بعد ماشفت جمال جددت بداخلي مشاعر ومشت فترة ولكن يوميه تجي نظرات جمال كدامي وبرغم انواني خفت منه لان حسيت مجرد شوفت جمال تهديد
الي المهم انو الدنيا لعبت بينه لعب ولد الخير ندارت بيهم الدنيا فد ديرة والتمت عليهم كل المصايب اليوم الصبح اجانه مبلغ اني جنت بالدوام من رجعت شفت امي وجها اصفر وكامشه كلبها ولمن شفتها هيج كلبي وكع كتلها خير شكو كلولي كامت تعيط دكلي مصايب ابوج الي متخلص كتلها شكو شصاير كالت احنا مصايب ابوج تلاحكنه ضيع الفلوس من ورة اخوته وضيع مستقبلنه وذلنه وهسه تاليتها رح يروح لبيت من يدينا كتلها شكو حجي كامت انطتني ورقه كتلها شكو اخذت الورقه قريتها بعد ماحسيت برجلي كعدت بالكاع والدنيا ظلمت بعد ماباوعت
كدامي طلع ذابين بيتنه ازالة شيوع علااساس انو ابن خالت ابويه عندة حصه بهذا البيت وهو ميت وعندة ورثه والورثه ديطالبون بحقهم والبيت اذا صار أزالة شيوع ينباع بالمحكمه مثل المزاد وينباع برخص التراب يعني مختصر الكلام احنا اكلناها وراحت علينا وهذا السكف الي جان حامينه راح بعد ماعدنا شي واني هسه متحمله امي وابويه الي منتهي الي ميعرف بالدنيا شكو ماكو
كلشي ميدري واخويه الولد الي مدلل والي طالعه عينه من كثرت الدلال واحنا ماعدنا احد يساعدنا ومتاكدة خواتي رح يتهزمن لان اكيد رياجيلهم ميقبلون يستضيفونه واحنا طحنه بيها وطين براسج مريم صدك هالمرة راح الاول والتالي وظلينه منعرف شنسوي لحد يوم المحكمه بس كدرنا نبيع الغراص لان سئلنا شنو الي نكدر نسوي علمود البيت كالو مدكدرون بس تروحون زايدون على البيت وتشترون الحصص واحنا ماعدنا يدوب عيشتنه المهم بفلوس الغراض اجرت بيت والحصه الي اخذتها من حصتنه بالبيت كلت افتح بيها محل لااخويه مال غذائيه وكلت كلش كلش اروح اني اكعد بالمحل شيسوي لان هسه عدنا ايجار وعيشه وادويه مال ابويه
والله العظيم كلما اصفن اكول ليش يادنيا معقوله هيجي تنزلينه هالنزله شنو الي سويناه حتى ننظلم من الدنيا هلظلم واني تعبت وهسه اهلي ماعدهم احد بس اني اذا اني تخليت عندهم معناتها هما يكومون يجدون بالشارع وبرغم كلشي
جنت اكول هذا ابتلاء من رب العالمين يجوز ديريد يخابر صبري وهم اكول الحمدلله والشكر كل الي يقسمنه بي ربنا نعمه لااعتراض على حكمك ربي
