العسل المسموم ... طارق اللبيب

10

انا في اثناء الموضوع ده .. وانا ما جايب خبر .. اتصل علي رقم غريب كدا .. قال لي انا عصمت يا عارف.. كيفك وكيف صحتك واحوالك؟ .. قلت ليهو الحمد لله تمام التمام .. قال لي اسمع عمك السر طلع عندو ولدو هواء.. وهواء سخن كمان .. وده ح يخرب بيتنا انا وانت .. الحاصل انو الزول ده ولده ضابط في المباحث.. وده لو لم فينا اول حاجة بعملا حيدينا دقة بالمفراكه .. وبعد داك يشتغل معانا انتقام بي فهم .. والله جوة السجن يدخل عليك يدقك ويطلع .. دحين لو جاعلني ليك من الناصحين ..
بس السفر في اقرب وقت ..انا بديك نصيبك من العملية .. وبشيل نصيبي .. و انا بغادر بي طريقتي .. وانت تغادر بي طريقتك ..
قلت ليهو دقيقة دقيقة .. اغادر وين؟ انا مافاهم اي حاجة.. ولاعندي جواز ولا ولا عندي اي شي .. قال يازول انا بطلع ليك الجواز وبعمل ليك اي حاجة .. انا طبعا" صراحة حسيت انو عصمت عايز يطلعني بي قد القفة.. وينوم بالغنيمة براهو ..
قلت ليهو اسمع ياعصمت.. انا ماخايف من الضابط ولاغيرو .. خليهو يدخلني في علبة .. هي الحكاية بالقانون ولاغيرو؟؟ .. انا معاهو لغاية المحكمة .. انت خليك في حالك.. انت كاتب شيك؟؟ .. انا الكاتب الشيك .. وانا الماشي السجن .. وخليهو يعمل الدايرو .. بس مابسافر ولاشي ..
ولو انت خايف من الموضوع.. خلينا اول حاجة نبيع باقي البضاعة الموجودة .. وبعدين نفرز الكيمان .. وانت شيل نصيبك ويادار مادخلك شر ..
لكين هسي الكاش بسيط .. وراس المال مابطلع خلي الباقي .. ولا انا غلطان؟ واذا اقتنعت بي كلامي خليك في شغلك.. وانا بمشي على سجني ..
ابقى في شغلتك وانا في شغلتي .. ومافي اي داعي للخوف ..
ولو خايف .. شيل حقك وخليني اكل ناري براي ..
قال لي خير .. ده رايك وانا ماعندي مانع .. لكن بعدين ح تندم .. صدقني .. ناس المباحث ديل بعرفهم انا .. قلت ليهو ولايهمك انا مستعد لاي كوارث ..
المهم بي اختصار انا حسيت انو عصمت عايز يتخلص مني .. لكن يتخلص مني بي ياتو طريقة .. يا اما عايز يرميني في السجن.. ويزوغ .. يا اما يسفرني برة ..
طبعا لو انا دخلت السجن.. وهو ما قدر اقنع سيد الحق بي تسوية .. مابكون عنده اساسا نصيب.. الا نصيب الارباح الحاضرة الفوق راس المال هسي دي .. المهم يازول عمليات معقدة .. ماعايز اوجع راسك بيها ..
قلت ليهو لي علمك انا ماعندي مانع اجدع قريشاتي في قطعة ارض.. واقعد في السجن عشرين سنة ذاتو.. لكن طبعا ماعندك معاي شي .. الا تخارجني بي تسوية ..
قال لي والله انا ذاتي هسي محتار اعمل شنو؟
وانا صراحة بقيت مافاهم عصمت صادق ولا كذاب .. لانو الزول الكذاب حتى لو صدق انت بتشك فيهو ..
اخيرا اتفقنا على اننا نبيع البضاعة.. باي سعر ونقسم الكاش .. وانا ادخل السجن .. لو قدر يطلعني ياخد حقو.. ولو ماقدر انا باكل ناري براي .. اتفقنا يازول ؟ اتفقنا خلاص ..
قلت ليهو خلاص ابدا في البيع .. وانا البضاعة المعاي بخارجها في باقي اليوم ده بالكسر .. الكلام ده كلو بالتلفون ..
وانا كان موكل بي اسمنتي في مخزن بشرى .. مشيت بعتو في باقي اليوم داك .. وشلت القروش .. اصلا اليومين دي كنت مؤجر لي نص بيت في الشجرة .. ومافي زول عارفني انا منو اصلا" ..
يعني لو قعدتة في بيتي ده سنة .. ماح يقدرو يقبضوني .. بقيت بتزاوغ وهو طبعا" غايب.. وانا ماعارفو من واصلو ماسألتو انت وين .. باختصار شديد .. هو باع بضاعتو بي سرعة برضو .. وانا بعت بضاعتي واتفنا نتلاقى عشان اي زول ياخد حقو ..
واتلاقينا انا وهو بس.. لانو مافي جناحات في الموضوع.. لغاية الان ..
بصراحة انا فكرت تفكير مظبوط جدا ..
القروش الجمعناها كلها كانت تقريبا 191 مليون .. يعني نحن لو دفعنا لعمي السر قروشو ..ارباحنا بتكون من العملية 21 مليون ..
والكلام ده بعد عشرة يوم من حلول الشيك ..
انا عايزك تركز معاي في الموضوع ده كويس .. نحن لو رجعنا للزول قروشو في اللحظة دي.. ووزعنا الارباح علينا ..كان ممكن الربح يكون حلال ومافيها شي .. و كان الموضوع طبيعي .. ويادار مادخلك شر .. لكن انا كنت عنيد.. وطامع ونفسي غالباني والقروش غاراني ..
المهم اتقسمناها.. عصمت شال عشرة .. وانا شلت حداشر من الارباح .. وعصمت فارقني ..
وانا شلت القروش كلها 181.. يعني المية سبعين حقة الراجل جاهزة .. وربحي حداشر مليون زيادة ..
.وما مصدق انو عصمت اقتنع بالعشرة ومشى .. وانا من هنا عرفت فعلا انو عصمت خايف من الضابط .. والنصيحة لله لغاية الان عصمت ماخدعني ولاغشاني ولافي قرش .. وكان شغال معاي بي قلب واحد .. وقدر ما اشك في حاجة .. اجي اعمل مراجعة للحسابات القاها في السليم .. صراحة انا كنت مستغرب من شخصيتو ..
زول حرامي وكذاب ومراوغ .. لكن مستحيل يظلم زول من الناس الشغالين معاهو .. غايتو انا كل مرة بويق فيهو زيادة بي مواقفو معاي .. لانو المواقف الوقفها معاي.. ابوي وخالي ماوقفوها معاي .. كفاية انو استضافني معاهو في البيت شهر وعشرة يوم ..
وبلبس من ملابسو.. وبطلع بي جزمو وشباشبو ..
اها يازول اواصل ليك في الحصل بعداك ..
كان اصلا" في بت من بنات اللاماب ..اسمها مودة ..كان بيني وبنها علاقة.. مامعروفة علاقة صحبة ولاحب.. المهم هي خاتة فهم زواج .. وانا ماعندي نية زواج منها.. عايز اقضي معاها وكت ساي.. وزولة اصلية لي درجة ما تتصورها .. وعارفة كل اسراري .. اها المرة دي مشيت ليها في اللاماب .. واتلاقينا في محل بتاع اسكريم كدا العصرية .. وقعدت اكضب ليها .. قلت ليها اول حاجة انا اليلة عايز اقول ليك كلام ماتتفاجئي منه .. انا عايزك على سنة الله ورسوله .. وانا من زمان ماعايز اطلب منك الطلب ده.. عارفة ليه ؟؟
لاني كنت في كف عفريت لكن هسي .. امنت مستقبلنا .. ومعاي 180 مليون .. وانت الزول الوحيد الممكن اوثق فيهو.. يكون امين على املاكي .. لانها في النهاية ح تكون املاكك ياحياتي ..
قالت لي انا اموت فداك ياحبيبي .. انت عايز تعمل شنو طيب؟ قولي وانا مستعدة اخدمك بعيوني ..
قلت ليها انا احتمال اتسجن في الايام الجاية دي .. تمشي معاي هسي عندي مشوار .. مشينا عد جسين في بيت من طابقين في فاتح في الظلط يشبه بيت عمي السر الخالق الناطق سبحان الله .. مشينا اتلكمنا فيهو وباعوهو لينا بي سرعة وتساهيل عجيبة ..
وباقي من القروش 5 مليون بس.. اديت مودة اتنين مليون واديتها اوراق البيت .. بي اسمي .. وقلت ليها ابليس اللعين مايشوف الاوراق دي.. ومايعرف عنها حاجة.. لغاية ما اسدد الدين واطلع من السجن .. ونجي نعرس ونسكن في بيتنا .. مودة فرحت فرح عجيب .. والاتنين مليون ديك قربت تجننها .. ومشت اهلها بي امجاد ..
وانا خليت معاي تلاتة مليون.. ومشيت بيتي الفي الشجرة وبقيت منتظر السجن .. ومتوقع انو الضابط ود السر .. ينتقم مني انتقام السنين .. المهم بعد يومين جاني تلفون من عصمت .. قال لي اها ظبطت امورك ياعارف؟؟
قلت ليهو مية المية .. قال لي خلاص انتظرني بكرة الصباح في دكان كنجاك .. عشان تخلصني من الدربكة الانا فيها دي دي .. اها اليوم داك اتاريهو مشى لي عمك السر .. في دكانه وقال ليهو .. والله الزول خدعني ياعم السر .. اتاريهو زول نصاب وماعندو علاقة بي ناس ود العبد .. الفي السوق العربي .. و لاانا جيتك تعمل فيني العاوزو .. لكن انا متعهد الزول ده اجيبو ليك المك فيهو .. الليلة قبل بكرة .. وهسي عارف مكانه .. طوالي عمك السر ضرب لي ولدو الضابط .. وجات معاهو قوة.. التقول دايرين يفضو ليهم مظاهرة .. وركب معاهم عصمت وعمك السر ..
وجوني كلهم في الدكان.. وقبضوني .. وعلى السجن مكاني الطبيعي .. الاصلا انا مستعد ليهو قلبا" وقالبا" ..
الضابط قال لي انا عارف حركاتكم كلها .. بتدخلو السجن.. وناس برة بكونوا شغالين بقروش الناس .. ووفي النهاية تعملو تسوية مع سيد الحق .. وتطلعو ربحانين .. لكن والله انا لو ابوي طلعك الا احلق شنبي ده .. عمي السر قال ليهو تحلق شنبك ؟؟ انا علي الطلاق .الزول ده لو مادفع لي قروشي على داير المليم .. يعفن في السجن مابطلعو .. وانا عامل فيها حزين ومكسور.. ومن جواي مبسوط .. عندي بيت ملك من طابقين .. وخايض في الفرحة وبقيت من الأغنياء .. والسجن على قلبي متل العسل ..
المهم الاتنين حلفو انهم مايطلعوني.. الا ادفع كل القروش .. لكن بعد كم مامعروف .. وح نشوف ..
انا قعدت في السجن .. ولقيت عبدالحميد قاعد ..واصحابي الفي السجن .. وقلت ليهم تاني انا مابفارقكم .. قعدت في السجن في امن وامان وراحة تامة .. والضابط طلع زول ممتاز .. وما اذاني باي حاجة .. بس بقى مراقب ناس عصمت .. واتصالاتهم معاي .. وقال لابوهو لو جاك زول طلب منك تسوية .. اديني تلفون في اي وقت .. وعصمت طبعا" نقش الفيلم.. بقى ماعندو معاي اي اتصال ..حتى لو اتصلت عليهو انا مابرد لي .. ومرت الايام والضابط نقلوهو مكافحة التهريب بورتسودان .. وانا بقيت في السجن ..
واخدت في السجن سنتين اتنين ..
وفي السنتين ديل حصلت حاجات ...........
مابتسع المجال اقولها ليك هسي .. شايف وقتك ضايق وفي ناس داخلين عليك .. وانا قصتي لسسسسع ماانتهت .. بمشي وباكر بجي بتم ليك باقي القصة ..
لغاية هنا عارف اتوقف من سرد الجزء الاول من القصة .. وانا ماعلقت ليهو اي تعليق على قصته لغاية مايجي بكرة واشوف باقي القصة بعد داك افيدو ..
الى اللقاء ..