عمر :ثاني يوم هم شفتهم من ديرجعون وصلوا قريب على بيتنا إجى خالد يركض عليه هلو عمر جاوبته هلو شلونك طلعتله نساتل وانطيته گلي جبت الرقم بس شلون انطيك الورقه اخاف هنادي تعرف جاوبته طلع كتاب من الجنطه وخلي بي الورقه ونطينياه اني اخذ الورقه الطفل نفذ وأخذت الورقه من وصلت اخته يمنا سلمت وگلتله يله حبيبي خلي نروح سألتها صايره متلزمين ايده عايفته يمشي وحده قبلكم
جاوبتني بانفعال لان انت طلعت عينه من گتله انت رجال وتحمي خواتك صار ميقبل ألزمه مثل الصغار
خالد :اي اني چبير ميصير تلزميني مو عمر
عمر :اي صح بس عادي تخليها تلزمك لان هي تعرف انت چبير بس تخاف عليك اتفقنا خالد:اتفقنا
هنادي :عنده فد تأثير بشخصيته ورزانته تخلي المقابل يمشي بكلمته ويحبه يعني خالد الطفل يحترمه وياخذ حجايته ويطبقها بدون ميعاند رجعنا للبيت ورا الغدا سمعت التلفون يرن رحت رفعته الو الو محد يجاوب سديته
وراها هم رن رفعته الو مجاوب حجيت بلا بياخه وقلت أدب بعد لا ادگون بعدني خلصت اخر حرف سمعت الو هنادي
جاوبت منو /
اني عمر
جاوبته عمر منين عرفت تلفوني
عمر: العصفور جابلياه يعرف مراح تحنين وتنطينياه
هنادي :عمر شنو تريد بسرعه راح أسد التلفون
عمر :دقيقه هنادي ترى اني والله احبج وماعندي علاقات وبنات اذا عندج مشاعر تجاهي انطيني فرصه واذا لا سدي الخط وبعد اسحب نفسي وما اتعرضلج /بقت مساده الخط وساكته سألتها هنادي ويايه
هنادي :وياك عمر
عمر :موافقه تنطيني فرصه ونتعرف على بعض
هنادي :موافقه /بعدها قوت علاقتي بعمر وحبيته والولد أبد ما سمعني كلمه بيها قلت أدب أو تجاوز طول ما نحجي بالتلفون مجرد يسمعني أغاني كاظم الساهر ويگلي حسي بكل كلمه من الاغنيه دتطلع مني الج ومرات نحجي عن يومنه شنو سوينا وضحك وشقى بس مرا وحده گلي اول ما اتخرج من الكليه اخطبج توعديني متصيرين ولا تحبين غيري جاوبته وعد وبقينا يوميه يشوفني من اجيب اخوتي ومن ارجع نحجي بالتلفون الى ان يجون اهلي من الدوام بعد ما اكدر لحد هنا احنه تمام وأكثر من تمام اجتي العطله ويوميه أتعلق وأحب عمر اكثر من اليوم الي قبله وبقيت فتره مشايفته وچان يسمعني بالتلفون أغنية مشتاگ لكاظم ويگلي اتذكريني من تسمعين أغاني كاظم اجاوبه انت على طول ببالي ما اكدر أنساك .
صرت صف ثاني متوسط رجعت أداوم ورجعت اشوف عمر لكن بهالفتره تعرفت على بنات بالدرس الخصوصي بنفس مدرستي ومنطقتي عدهم علاقات بولد وسوالف طبه وطلعه من ورا اهلهم اني حجيتلهم عن عمر وعلاقتي بي بس تلفون واشوفه ويشوفني من بعيد لبعيد بقوا البنات يزنون على راسي ويأثرون عليه بالكلام وفترة مراهقه بعد عقلي مو واعي وما عندي احد ورايه يرشدني ويتابع تصرفاتي اني انجرفت وياهم لكن بس بالتصرفات واللبس صرت البس شورتات قصيره وكيمونات وبديات ضيگه لو دلعتها چبيره ومكياج اني طويله وجسمي حلو اسمر برونزي وشعري طويل صرت من أفوت بشارع بي ولد اسمع أشكال الحجي وأكثر من مره يعرضون عليه علاقه لكن الشي الوحيد الي متغير بيه حبي لعمر وبحياتي مباوعت لأحد غيره
