Mga Tulang Likha ni Miss Makata

"Tangis ng Ulap"

Matayog na alapaap
Masidhing pangarap
Malalim na hirap
At bilang na pagkurap

Bagwis sa paglipad
Bibig sa paglahad
Mga kamay at palad
Na waring lipas na ang edad

Sa daang tinahak
Pagkatao’y nawasak
Nabali ang pakpak
Masakit na pagbagsak

Nagkamali nga ba ng lipad
O mas tamang ito’y nilakad
Kaysa naniwala sa ligayang huwad
At pait na walang katulad

Kasabay ng pagpatak ng luha
Ay ang tangis ng ulap at aba
Isang kapalarang di sinadya
Ang siyang pumatay sa ngiti at tuwa