العسل المسموم ... طارق اللبيب

18

بعد ما خلص عارف محمد الحسن .. حكايتو وانا كنت مستمع ليها بكل انتباه .. بغض النظر عن صدقو في كل ماقال او لا .. المهم انا اتعاملت مع القصة بي جدية .. وما حسستو اني متحفظ على كلمة من كلامو .. وطبعا من العلامات الظاهرة امامي ومن مجريات الحديث .. ان الجني متلبس في جسد عارف وليس خارجه .. فالبتاكيد محتاج لي علاج بايات الله وكتابه العظيم .. بس في اجراءات قبل العلاج لابد منها ..حتى يكون العلاج ناجح
قلت ليهو طيب ياعارف ..زي ما نا استمعت ليك للنهاية ..استمع لي كويس .. واجمل حاجة في الدنيا .. انو الانسان يحسن الاستماع كما يحسن الكلام .. والمقاطعة في اثناء الحديث.. تشتت حديث المتحدث.. وتقطع انتباه المستمع .. ويكفي انها اسمها المقاطعة ..
اول حاجة ياعارف مشكلتك الاساسية .. قبل انك تكون طماع .. وعندك امال اكبر من مقدراتك .. اكبر مشكلة ضيعتك .. انك انت انسان مفرط في الصلاة .. وانت عارف الصلاة دي هي عصمة المؤمن وعنوان الفلاح .. ماسمعت انو الرسول عليه الصلاة والسلام قال من صلى الفجر فهو في ذمة الله حتى يمسي .. يعني صلاتك هي الكان ممكن توقفك من طريق الحرام ..وتبعدك من سكتك الخطر .. لكن بم انك انت مفرط في صلاتك.. بقى ماعندك اي حماية ضد المخاطر .. وبقيت كاشف لاي لعب وعداوات .. عشان كدا الشيطان استدرجك للحرام وفي النهاية بقيت لعبة في يدو ..
بعدين ياعارف مسألة الارزاق دي مسألة محسومة .. فالانسان لمن ربنا كونه جنين في بطن امه ..كتب ليهو رزقه واجله وشقي او سعيد .. يعني لو عملت ماعملت.. ماحتقدر تجيب رزق اكتر من الكتبو ليك رب العالمين .. نحن مأمورين بالسعي.. ولن يأتينا الا ماقسم لنا .. فمافي داعي للمخاطرة والدخول في لعنة حقوق الاخرين .. والمثل بقول لو صبركاسب الحرام .. لنال كسبه حلالا" .. ولو صبر القاتل لمات المقتول .. وانا قلت قبل كدا ..
ايه الداعي تدخل في ديون وتخاطر؟ ..
ايه الداعي تكتب شيك وفيهو مخاطر؟ ..
مادام انت عايش ومستقر الخاطر ..
ارضابو الحلال .. اووووعه الطمع ياشاطر ..
ــ والحمد لله ربنا اثبت ليك.. انو مال الحرام جواهو لعنة .. مهما استمتعت بيهو في النهاية بيهلكك .. زي العسل المسموم بالضبط .. انت تلعق فيهو ومستمتع حلاوتو .. وبعد شوية السم يسري فيك ويهلكك ..فمال الحرام .يدخل عليك بالساحق والماحق .. ويدمر حياتك .. وده موضوع انت براك الحمد لله جربتو.. وبقت ليك دروس في حياتك .. حق الناس محقة في الصحة والمال والذرية ياعارف..
وانا برضو زمان قلت ..
حق الناس ملاعن وللعمر مححاق ..
يحوطك بالبلا ويصل الحفيد لححاق..
اكان كسبك قليل فوق التعب ماحاق..
حذاراك من تسلفق .. فالحرام سححاق..
ياعارف المشكلة الان مافي الشيطان المتحكم في حياتك .. ده موضوع مقدور عليه باذن الله .. المشكلة في الظلم الواقع على الناس منك .. وانت عارف دعوة المظلوم .. هي سبب كل البلاوي والمحن .. وربنا سبحانه وتعالي .. اقسم ان ياخد للمظلوم حقه من الظالم ..
شوف الظلم والحرام بقى متابعك باللعنة لغاية ما مرقك من الاسلام وكفرك وخلاك من عبيد الشيطان ..
انا لايمكن ابتدي معاك اي برنامج مالم تتخلص من الرجس والنجس والكفر والمظالم وتبقى انسان نضيف .. لانو كدا بي طريقتك الحالية ما ح ينجح معاك العلاج بالقران العظيم .. ربنا عز وجل قال .. (وننزل من القران ماهو شفاء ورحمة للمؤمنين ولايزيد الظالمين الا خسارا")
استمع لي كويس .. قبل كل شي امشي خش الحمام بتاعي ده .. اغتسل واطلع اتشهد لانك انت الان على غير الملة .. وصلي ركعتين لله بنية التوبة والانابة والرجوع الى الله .. والصلوات الفاتتك ماعليك قضاء .. ابدأ من الليلة جديد .. لان التوبة تجب ماقبلها ..
واعمل العملية دي قدامي هنا .. عشان اشوف الشيطان الملعون ده بقدر يعمل ليك حاجة ؟ امشي نفذ وتعال اوريك تاني تعمل شنو؟؟..
ـــــ
بصراحة انا شايف "عارف" كان خايف خوف شديد من خطوة انو يغتسل ويتطهر ويعلن التوبة ويصلي لله .. وانا ماكنت عارف سبب الخوف شنو.. احتمال خوف من الجان .. واحتمال خوف من الله ..
فانا حاولت اطمنو من الجيهتين.. قلت ليهو اتاكد ياعارف.انو ربنا بفرح بيتوبتك ..
وينزل عليك الرضاء والقبول والحماية .. قلت ليهو في الحديث عن الرسول صلى الله عليه وسلم . قال . لله أشد فرحا بتوبة عبده حين يتوب إليه من أحدكم كان على راحلته بأرض فلاة.. فانفلتت منه.. وعليها طعامه وشرابه.. فأيس منها ..فأتى شجرة ..فاضطجع في ظلها.. قد أيس من راحلته ..فبينا هو كذلك ..إذا هو بها قائمة عنده.. فأخذ بخطامها ..ثم قال ..ــ من شدة الفرح ــ : اللهم أنت عبدي وأنا ربك.. أخطأ من شدة الفرح" رواه مسلم..
بعدين اتاكد ياعارف .انت بمجرد ماتقوم بالعملية دي.. ح تكون دخلت في حصن الله وحماية الله ..وتاني الشيطان بكون عاجز عن اذيتك .. موش لاقتك الاية البتقول .. (ان عبادي ليس لك عليهم سلطان الا من اتبعك من الغاوين) . ؟؟ ..
المهم شوية عارف اطمن بي الكلام وقام اغتسل .ووجاء اتشهد ودعاء واستغفر الله وتاب .. وصلى ركعتين .. وكل توقعاتنا بانو الشيطان ممكن يأذيهو .. فشلت وكان طبيعي مية في المية ..
قلت ليهو الان انت ما تطمئن وتعتقد انك خلاص اتغلبت عليهو .. في حاجات لازم تقوم بيها عشان نبدا العلاج الجذري..وتتعالج وتبدأ حياة جديدة ونزيهة ..
غايتو ياعارف ربنا كتير فتح ليك فرص عشان يردك من الحرام لكن انت كنت فاقد العصمة والطمع عامي عيونك ..
تتذكر لمن امك قالت ليك ماتمشي لي مشوارك ده انا حاسة بي انك في خطر .. والرؤيا الشافتها امك .. ما حاولت تأخد خط رجعة من سكتك .. ليه؟؟؟
وتتذكر لمن مشيت لبيت ناس عصمت كيف ابوهو قابلك .. وحسسك بانو عصمت وراهو مشكلة؟ انت ما اخدت خط رجعة .. تتذكر في الدكان لمن قالو لي عصمت احكي ليهو الشغل عشان مايعمل ليك مشكلة .؟؟ انت في الوكت ده ماشغلت مخك عشان تتأكد انت عايز تعمل شنو بالضبط ..
تتذكر لمن احمد ود خالة محمد كنجاك .. الشغال في معاهو في دكان كنجاك قال ليك انا عايز انصحك وابعدك من طريق عصمت .. وانت طوالي شكيت في نواياهو ورفضت نصيحته ؟ اليوم داك اتجلت لك رحمة الله في الانقاذ؟؟ لكن انت بي ظنك السيء ..في الانسان العايز ينصحك عماك عن الحقيقة .. ودي كان اخر بوابة ليك بين حياة الحلال والحرام ..
بعدين ياعارف مسألة انك تدخل السجن ويكون في ذمتك قروش ناس .. عشان تاكلها وبعدين تعمل معاهم تسوية ينقصو ليك .. (دي من اجبن وابخس طرق اكل اموال الناس بالباطل ) .. لانه الانسان المسكين الاتنازل عن حقو وعمل معاك تسوية ماكان راضي .. وانما كان مضطر عشان مايفقد كل المال .. زي ماقلت بقول (تلتو ولاكتلتو) .. فكونو يكون بغير رضا . معناها حقو بكون حرام عليك .. لان الرسول عليه الصلاة والسلام قال (لايحل مال امرئ مسلم بغير طيب نفس) .. أخرجه البيهقي ..
وفي حديث ابن عباس: أن رسول الله صلى الله عليه وسلم خطب الناس في حجة الوداع – فذكر الحديث، وفيه: لا يحل لامرئ من مال أخيه إلا ما أعطاه من طيب نفس، ولا تظلموا... ",
فكل الناس العملت معاهم تسوية .. يا اما تمشي تراضيهم ويعفو عنك بقلب صافي وطيب .. واما ترجع ليهم حقوقهم .. وديل طبعا" على حسب حكايتك نفرين .. واحد منهم فتح الرحمن الاشتريتو من الجنريتر .. وجمال الاشتريت منه الهايس .. وبالطبع على حسب حكايتك انت ماعارف التسوية كانت كيف لانك كنت حلزون زي مابتقول او ضحية .. وكانت المفاوضات قايم بيها عصمت ..نحن الان ماعندنا علاقة بي عصمت انت المفروض تتخلص من اللعنة . انت تمشي للناس ديل وتسأل من كيفية التسوية كانت كيف .. يا اما ترجع ليهم حقوقهم وانت عندك قروش في البنك تسدد ليهم منها لغاية مايرضو .. يا اما تاخد منهم العفو الخالص .. لانك بي صراحة انت في ورطة ماهينة ..
وفي عمك السر انت رجعت ليهو قروشو بعد سنتين بعد فقدت قيمتها او على الاقل نقصت كتير وهو قالك انت عارف القروش دي نقصت كيف وقال لك انا شاكيك على الله .. انت نسيت الكلام ده .. اي انت ممكن تنسى لكن ربنا مابنسى .. حتى لو عمك السر نسى الظلم ربنا مابنساهو .. فنصيحتي ليك .. اي زول عندو عليك مظلمة تمشي ليهو وتتخلص من الاوزار الفوق ضهرك باي طريقة ييسرها ليك ربنا .. وماتنسى مودة .. القالت ليك لو ربنا ما انتقم لي حقي منك بنتقم منك براي ..
بعد ماتخلص من الحاجات دي تعال لي بتلقاني انا راجيك ..
عارف والله شكلو اتغير .. وكساهو نور الهداية وظهرت عليهو علامات تلوح بالبشاير .. واقسم انو تاني مايدخل وكت في وكت ..
وهو طالع قال لي اديني تحصين يحميني من الشي ده لغاية ما اخلص من المهمة .. قلت ليهو امسك (حسبي الله ونعم الوكيل) .. قال تعالى(الذين قال لهم الناس ان الناس قد جمعوا لكم فاخشوهم . فزادهم ايمانا" وقالو حسبنا الله ونعم الوكيل . فانقلبوا بنعمة من الله وفضل لم يمسسهم سوء واتبعوا رضوان الله والله ذو فضل عظيم).. لمن تقيف من الحسبنة تمسك اية الكرسي .. لمن تقيف من اية الكرسي تقرا المعوذات .. اذا عملت الموضوع ده بي يقين صدقني لمن ترجع لي بتكون في امان..
عارف وهو طالع قال لي انا من جيتك هنا الوسوسة مافي.. ولمن رجعت البيت مافي وهسي الليلة مافي .. بس انا حاسي بي خوف اصلو ماتتخيلو .. قلت ليهو ماتشتغل بالموضوع ده كتير.. امشي في مهمتك ..وربنا يوفقك ..
وعارف طلع ربنا يحفظه حتى يعود.. طبعا الجني خانس وماعايز يوسوس نوع من الخداع .. لكن الخوف الحاسي بيهو عارف دلالة على ان الجني مازال موجود متلبس في جسمو .. اصلا علامات المس معروفة .. الحزن والخوف والضيق والتوتر المافي ليهو سبب .. والتردد في التصرفات . والعوارض والخوازيق .. لكن الله غالب وكتاب الله قادر على هزيمة اي متمرد من الجن وحرقه باذن الله .. وان غدأ لناظره قريب ..
نشوف البحصل على عارف ربك يستر ويوفقه ..
الى اللقاء ..