طفوله (مكتمله)

٢/ اسواء حالاتي

( اما بالنسبه لمريم فحالتها مو احسن من اسيل طبعاً عانت وافتقدتها كل بالها يم اسيل بس متكدر تسوي شي كل عمرها ١٥ سنه شنو تكدر تسوي كل الي جانت تخططله انو توصل ١٨ وتطلع من الميتم وتاخذ اختها ويخلصون من هالعيشه مريم خلوها تشتغل وتنظف ومينطوها اكل اذا ماكملت كل الشغل ينهد حيلها وتتمرض يجون يعاقبوها ويضربوها وكل هذا من ترجع للمكان الي تنام بي تلزم الكتب وتكعد تقره وتقره وتقره (جانت تدرس خارجي يعني تروح للمدرسه بس علمود تمتحن وترجع) تريد تحصل على نتيجه تنقذ بيها اختها وروحها من هذا العذاب جانت تدري وعلى يقين انو اسيل مو زينه ومتاذيه اكثر من عدها بس نرجع ونكول شتسوي مو بيدها)
{مرت هالثلاث سنوات على الخوات مثل الدهر واكثر}
مريم (كدرت توصل للجامعه دخلت هندسه طبعاً هي بهاي الثلاث سنوات جانت تنهزم من الميتم وتدور على شغل وتشتغل رغم من ترجع يعاقبوها بَس استمرت جانت مرات تنظف بيوت مرات تخيط حسب الي تلكا من شغل وتضم الفلوس وطبعاً تعبها مراح على الخالي كدرت تطلع من الميتم وتشتري شقه صغيره غرفه ومطبخ وصاله وحمام بمنطقه كلش فقيره ببنايه قديمه بس اهم شي مكان يئويها هسه بقت عدها خطوه وحده انو تلكه اختها ظلت كل يوم تروح لميتم تفتر وتدور عليها لحد ما وره اسبوعين دخلت لميتم وراحت للمديره)
مريم : ألسَلامُ عَلَيِكمُ شلونج ست
المديره : وعليكم السلام الحمد لله شلون اكدر اساعدج عيني
مريم : والله ست اني جاي ادور على اختي احنه اهلنه متوفين وبعدين بالميتم فرقونه وهسه كبرت واجيت داريد اخذها ارجعها يمي صار اكثر من ميتم اروح بلكي الكاها هنا
المديره : ماشي ان شاء الله نلكاها شنو اسمها
مريم : اسمها اسيل عمرها هسه المفروض ١٠ سنوات شعرها ذهبي وهي بيضه عيونها رماديه بشوشه ودائماً تضحك بس اعتقد الي صار اثر عليها (حجت وهي تتذكر شكلها ودموعها تجمعت بعينها)
المديره : حبيبتي عدنه هوايه بنات اسمهم اسيل هسه اجمعهم الج وشوفيها (صاحت لوحده من المربيات وكلتها تجمع البنات)
مريم (طلعت ويه المديره وهي تباوع على البنات صار سبوعين شافت اكثر من ١٠٠ بنيه اسمها اسيل بس ولا وحده منهم جانت هي بس هالمره وكعت عينها على وحده جانت واكفه بعيد عن البنات شعرها جان ذهبي اي بس مكصوص كلش قصير ولادي ووجهها شاحب وعيونها جواها اسود وكلش ضعيفه ومبين مريضه هم بس مريم جذبتها عيونها نفس العيون راحتلها ونزلت لمستواها باوعت بعيونها)
مريم (باستغراب): اسيل!؟
اسيل (باوعتلها ومعرفتها ابتعدت عنها ومحجت شي)
مريم : اسيل اني مريم اختج 😢 نسيتيني هاي شصاير بيج منو هيج سوالج ليش هيج وين شعرج الحلو وين البسمه الحلوه الي بوجهج ليش هيج صايره
اسيل (عرفتها وظلت تبجي بس محجت ولا شي)
مريم (حضنتها): حبيبتي يا عمري حاجيني حياتي
اسيل (ظلت تشهق وهي تبجي بس مكدرت تحجي)
مريم (ابتعدت عنها وباوعتلها): حاجيني اسيل
اسيل (دموعها بعيونها ووجهها صار احمر هزت راسها بمعنى لا)
مريم (باوعت للمديره والمربيات وصاحت بعصبيه): شبيها اختي ليش متحجي ليش هيج صاير بيها شعرها منو كصه ليش هيج ضعيفه ومريضه شنو عبالكم مالها احد
المديره (باوعت للمربيات لان مجانت تدري بتصرفاتهم وصاحت): البنيه شبيها احجوا
(اخذوها للاداره وكلولها الي صار واعترفوا بالي سوو بيها وشلون جانوا يعاقبوها وياذوها واخر مره كصوا شعرها لان جان حلو وطويل فحبوا ياذوها بي والمربيه اعترفت انو جانت تاخذ الفلوس الي يدزوها الها واعتذرت وتريد ترجع الفلوس
مريم : مع الاسف عليكم طفله يتيمه صغيره معرفتوا تكسبوها هيج تعاملوها يعني ليش هي شنو ذنبها والله ماعرف شكوللكم والله ماعرف لشوكت هيج يظل يصير بالعراق هاي تاليها الله اكبر عليكم (باوعت للمديره) اريد اخذها مستحيل اعوفها ولا ثانيه بعد هنا
المديره (سوت الاستماره وانطتها لمريم وقعت على انو هي المسؤوله عن اسيل)
مريم (اخذت الاوراق وطلعت من المكتب وراحت لاسيل لزمت وجهها بين ايديها وباستها على راسها): حبيبتي يله امشي نروح منا عندج غراض تردين تجيبيها
اسيل (هزت راسها لا)
مريم : اوك لعد امشي نروح علمود اشتريلج ملابس جديده واغراض الج ماشي
اسيل (هزت راسها اي وحضنت مريم)
مريم (اخذت اسيل وراحت اشترتلها غراض وملابس يعني اشياء بسيطه بالي بقه من فلوسها الي اشترت بيهن الشقه نوب اخذتها ورجعوا للشقه دخلوا وشوفتها المكان): وباعي هاي الغرفه هنا راح ننام وهناك شوفتج المطبخ والحمام والاستقبال حبيبتي ادري صغير كلش بس شنسوي هذا الي اكدرله
اسيل (حضنتها)
مريم (طبطبت على ظهرها): يا عمري ياصف هسه وصلتي صف رابع مو
اسيل (هزت راسها لا)
مريم : لعد 😕
اسيل😔
مريم : شنو ممدخليج مدرسه
اسيل (هزت راسها اي)
مريم : الله لايوفقهم ليش هيج سوو زين حبيبتي عفيه احجي حاجيني ليش بس تاشرين احجي مشتاقه لصوتج
اسيل (بين عليها متاذيه وهزت راسها بـ لا😢)
مريم : ليش ياعمري زين اوك تردين اسجلج السنه بالمدرسه علمود تداومين من تخلص العطله
اسيل (هزت راسها اي)
مريم : ماشي حياتي يله اذا تعبانه بدلي حتى تنامين
اسيل (لبست هدوم بيت)
مريم : حبيبتي جوعانه
اسيل (هزت راسها اي)
مريم : ماشي راح اسويلج اكل تحبي يله ارتاحي من اكمل اصيحج
مريم (راحت سوت اكل من كملت لكت اسيل كاعده بالاستقبال دتباوع للتلفزيون وملامحها جامده رغم الفقره الي طالعه مضحكه)
مريم : يله اسيل سويت الاكل (جابت الاكل وحطته كدامها)
اسيل (ظلت تباوعلها خافت تاكل)
مريم : اكلي حبيبتي محد ياذيج اني يمج اكلي كله اريد تخلصي
اسيل (بدت تاكل على كيف وشويه شويه لحد ما اكلت طبيعي)
(اكلوا سويه نوب مريم فرشت فراش يم فراشها لاسيل اشترته من اول ما اجت وظمته الها فهسه طلعته اجت اسيل ونامت يمها مريم ظلت كاعده تباوع على اسيل )
اسيل (تقربت على مريم واخذت ايدها وحطتها على راسها)
مريم (افتهمت ابتسمت ومسحت على راسها تذكرت شلون جان شعرها طويل وحلو شلون جانت تلعب بخصلاته كل يوم قبل لاتنومها😢 تمنت لو مطلعتها من ذاك المكان قبل وقت جان هوايه اشياء صارت احسن لو مقاومتهم شويه وباقيه يمها بس تبقى لو)
(مرت فتره مريم اهتمت باسيل وصارت احسن شويه بس بعدها متحجي ويه احد ولاتتقرب لاي احد بس يم مريم ومريم جانت تفكر شتسوي لاختها شلون تساعدها مريم كل يوم تروح للشغل وتعوف اسيل بالبيت قللت من شغلها علمود ترجع بسرعه او تروح ساعتين وترجع ساعه يمها نوب ترجع للشغل تكمل وهيج بس بفد يوم العصر جانو كاعدين واندك الباب)
اسيل (خافت وشبكت مريم)
مريم (محد اجالها من قبل ولا دك الباب عليها ابد هاي اول مره اشرت لاسيل انو تظل هادئه وراحت للباب واسيل مجلبه بظهرها باوعت من الفتحه مال الباب شافت رجال مبين عمره فوك الـ٤٥ حست روحها شايفته): منوو
ياسر : اني الجندي ياسر مريم موجوده
مريم : عمو ياسر😧
اسيل😧
ياسر : اي اني
مريم (فتحت الباب ودخلته للاستقبال)
ياسر : شلونكم
مريم : على الله
ياسر : شلون اشتريتي هاي الشقه
مريم : اشتغلت ٣ سنين ولميت فلوس رغم جانت صعبه عليه بس الله ساعدني
ياسر : عفيه يابنتي والله قويه كدرتي تلكين اختج وترجعيها يمج اسف لان مكدرت اجي طول هالفتره جنت ادز فلوس للميتم عبالي يوصلن الكم بس قبل سبوع من حجتلي المديره الي صار كلت لازم اجي وهي دلتني على المكان
مريم : حتى لو ميهم شكراً لان فكرت بينه شكراً لان ساعدتنه لو ما انت جان هسه احنه ماكو
ياسر : لا عمو صدك تحجين ماكو داعي تشكريني (طلع ظرف وحطه على الميز) هذا انطتنيا المديره
مريم : شنو هذا
ياسر : كالت هاي الفلوس الي جنت ادزهن الكم والمربيه تعتذر واسفه على الي صار
مريم : اسفهم مراح يغير شي بس مراح اخذ هذا الظرف
ياسر : بس هو الكم
مريم : لا عمو ميصير هاي فلوسك
ياسر : بنتي اني عمري خلص ومنو يدري شكد راح اعيش مو زين بعدني لي هسه عايش
مريم : لاعمو لتحجي هيج الله يطول بعمرك
ياسر : تسلمين بنتي اسيل شلونج عمو شلون صرتي
اسيل (محجت شي حطت راسها على كتف مريم)
مريم : حبيبتي اذا تعبانه روحي نامي
اسيل (هزت راسها وراحت)
ياسر : ماكو امل ترجع تحجي؟
مريم : والله ماعرف شسوي😢ماعرف شلون اساعدها
ياسر : اني اعرف دكتور
مريم : بس عمو الدكتور ياخذ هوايه فلوس😔 واني ماكدر يادوب الفلوس دتكفي مصرف حتى مجاي اروح للشغل علمود ابقه يمها هسه وره كم يوم نوب يجيني دوام وماعرف شسوي وين راح اعوفها
ياسر : لا هذا ابن صديقي لتخلين بالج علمود الفلوس سهله اذا تردين باجر نوديها الصبح
مريم : بس ا..
ياسر : ماكو بس تردين باجر نوديها لو مشغوله
مريم : الي تشوفه عمو
ياسر (وقف): خوش لعد يله اني اروح بعد محتاجين شي
مريم : تسلم عمو سلامتك
ياسر : بنتي اذا احتاجيتي شي هذا رقمي واني باجر اجي الصبح علمود اخذكم للطبيب
مريم : ماشي
(راح ياسر ومريم راحت يم اسيل شافتها نايمه خلتها وراحت تحضر العشه علمود تكعدها تاكل
ثاني يوم اجه عليهم ياسر جانو متحضرين وراحوا ويا للدكتور ومن وصلوا)
اسيل (وكفت قبل لاتفوت ولزمت مريم)
مريم (وكفت باوعتلها): ها حبيبتي
اسيل ☹️
مريم : لتخافين حياتي هذا الدكتور راح يساعدج علمود تصيرين احسن علمود ترجعين تحجين ماشي😃
اسيل 😄
(دخلوا للدكتور وسلموا عليه)
حسن (الدكتور): السلام عليكم تفضلوا شلونك عمو
ياسر : الحمد لله ابني هاي اسيل الي حجيتلك عليها واختها مريم
حسن : هلو اسيل شلونج حبيبتي
اسيل🙂
ياسر : اسيل عمو تعاي خل نطلع شويه حتى يحجي عمو الدكتور ويه مريم
اسيل (باوعتله ووجها جامد واشرت لا)
ياسر : زين نطلع نفتر
اسيل (نفس ماهيه واشرت لا)
مريم : حبيبتي بس شويه واني اجيلج
اسيل (ظلت شويه تباوعلها نوب طلعت ويه ياسر وهي ساكته)
حسن (باوع لمريم): مريم انتي اخت اسيل صح
مريم : اي دكتور
حسن : الظاهر انو اسيل فقدت قدرتها على الكلام بسبب شي صارلها اثر بنفسيتها حيل لازم نحدد هالشي حتى نعرف نتعامل وياها اذا تعرفين شنو صار تكدرين تحجيلي حتى اعرف شنو اسوي
مريم : اي طبعاً هو بده كلشي من انهدم بيتنه وتوفوا اهلي وهم يحمونه بقينه جوه الانقاض بالظلام هي من ساعتها كامت تبجي بعدين اجه عمو الله يخلي وطلعونه جابونه لهنا وبالميتم جنت اني منتبهتلها بس وره فتره بعدوني عنها😢 وبقت وحدها فهي استمرت تبجي ومتسمع كلام احد فكاموا يعاقبوها ويحبسوها بالقبو ومرات يضربوها وحتى شعرها كصوا (وحجتله كل الي كالته الها المربيات والمديره)
حسن (انقهر من سمع الي كالته مريم وعيونها مدمعه وهي تحجي انطاها كلينس وطبطب على ظهرها): الله ديختبر صبركم يمهل ولا يهمل
مريم : واحنه صابرين😔 ونعم بالله
حسن : من الي سمعته اسيل ينرادلها عنايه خاصه وتغذيه واكل منتظم وترفيه ولازم متبقه وحدها ونحاول نفرحها ونطلعها من جو الكئابه ولازم يكون يمها ناس علمود تحاورهم لان من انعزلت وكامت متشوف احد نست طريقة الحوار نست شي اسمه كلام فاستغنت عنه بالسكوت راح اهتم بهالشي وان شاء الله ترجع مثل قبل واحسن
مريم : زين اني شنو اكدر اسوي

علقوا وحطوا نجمه علمود اكمل