بعد ماطلع جمال من حياتي ماشفته ومرت فترة تغيرت هوايه امور بحياتي وللاسف تغيرت للااسوء
الي صار انو والدي كان من محبين السفر وجان هوايه يسافر بسبب وبدون سبب وكان يترك شغله بيد اخوته وفترة عن فترة تجارت والدي ضعفت كلش وفلوسه قلت و الي صار انو اخوته شافو مال سايب وابويه ماعندة ولد جبير يكمش ظهرة وهو مكضيهه سفر فكامو يبوكون والدي ولمن يجي يسئلهم يكلوله ماكو شغل وهو بالبدايه مجان يصور انو اخوته يبوكو وتاهت السالفه لحد ماادمر والدي وخسر الاول والتالي وبقه بس البيت الي ساكنين بي وبهاي الفترة ايضا
واختي الي اكبر مني ازوجت واحد واخذها وعاشو بالكويت وبقيت اني وامي والدي واخويه الصغير
ولكن والدي متعلم على الخير ومتعلم على الصرف وفجاءا كعد ولكه يدة والكاع تعبت نفسيته كلش وصارت بي حاله نفسيه وكام ميطلع من البيت يكول العالم يضحكون عليه لوكام يتخيل شغلات وفترة طويله ظل عايش على المهدئات
وبهاي الفترة اجه احد اقربائنه بس من بعيد اتقدملي جان مستوة جيد تقريبا مثل مستوانه المادي سابقا وصراحه اني متعلمه على نمط حياة مختلفه ومتعلمه على حياة مرفه فواقت برغم انو مجنت اشوف بي زوج ولا كلبي جان يرفله ابد بس وافقت عليه وبعد فترة ازوجنه وسكنت ويا بيت اهله واكتشفت بي انو هو انسان تافه وسطحي وعديم الشخصيه واهله يحركو مثل ميريدون وجان بس يحاول يفرض شخصيته عليه وكان يريد يشوف نفسه رجال على حسابي واني ماجنت من النساء الضعيفات جنت قويه وجنت اتحدا هو و اهله في بعض الاحيان وكامت مشاكلنه تتفاقم ويوم عن يوم تكبر وزيد وكمت اكتشف انو هو عندة علاقات بنساء وجان يصرف عليهن والي جان يعرفهن نساء منحطات اخلاقين
وصلت لمرحله كرهته وكمت مااتقبل وجودة مااتحمل يلمسني و جان قربه يخليني اقرف منه والحمدلله انو اني صرت ذكيه من البدايه وماقبلت يكون عندي منه اطفال وفعلا اني وصلت وياه لمرحله بعد مااتحمله ولكن ظليت وياة ثلاث سنوات وبعدين طلكت منه ورجعت لبيت اهلي ولكن بيت اهلي وضعهم وظروفهم كلش تعبانه واني اول مااجيت جنت جايبه الذهب ويايه مال عرسي رحت بعته وسوكت ونظفتلهم ورتب الوضعيه بالفلوس الي عندي وللاسف خواتي كلمن ملتهيه بيتها وبجهالها وناسين انو هم عدهم ام واب واخ صغير للاسف الناس متفكر بس بنفسها وبراحتها وجانن كل اسبوعين تلاثه يجن مرة وحدة وحالهن حال الغريبات ويكعدن شويه ويكومن يروحن كلمن لبيتها
اما اني من بعد ماطلكت ورجعت لبيت اهلي وشفت وضعنه هيجي تعبان كلت لازم اشتغل وفعلا بعد معانات طويله كدرت اشتغل معلمه بمدرسه قريبه منه
بس جنت افكر واكول سبحان الله صدك يكلك الي يوكع محد يشيله كل الي جانو داير مدايرنه ويتلكلكونه ويريدونه بس نباوع بوجهم هسه كامو يجنبونه ويخافون نطلب منهم شي
واني لواموت مااتنازل لواحد من هذوله الي كشفت وجهم الحقيقي وكشفت حقيقتهم
بس جنت احمد الله واشكرة واكول همزين عدنا هذا البيت الي ملتمين جوة سكفه ومشت الايام واخويه شويه كبر بس اخويه ابن دلال والدتي مامقصرة عليه احنا ماعدنا ونشدالراس بالراس وهي تروح تشتريله واجيبله وداري فحتى لمن كبر مومال واحد يعتمد عليه على كولتهم ابن امه عود لان والدتي جايبته على اربع بنات اما والدي تقريبا فاقد
بغير دنيه ينطو هاي الادويه ترخي اعصابه ويظل بس يباوع بعيونه لو نايم لودورات يريد يطلع من البيت واحنا نلزمه واني اداوم بالمدرسه ومكضين يومنه صارلي ثلاث سنوات من اطلكت اجوي خطبوني بس مجنت اريد ازوج
ولمن اذكرت الزواج اذكرت جمال وذكرت قبل كم سنه مرت
وطلعت للحديقه مالتنه الي ورة البيت وكفت بنفس المكان الي جنه انا وجمال نتلاكه بي قبل ٨سنوات جنة هنا نكعد ونضحك ونسولف اوف ايام وتمنيت اعرف اخبار جمال وجنت اريد اشوف وين صفه بي الدهر
