العسل المسموم ... طارق اللبيب

11

تاني يوم بحمد الله ..عارف وصل في نفس المواعيد .. المفروض يجي فيها .. وانا طبعا منتظره على جمرا" تهبو الريح ..وشاي الصباح ماشربتو قاعد منتظره بالشاي .. اها لامن جاء و اتونسنا شوية وشرب الشاي . وبدا يحكي ..
قال لي نحن البارح وقفنا وين؟ قلت ليهو وقفنا في انك قعدت سنتين في السجن .. وفي السنتين دي حصلت حاجات كتيرة ..اها واصل ....
قال لي ايوااا .. طبعا انا كنت قاعد في السجن وبنيت علاقات .. واتعرفت على ناس كمية .. وناس جو وطلعو وناس كانو جوه وقضو فترتهم ومرقو وناس شنو شنو .. وفهمت حاجات في البلد دي وجرايم .. انت في الافلام ما ممكن تشوفها ..
طبعا ناس البيت عرفو انو انا في السجن .. وامي تحنس في ابوي قريب الاربعة شهور ..عشان تجيني في السجن .. واخيرا يوم جوني الاتنين .. امي وابوي ..
وابوي سلم علي سلام اخير عدمو .. ورافض يتكلم معاي وانا اساسا مازعلان منه.. ولاشغال بيهو كتير .. وهو اصلا ماكان جاييني .. جاء مع امي... ولو امي ما اتمسكت بالجية شديد.. ماكان جابها .. وامي غمتت لي 100 جنيه .. ههه ..قالت لي انا عارفاك مظلوم ومفلس .. قلت ليها الحمد لله ربنا ماناسيني .. خلي قروشك معاك .. قالت لي .. بركة الوالدة ماترفضها .. وابوي قاعد هناك وبعاين للواطة اصلا ماقال لي كلمة .. امي قالت لي انا كل مرة بجيك ..خلاص ابوك وافق لي اجي ..
وبقت تجيني طوالي كل اسبوع عشر يوم بتجيني وتجيب لي قريشات .. من الحلال الكسبو ابوي من عرق جبينو ..
يوم حكت لي مشهد يوم العساكر جوهم بي امر القبض في البيت .. وانو خالي واولادهو كانو حاضرين .. المهم المشهد الحكيتو ليك قبل كدا .. وقالت لي امنية قعدت تبكي قدام ابوها .. وقالت ليهو يا بابا عارف ظالمنو اصحابو ومستغلين طيبتو .. ابوها قال ليها يابت اسكتي ..
انتي مابتعرفيهو اكتر من امه وابوهو .. وامنية لمن عايزة تسافر قالت لي يا عمتو ..كلمي عارف متي ماتلاقيهو.. قولي ليهو قالت ليك امنية انا ما ح أشك فيك مهما حصل .. وان شاء الله ربنا ينصرك ..
انا قلت لامي يامي لو بتعزيني انا ماعايز قروش .. عايز حاجة اهم
انا عايزك تجيب لي رقم اقدر اتواصل بيهو مع امنية ..
امي قالت لي اوعك اوعك.. انت عارف التهامي اخوي زول معقد.. يقوم يكشفك بتتصل على بتو .. تعمل مشكلة بين البت وابوها .. قلت ليها طيب لو يوم اتكلمتي معاها اديها رقمي ده .. قالت لي كدا معليش .. تتصل عليك هي .. في اوقات يكون ابوها مافي البيت ..
اها .. في زول صديق عزيز كان واقف معاي وقفة رجال وما حصل اتقطع مني ابدا .. صديقي العزيز انور .. الحكيت ليك بيهو ..
ودايما بجيني ويجيب لي مصاريف .. طبعا اشتغل في مطبعة في الخرطوم .. وشغل طبعا على قدر حالو المهم حلال .. لكن والله مامقصر معاي ابدا .. اما الزول الاسمو عصمت داك ...
منقطع عني تماما .. وماليهو اي ذكره في السجن ولاعنده ضحية .. وماعارف الحاصل عليهو شنو؟ و.. بتصل عليهو تلفونو مقفول قريب السنة .. وفي زول تاني مواصلني في السجن.. وما انقطع مني ابدا ..
الزولة الاصلية مودة بت اللاماب .. الماسكة ورق البيت .. كل ماتلقى ليها فرصة .. تجيب صاحبتها اسمها نادية .. وبجوني في السجن
وارتبطنا مع بعض ارتباط وجداني والل.. ه طلعت اصلية اكتر من الرجال ..ومواصلاني مواصلة ماعادية .. ويوم من الايام اتصادفو هم البنات الاتنين مع انور عندي في السجن .. وانا عرفتهم بي بعض .. وحكيت لي انور عنها .. وعن مواقفها معاي ..(لاحظ للنقطة دي كويس ) ..
اها انا يوم من الايام جاني تلفون .. فتحت الخط لقيتها دي امنية ..
اتكلمت معاي وسلمت على وبكت .. قالت لي انت الحصل ليك شنو بعد طلعت براءة من السجن؟ .. قلت ليها الجماعة خوزقوني تاني
ولفقت ليها كلام ..انهم سرقو دفتر الشيكات.. وقلدو توقيعي وكدا ..المهم غشيتها غشة مظبوطة ..وهي صدقت الكلام ..
قالت لي لكن ياعارف المشكلة.. انو بابا ما قادر يتفهم انك انت برئ .. بس كلامو كلو الله يلعن عارف .. وطا لينا راسنا في الارض .. وعمل لينا فضيحة.. وبقى لينا وصمة في جبين الاسرة .. عارف ده نقطة سوداء في تاريخ العائلة .. وكلام زي ده .. يعني بس بابا مستحيل يوافق بيك يا عارف .
لكن انا غايتو املي في الله كبير.. لانو قلبي من جوة بقول انت برئ ماعارفة.. من اول يوم اشوفك حسيت انك انت .. لايمكن تعمل حاجة غلط.. ولايمكن تاكل حرام .. وانا اصلا احساسي مابخيب شفتا هسي ..
لو بابا او ابوك قعدو معاك.. وادوك فرصة تحكي الحاصل ليهم .. كانو اتفهموك .. هسي بابا قاعد يقول انا نفسي اعرف .. عارف ده ال170 مليون وداها وين؟.. وعمل بيها شنو؟ دي قروش ماساهلة .. وانا بقول ليهو يابابا .. لو فعلا هو شالا المفروض تكون موجودة .. او ظاهرة في حاجة .. معناها فعلا عارف مخدوع ومظلوم .. مسجون بدون ذنب .. وبابا يهيج فيني ويقول لي اسكتي يابت .. تاني ماعايز اسمعك تجيبي سيرتو فوق خشمك ده ..
ده كلو كلام امنية معاي في التلفون .. وانا رديت ليها بكلام بسيط قلت ليها.. يا امنية .. انتي زمان قلتي لي كلام.. قلتي لي لو ربنا جاعل لينا قسمة بنتلمه .. صح؟
قالت لي صح .. قلت ليها انا حاسي انو ربنا ح يلمنا بعد الحال .. المهم في نهاية المكالمة .. امنية قالت لي ماتتصل علي الرقم ده .. الا انا اتصل عليك.. انا كلما ما القى لي فرصة .. بتصل عليك واسال من اخبارك وانتهت المكالمة ..
وبقت كلما تلقى ليها فرصة.. بتتصل علي كان دقيقة كان دقيقتين وانا وهي قنعانين من الموضوع .. لكن بس بنتواصل ليه؟ انا ماعارف ..
اما مايتعلق بي موضوع مودة وانور .. اعز صديقين في حياتي .. والناس الوقفو معاي اكتر من اهلي .. بعد ما انا عرفتهم بي بعض..
واستمرت بينهم علاقة طيبة كلها بتدور حولي انا.. لاني انا همهم المشترك ..
وبقى التواصل بينهم تواصل اخوي في فهمي انا .. لكن لاحظ لي حاجة .. طبعا" انا حكيت لانور.. انو الزولة دي ماعندي ليها حاجة عاطفية .. لانو بت خالي ما خلت لي زول بعدها خانة .. ومودة يا انور فاهمة انو انا عايزها زوجة للمستقبل .. وانا عايزها تكون فاهمة كدا.. لغاية ما اطلع من السجن لانو عندي هدف في الموضوع ده .. وماحكيت لانور الهدف من الموضوع ده شنو .. لكن انور غلطني وقال لي حرام عليك .. ترهن بت الناس وتغشها وانت اصلا ماعندك ليها شي .. وانا ساكت ماوريتو الهدف .. يعني انور ماعارفني عندي بيت .. الشخص الوحيد في الدنيا عارفني عندي بيت هي مودة .. اها يازول الظاهر في فترة التواصل دي بين انور ومودة .. انور قلبو ميل على البت ..وبقى يتواصل معاها ويلاقيها .. على اساس انو انا قلت ليهو ماعندي ليها شي .. ومودة بتقول لي انور .. انا حاسة اننا بنخون عارف.. لانو عارف واعدني بالزواج .. وانا مابقدر اخلف وعدي معاهو .. اها يازول انور لمن زهج من الاسطوانة بتاعتها دي .. قال ليها اسمعي يامودة ..عارف ماعايزك .. ولاعندو ليك حاجة ..لانه هو اساسا بحب بت خالو.. وهو عايزك لي هدف معين.. وانا ماعارف الهدف ده شنو؟
قالت ليهو انت كذاب وخاين .. وبتخون صاحبك كمان بتكذب فيهو .. انور قال ليها خلاص جدا.. المرة الجاية لمن نمشي ليهو في السجن.. ح نسأله ونختو في الكرسي الساخن.. اساسا" انا مابخاف من عارف ولاغيرو.. قالت ليهو جدا اتفقنا ..
الكلام ده حصل بعد 22 شهر وانا في السجن ..
اها جوني الاتنين ومودة شكلها متورترة وزعلانة زعل شديد .. وانور بفرك في يديهو زي العندو حاجة عايز يقولا لي .. قال لي اسمع يا عارف.. انا عايز اسألك سؤال .. قول لي صح ولا غلط ..
انت موش مرة قلت لي انا مودة ماعندي ليها حاجة؟ .. وبحب بت خالي؟ .. وانا قلت ليك ما تغش بت الناس.. وتوقف ليها حياتها .. حصل ولا ماحصل؟؟ .. انا سكت ساي .. وبقيت اعاين لي انور في عيونو ..
ومودة بتعاين لي انا ومطيرة عيونا .. قالت لي انطق ياعارف .. وقول لي .. انو.. انور بكذب .. قول .. قول ياعارف ..
قلت ليها والله يا مودة للاسف انور كلامو صح .. بس في حاجة انتي لازم تعرفيها .. قالت بسسس بسس .. تاني ماعايزة اعرف منك اي شي..
انا ان شاء الله ربنا يقتلني .. انا ان شاء الله يجيني الموت اليلة قبل باكر .. انا مابستاهل الخير .. شوف بالله انا حيوانة كيف؟ واقفة معاك سنتين.. وانا بخدم فيك بعيوني.. وانت غاشيني .. خليتك لي الله ياعارف .. شكيتك لي اقوى مني واقوى منك ..
اسمع انت ماعندك معاي حاجة .. وانا ماعندي ليك من اليوم .. وباكر بجيب ليك اوراق بيتك .. هو البيت يعملو بيهو شنو؟ لو سيدو بقى حقير وحرامي وكذاب .. تفو عليك يا واطي ياجزمة ..
وانا طبعا" لو الحيطة دي بتتكلم انا بتكلم.. بس ساكت ومدنقر في الواطة .. بس مرة مرة بعاين لي انور.. وقلبي عليهو دم دم .. اقرب اقوم اخنقو وافطسو .. وانور ولاهاميهو يتبسم وشمتان .. علي .. وبقول لي اتاريك انت عندك بيت .. وياخد ليهو ضحكة .. والمشكلة انو البت دي لو جابت لي الورق في السجن دي مشكلة ليها راس وقعر ..
الى اللقاء ..