Mga Tulang Likha ni Miss Makata

"Mahal Kong Talata"

Nais kong sumulat sa isang talata

Ika'y dala at sambit ng aking dila

Bagamat ikaw ay 'di nakikita

Nais kong sanang ika'y maalala

Palagi sa aking paggising ikaw na'ng aking napakikinggan

Iba-iba man ang salitang sayo'y bumubuo

Hatid mo'y napakaraming kahulugan

Dala ng iba't ibang lenggwahe, tinig at tono

Napakadaling ika'y bitawan

Ngunit minsa'y ang gawin ka'y hindi ko kaya

Sapagkat minsan sa tapang ako'y nawawalan

Ngunit minsa'y nakakasakit din ng kalooban

Batid kong ang tulang ito'y iyong nababasa

Sapagkat ikaw ang laman ng bawat taludturan

Na nakapalaman sa bawat sukat mo at tugma

Ikaw ay ang mahalagang bagay sa bawat usapan

Sa huling sandali, kaibigan, paalam

Itong liham ko sana'y pakaiingatan

Sana ako'y huwag kalilimutan

Mahal kong talata, sa muli nating pagkikita