العسل المسموم ... طارق اللبيب

19

مرت الايام يوم يومين وتلاتة خمسة يوم .. وعارف ماجا وانا ماعرفت خبرو شنو؟ وماشلت رقمو عشان اتصل عليهو اشوفو .. غايتو يازول بعد اسبوع المساء كدا وصلني .. ومتغير شكلو للاحسن طبعا" وشو منور ونضيف . وشكله هادي.. والتوتر العليهو داك مافي . كيف يازول الحصل شنو ؟ ومالك اتأخرت كدا؟
قال لي والله حصلت حاجات اصلك ماتتصورها .. اول حاجة مشيت من هنا وفي نفس اليوم .سحبت القروش الفي البنك كلها وهي كانت عشرين مليون .. وتاني يوم من الصباح مشيت لي فتح الرحمن بتاع الجنريتر .. في الدكان لقيت نسيبو سيد المحل ذاتو .. بس الحمد لله ماعرفني .. يلا سألتو منه قال لي الزول ده سافر السعودية .. قلت ليهو انا صاحبو .. وعايزو ضروري .. عندي ليهو خبر عايز اقولو ليهو . ممكن تديني رقمو ؟؟ الراجل مشكور اداني رقم فتحي في السعودية ..
شلت الرقم حقو .. واتصلت عليهو في السعودية .. قلت ليهو انا عارف .. قال لي عارف منو؟؟ قلت ليهو عارف محمد الحسن الاشتريت منك الجنريتر بالشيك .. قال لي انت المجرم المخادع ؟ تاني داير مني شنو؟ موش عملنا تسوية ؟ وخسرتوني خسارة عمري ما انساها.. ومن اليوم داك انا حلفت ما ابيع حاجة بي شيك .. غايتو حق المظلوم مابضيع يا عارف .. انا حقي خليتو لي الله .. قلت ليهو انت التسوية معاك كانت كيف؟.. قال لي اتنازلت عن اتنين مليون وادوني اتنين .. قلت ليهو انا هسي اتصلت عليك عشان عايز ارجع ليك حقوقك .. ما اتصلت عشان شغل .. قال لي حقوقي ؟؟ ترجعها لي كيف؟؟ ..وانت عارفها هسي بتساوي كم ؟ قلت ليهو مامشكلة .. شوفها الاتنين قبل سنتين بتساوي كم هسي؟ وانا جاهز .. بس انت تطلب العايزو .
وتوريني احولها ليك كيف؟
سكت مسافة وقعد يضحك .. قال لي دي خدعة جديدة ولا شنو؟ قلت ليهو والله بس انا تبت من حق الناس.. وداير الاقي ربنا نضيف.. وانت اول زول انا ظلمته .. بس عايزك تسامحني في كل الحصل .. قال لي بس ده سبب اتصالك ؟.. قلت ليهو نعم والله غلى ما اقول شهيد .. قال لي ده كلو خليناهو ياعارف.. انت كيف بتكذب وتنسب نفسك لزول في ام درمان؟ وتقول هو ابوك عشان هو تاجر كبير؟
قلت ليهو والله الحكاية دي الفها عصمت.. وانا ذاتي اتفاجأت .. بس ماقدرت اقول ليهو انت بتكذب .. لكن كوني اسكت.. برضو شاركت في الجريمة وعارف غلطي .. بس هسي انا عايزك تقول لي العايزو .. وانا جيتك واتصلت عليك وطالب فضلك .. قال لي يازول العفو في العافية.. انا ماداير منك قرش .. ولا تحول لي شي ولاعايز منك حاجة .. قلت ليهو عليك الله بس.. اعفي لي من قلبك .. قال لي ابشر يازول .. والله عافي من قلبي .. والله الزول ده وكت قال لي كدي .. التقول بشروني بالجنة ..
اها تاني يوم طوالي ركبت مشيت سوق بحري عشان اقابل جمال الاشترينا منو الهايس .. لمن جيت سألت منه في المحل الجيناهو فيهو المرة الفاتت .. قالو الزول دة زمان رحل امدرمان .. وعنده محل بقالة في شارع النص .. في طرف الثورة الحارة السابعة من الجيهو الغربية .. ووصفوها لي وصف دقيق .. مشيت ليهو في باقي اليوم داك عشان اكسب الزمن .. اول من شافني .. عرفني طوالي .. سلمت عليهو .. قلت ليهو جمال ياخي انا جاييك في موضوع .. قال لي اتفضل .. قلت ليهو ياخي انا قبل كدا اشتريت منك هايس.. بواسطة عصمت .. قال لي اها صح ..
قلت ليهو طبعا" الناس ديل لمن رجع الشيك.. وانت اكتشفت اني في السجن .. جوك في البيت.. وعملو معاك تسوية .. قال فعلا" كله حصل .. قلت ليهو الحقيقة الناس ديل كانو شغالين شغل بتاع حرامية بس ..
وحصل انا اتغشيت في الوكت داك والله .. انا لمن اشتريت الهايس انا ماعايزها .. لكن كانت اوامر من عصمت ..
في النهاية لقيت نفسي في السجن.. وهو بفاوض في الناس.. عشان يطلعني .. ويربح من التجاوزات البتجاوزوها ليهو الناس البفاوض فيهم .. وانت كنت من الناس ديل .. وهسي انا عرفت الغلط ده .. وحسيت اني ظلمتك .. وانت اتنازلت عن حقك مجبور .. لمن لقيتني في السجن .. وعلي ديون كتيرة.. هس انا جيتك عشمان فيك عشم كبير .. ياريت ماتخذلني .. قال لي اها قول .. قلت ليهو انا طالب منك العفو .. ولو عايز اي مبلغ من القروش يسد ليك من خسارتك .. انا بلتزم ليك بيهو.. بس انت تكون راضي من جواك ..
قال لي يا ازول والله انت راجل فيك خير .. وضميرك حي .. وياريت البلد دي كلها.. لو فيها ناس زيك .. ماكان الحاصل علينا ده يحصل .. والله الناس بقو ياكلوك .. وزول يفكر في حساب الله مافي .. ياخي كونك انت دايرني اعفى منك.. وبس.. والله دي حاجة تشكر عليها .. وانا لو طالبتك بقروش .. اكون زول ماعندي دين .. والله تعريفة ما اشيلا منك.. انت زول طالع من السجن .. ولو محتاج لاي حاجة انا جاهز . امش يازول ربنا يوفقك ..
انا القروش ديك مافي قسمتي يعني اعمل شنو .. ؟؟ بصراحة جمال ده خلاني بكيت بي كلامو .. سبحان الله ديل الناس الانا كنت ظالمهم .. دي نواياهم ودي طبايعهم ..
اها يازول يومي خلص .. والحمد لله والقروش قاعدة ماهبشت منها تعريفة ..
طيب ماكلمتك بالانطباعات الحاصلة في بيتنا من تغييري المفاجئ .. والله الحمد لله يومين بس وانا في الهداية .. سددت لي كل السنوات الضايعة والحمد لله ..
طبعا بقيت مواظب على الصلوات كلها في المسجد .. اصلا ماعندي حاجة .. بمشي الجامع قبل الاذان مايأذن .. وبقعد بقرا في القران .. وابوي طبعا" ملاحظ على التغيير .. واليوم ده بالذات قلت امشي معاهو المنطقة .. واساعدو شوية واقيف معاهو .. ودي اول مرة اعملها من كنت في المدرسة .. كنت بمشي معاهو.. لكن لمن كبرت وبقت عندي طموحات وامال.. بقيت شايف ابوي زول سلبي ومابعرف يكسب القروش .. ده كان فهمي السقيم ..
ابوي لمن بقيت واقف معاهو .. في المنطقة.. بناولو الادوات وبجيب ليهو الفطور والشاي و.. املا ليهو ابريق الوضو .. اشتغلت ليهو زي الخدام .. وانا مستمتع .. بقى يفتخر قدام الناس .. وقال لي المكنيكية المعاهو .. ده ولدي الباريني عارف .. انا عافي منو وراضي عليهو .. والله ماتتخيل الفرحة الكبت في قلبي .. بي كلام ابوي سبحان الله .. شوف قبل ايام كان كيف؟؟ وهسي كيف ؟
الحمد لله والله انا حسيت باني اتغيرت من جوة .. تتذكر اليوم الانا كنت ماشي مع عصمت.. في تاني عملية اجرامية .. حسيت اني اتغيرت والدنيا بقت مابتشبة الدنيا .. حتى الكون والناس الحولي .. هسسي كل شي رجع طبيعي ومريح .. وحاسي بي سعادة ..
بس برضو خايف من شنو انا ماعارف .. مرات اقول يمكن خايف من عمي السر .. لكن بالجد ماعارف ماعارف .. مع انو كل المعطيات بتقول انا كويس .. واموري ماشة تمام ..
واتوفقت في النفرين الفاتو ..
اها يازول ابوي لمن رجع البيت وبحكي لي امي قال ليها والله عارف بقى زول تاني تماما .. بس ان شاء الله مايكون باري ليهو جماعة ولا حركة جهادية ولاطريقة ولاحاجة .. قالت ليهو الله يستر .. البلد كلها بقت تكفير .. انا طبعا: راقد بره ..سمعتهم جيت .. قلت ليهو يا ابوي انا ما عندي اي توجه لاسياسي ولامذهبي ..انا زول مسلم ..وبحب الله والرسول.. والمسلمين كلهم احبابي .. مافي حاجة يا ابوي غير اني انا مليت من الصياعة.. واشتقت لي طريق ربنا .. وربنا هداني .. بس ده كل الموضوع يابوي ..في احسن من كدا؟
قال لا ابدا ..انت كدا مافي عندو معاك كلام .. ولا في زول بقدر يقول تلت التلاتة كم .. قلت ليهو بس يا ابوي انا عايز دعواتك ..
اها يازوووول .. طلعت بعد يومين وانا مطمئن جدا انو مشواري ده موفق باذن الله .. مشيت لي عمك السر.. في محله في سوق السلمة الانا بعرفو زي جوع بطني .. لقيتو ليك قاعد قدام مغلقو .. ومركب نضاراتو .. نفس الشخصية والقعدة .. جيتو وقفت قدامو قلت ليهو
السلام عليكم ياحاج .. قال لي عليكم السلام والرحمة وهو مدنقر لمن رفع راسو وصلح نضاراتو وشافني قال اعوذ بالله من الشيطان الرجيم .. ياربي الليلة ده صباح شنو ده ؟ لاحول ولاقوة الا بالله ..
قلت ليهو كيف حالك ياعم السر؟ .. قال لي انا كويس الحمد لله.. اها عايز شنو مني تاني ؟؟ الجابك لي شنو؟ قلت ليهو والله ياعمي ماعايز منك الا النية الصافية .. وجيت طالب منك العفو .. انت قبل كدا شكيتني على الله .. وانا والله ما ارتحت نهائي ..
قال لي ان شاء الله عمرك ماترتاح ..انت ماعارف حق الناس والظلم بسوي شنو؟
قلت ليهو لو انت مابتقدر تعفى مني.. وريني حقك انا بديك ليهو .. قال لي حقي متين ؟ قبل سنتين ولا قبل شهرين ولا قبل خمسة شهور؟؟ .. كل واحد من ديل عندو قيمة معينة ..
قلت ليهو بس انت قول العايزو .. قال لي جدا .. انا ماعندي ليك عفو ولا بسامحك لي يوم الدين .. الا ترجع لي باقي القروش .. الرجعت ليك من البيت الاشتريتو ..انا عارف انك ربحان 60 مليون من ضهري .. انت قايل انا ماعارف .. انت بقروشي اشتريت بيت ودخلت السجن .. وقعدت مرتاح في السجن سنتين .. لغاية مالبيوت ارتفعت .. وطلعت بعت البيت بي 230 شلت 60 واديتني 170 انت قايل في حاجة بتدسه .. يا اما تدفع لي ال60 يا اما تعيش في الدنيا معذب وبعدين بشيلا منك يوم القيامة .. وربنا مابضيع زول
.. الى اللقاء