القدر او الصدفه دائما تلعب دور بحياتنه الي صار انو والدي تخربط وكمت وديته للمستشفى وجنت مخبوصه لانو وحدي وديته لااحد المستشفيات ودخلته وفحصه دكتور وكلي هو يعاني من شي ثاني لان وضعيته موطبيعيه كتله اي صحيح بي حاله نفسيه كلي لعد لازم تودي لدكتور وهو يشوف حالته مع العلم احنا ماعدنا دكتورموجود حالين للحالات النفسيه هسه رح ادزج على دكتوريكتبله دوة لارتفاع الضغط الي عندة كتله اشكرك
دزني على دكتور ودخلت اني والدي والمضمد دخلت كان الدكتور مديباوع علينه مدنك ديكتب خليت والدي على الكرسي والمضمد طلع والدكتور هو مدنك جان يكول تفضلي كتله مرحبا دكتور والدي ارتفع ضغطه اني كملت كلمتي وجان يرفع راسه وجان يباوع عليه ظل صافن واني يس باوعت عليه عرفته من نظراته كتله جمال هو سكت وجان يسوي نفسه ميعرفني ويتعامل ويايه برود كلي تفضلي شنو الموضوع باوع على ابويه وابتسم ابتسامه بااستهزاء واني من شفته مااعرف شصار بيه مثل الفرفحت روحي يعني لو مواعرف نظراته جانت ماعرفت هذا نفسه جمال واتاكدت لان من دزوني كلولي دكتور جمال ولان اول ماسمع صوتي عبالك نتل وبسرعه رفع راسه وبعدين سوة نفسه ممهتم المهم كلي شنو الموضوع سولفتله وكلتله والدي يشرب مهدئات وخاف دتأثر على ضغطه كلي اي وصلت الفكرة بس شنو يحجي معلك ومن ورة خشمه واني ماادري ليش اختنكت لان شفته كل شويه يضحك ضحكه بااستهزاء وطبعا ماقبل يفحص والدي بس كتب راجيته وانطانياها واني كومت والدي وداطلع وجان يكلي بصوت عالي جبل ويا جبل ميتلاكه بس بشر ويابشر يتلاكه والله يامريم بعد ٨سنوات اجيتيني برجلج
وضحك واني خليت وطلعت عالسريع وصعدت تكسي ورجعت للبيت وجنت مو على بعضي ومختنكه وجان عندي فد احساس عبالك باب جهنم وانفتحت عليه ماادري ليش حسيت هيجي كلت بكلبي ياربي دكاترت العراق كله ماشفت الا جمال وذكرت نظرته وضحكت الاستهزاء بس سبحان الي مغيرة صاير حلو بشكل وشخصيه موهذاك نفسه جمال الي مهتلف وضعيف ومبينه العازة عليه
هسه صاير رجال بمعنى الكلمه وصايرة ملامحه قاسيه وحتى نظرات عيونه متغيرة بس الاحساس الي صار عندي من شفته وكلبي الي فرفح عليه عجيب حتى ذكر طاري يوجعلي كلبي ويخلي جسمي كله يرجف ولكن كلامه خوفني حسيت بي تهديد الي معقوله بعدة حاقد عليه
معقوله بعد مرور ٨سنوات بعدة يذكر الي صار
وذكرت من كال لوالدي رح يجي يوم واوكفك انت وبتك كدامي وخليكم تريدولي الرضه ارضه وصدك اجه اليوم الي وكفت كدامه سبحان الله الدنيا شلون تندار بالبشر تنزل ناس وصعد ناس وكلت لنفسي اخ منج مريم لو قابله بجمال من رادج وجان شاريج جان ماضيعتي كل هالسنين بس بعد الي صار صار والماضي ميرجع
واكو شغلات من تروح من يدنه يله نعرف قيمته وبرغم هذا منكدر نعوض الي راح
