل شفنا حد عندو فلوس زيك .. وكمان كريم وابن حلال .. ازاي انت متضايق بالطريقة دي؟؟ ..
وفعلا انا زهجان بي طريقة اصلك ماتتخيلها ..واحساس الموت مطاردني .. والله فكرت انتحر مرتين .. صدري ضايق .. كانو الاكسجين ده في الدنيا معدوم ..من الحالة الحاصلة علي . وحاسي بي غضب رب العالمين حولي.. ومتوقع الانتقام الرباني القالو لي انور ..في اي لحظة يقع علي .. ياخي انا ماخليت شي من ماتاجرت فيهو .. السموم والمخدرات .. والخمر والفواحش بانوعها . اعوذ بالله اعوذ بالله .. ياربي ياربي .. والله ماعارف انا استغفر بي ياتو وش ..واقول لي ربنا شنو؟؟
اها يوم وسوس لي.. قال لي الليلة عندنا شغل فظيع .. قلت ليهو شنو هو؟ .. قال لي في بنات واطفال في المنطقة الفلانية .. عايزين يمشو الاسكندرية عايزك انت تتولى الترحيل وتأجر بص سياحي جديد وتتولى المهمة كلها .. وانا بوريك الترتيب .. هم ماشين لي مواضيع مختلفة ..وحكاها لي كلها رزايل .. ومواعدات ..وليالي حمراء .. وتجارة في البشر .. وشي اغتصاب.. ووو ..
والمشكلة الماقدرت اوافق بيها .. قال لي في خمسة اطفال مع البنات .. ماشين لاحتفال .. وانا المفروض اختطفهم واغير اتجاه البص .. اسوقهم اوديهم لي عصابة بتاعة تجارة وبيع اعضاء بشرية .. انا هنا مخي طار من مكانه ..وقعدت اهيج واضرب في الحيطة .. وقلت ليهو مستحيل مستحيل ..
و رفضت .. وقلت ليهو .. اقتلني .. اقتلني .. مابمشي .. وانا ماشي السودان وماعايز قروشكم .. العايز تعملو اعملو .. قال لي جدا..اصبر بس .. وسكت مني وغاب ..وانا بقيت حايف خوف ماطبيعي ..
اها بالليل حسيت بانو في زول كتم نفسي بي كيس .. وبقيت ارفس واصرح .. وخلاص قربت روحي تطلع .. قام فكاني في اخر لحظة .. والله مشيت للموت وجيت .. وقال لي ده تحذير .. تاني اوعك تخالفني فاهم؟؟ كلب وسخ.. والله انا من الخوف مانت للصباح ..
اها يازول بكرة كان اليوم يوم احد ..طوالي ركبت مشيت للشيخ الروحاني في المعادي .. عشان يفكني من البلوة دي ..
لمن وصلت المعادي ..لقيت ليك الصيوانات.. والدنيا دي.. الاعمى شايل المكسر ..ومركبين الساونات ..وفي واحد بقرا في القران زي عبدالباسط عبدالصمد .. قلت ليهم ان شاء الله خير .. قالو لي مولانا الروحاني اتوفى امبارح بالليل .. بعد جاء هنا .. اتخيل سبب الوفاة شنو ؟.. قالو لقوه ميت في زول كاتم ليهو نفسو بي كيس .. والكيس ملبس في راسو وشو للصباح وهو ميت .. والحكومة بتحقق في الجريمة ..
والله زي مابحكي ليك.. والله على ما اقول شهيد .. طوالي ابراصوم بدا يتكلم معاي في اضاني .. قال لي طبعا ياعارف امبارح ده ..كان يوم الاكياس العالمي .. اي واحد يخالف الاوامر .. بنفرط روحو بي كيس .. بس مولانا بتاعك ده .. ماقتلتوش انا ..
ده واحد من الباشوات الكبار بتوعنا .. يلا يابني خلصني.. وامشي معاي عدل .. انا ملاحظ انو مرة بتكلم مصري .. ومرة بتكلم بي نفس لغتي سوداني .. قلت ليهو انا ماشي السودان.. كان قتلتني كان خليتني .. قال لي وفلوسك؟؟ ..
قلت ليهو ماعايز فلوس.. انا ماشي بيتنا .. وقعدت ابكي زي الشافع ..عشان يخليني في حالي .. والله لقيت لي عمارة في اخر شارع في المعادي.. قعدت في ضلها .. واتمددت في الارض ..وبقيت ابكي زي الزول الميت ليهو زول ..واقول ليهو عليك الله تمشي مني .. عليك الله انا خلاص عايز ابعد من الحاجات دي.. انا ماقادر اعيش زي الناس ..
وهو يضحك في اضاني ..ويقول لي .. دخول الحمام مازي الطلوع منه .. انت خلاص بقيت حقنا احنا .. وقال لي انت شفت حاجة .. نحن عندنا العملية الاخيرة .. اللي ممكن تخوفك بجد .. في السودان موش هنا ..
بس لمن نخلص من هنا .. قلت ليهو خلاص هنا نسيبها ..نمشي ننفذ عملية السودان ..الاخيرة ... وبعدها تمشي مني .. قال لي اتفقنا .. بس فلس ماعندكش ومن هنا موش ح تشيل فلوس موافق؟ .. قلت ليهو موافق موش عاوز فلوس ..
قال لي طلع شيك.. واكتب فيهو كل حسابك بي اسم فلان الفلاني اداني اسم تلاتي كدا ..عزت مين كدا الرشيدي .. المهم انا كتبت كل ما املك من المال باسم البشر اللانا مابعرفو ..ومشيت حجزت ودفعت فروقات التاخير بتاعة التذكرة .. بي باقي قريشات شايلا معاي ..
ويوم الاتنين مسافر السودان .. عشان اعمل العملية الاخيرة في الشعب المسكين ده .. وانا لغاية لحظة السفر ماعارف العملية الح اقوم بيها هي شنو .. يومي المسافر منعني اشيل الهدوم الانا اشتريتها سافرت بي غيار واحد بس .. وخليت كل حاجاتي وشنطي في الفندق تصدق والقريشات الفي جيبي خلصن قبل اركب الطايرة .. ؟؟ صدق او لاتصدق ..
اها يوم السفر وانا في المطار حصلت حاجة.. وانا خلاص في صالة المغادرة جو اتنين وقفو لي كدا لابسين رسمي قالو انت عارف محمد الحسن صح؟ قلت ليهم نعم .. قالو لي معاك المخابرات المصرية .. انت رهن الاعتقال .. اياك والمقاومه يديك على راسك وابرك ع الارض .. قلت ليهم بي تهمة شنو؟ قالو لي
في المركز هتعرف كل حاجة .. وابراصوم يضحك في اضاني .. قال لي خفت ؟؟ دقيقة انا بخارجك من الحيوانات ديل ..
بس من هناك جاء ضابط رتبة كبيرة .. قال ليهم سيبوهو يعدي ..
دي تعليمات عليا .. فكوني ركبت الطيارة.. وانا قلبي مقلوع من مكانه والله .. قام في الطيارة ابراصوم قال لي انت عارف الضابط الجاهم ده؟؟ .. داخل في غيبوبة وبتكلم من غير وعي .. ومش راح يوعي الا طيارتك تحط في مطار الخرطوم .. انت فعلا جرايمك كبيرة وكان ممكن تتعدم .. بس انا ما خلصت منك ..
وهاهاهاه يضحك .. والله دي مشكلة دي .. ياربي تفكني من البلوة دي .. والله يادوب انا عرفت الله جد جد ..
المهم يازول جيت السودان وانا مرهق وتعبان ونفسيات في الارض ومفلس قرش ماعندي .. طلعت تلفوني المقفول ليهو كم يوم وداير اتصل على ناس البيت قال لي لالالا .. اتصل على انور .. قلت ليهو انت بتعرف انور من وين؟ قال انت اهبل ياولا ولا ايه؟
اتصلت على انور .. انور رد لي.. اول كلام قالو لي .. بعد حمدلا على السلامة ..قال لي والله يا عارف معليش مالقيت اي زول يدينك قرش لانو سمعتك بقت على لسان اي زول بعرفك سمعة مانضيفة .. قلت ليهو خليهو الكلام ده هسي .. تعال لي انا في المطار وماعندي حق البوصلني بيتنا .. قال لي هسي بجيك .. والله انور جاني بي تاكسي ..انا طبعا عندي قروش في البنك هنا ..
لكن حاسي بينفسي عندي ملاريا .. وبطني طامة وقرفان من حياة الدنيا والله شعري ده عشرة يوم ماسرحتو ووخمسة يوم ما استحميت .. عارف ليه؟ .. بمنعني بقول لي ماتستحمى ..ماتتعطر ما تسرح شعرك .. وبتحكم حتى في لبسي البلبسو .. وبتكلم معاي وانا في الحمام ..
ياخي انا حاصلة علي حالة والله احسن منها الحكم بالاعدام .. والوسوسة بتاعتو بقت يوميا .. في مصر وفي الطيارة وفي المطار
اها يازول انور جاني .. وشاف حالتي والله قرب يبكي .. اي زول يشوفني مابشك لحظة انو انا مجنون .. قلت ليهو يلا يا انور نمشي البيت.. انا ماشي بيتنا.. انا تعبان وحاسي اني بموت .. خليني اموت في بيتنا ..
قال لي وين عفشك ياعارف ؟ قلت ليهو ماعندي عفش.. ارح عليك الله يا انور .. ركبنا التاكسي ماشين على البيت.. والملعون في اضاني ماسكت ولا لحظة .. ومبسوط يغني في اغنية تعلق قلبي . بفتى عربيةِ .. بعد شوية يقلب يقول.. يا ام العروس جينا ليك.. جبنا العريس وجينا نباركو ليك ..
وانا مافاضل لي الا اعملا في هدومي من الخوف والتعب والارهاق النفسي والجسماني ..
الى اللقاء ..
أنت تقرأ
العسل المسموم ... طارق اللبيب
Poetryارجو ان قد تنال رضاءكم .. انما ننشد الفائدة ممانكتب .. ولانعشق ضياع .. الوقت بين الحروف .. والمحبة العندي ليكم .. مابتقل في يوم وتمسخ.. كل يوم رافع مقامكم .. واحترامكم عندي يرسخ.. ياحلاة زول مني يقرا .. ويطرا ناس تانين وينسخ..
