جنت اكول هذا ابتلاء رب العالمين يريد يختبر صبري
وقوت يماني بس جنت اخاف من الجاي خفت لاتجيني صدمه لخ وهدورة اروح بيها وجنت اكول الله كريم مرح يتخلنه عنه
(الماضي يعاقبني)
بعد تقريبا اسبوعين من روحت والدي للمستشفى وشوفت جمال جنت بالمدرسه بالدوام طبعا اني معلمه مال لغه انكليزيه جنت بالصف واجتي معلمه ويايه كلتلي ست مريم اكو واحد اجه عليج كتلها منو كالت والله مااعرف موجود بالادارة كتلها اوكفي بمكاني علما اروح واجي
كالت ميخالف رحت وصلت للادارة وجان اشوف جمال كاعد وجهي كام ينطي الوان اول مادخلت وجان دكول المديرة شو ماكلتي اني مخطوبه لدكتور ولو مو دكتور جمال اجاي عليج لان عندكم شغله جان ماعرفنه انتي مخطوبه حتى حلقه ملابسه شنو تخافين من الحسد واني من الصدمه لساني نعكد مكدرت اجاوب وهو يباوعلي ويضحك بخباثه ونظراته معناتها
يعني ها شوفي الموقف الي خليتج بي
عد المديرة ظلت تباوع علينه ردت اكسر الموقف كتله ها جمال شكو شصاير كال ماكو شي بس دنجهز لعرسنه وانتي تعرفين اني مستعجل لان ورايه سفر
طبعا هو يحجي واني فاتحه حلكي ومااعرف شسوي والمديرة والمعاونه كلهم يباوعون علينا عبالك احنا فلم بسينما عد ندار على المديرة كللها ست اكدر اخذ مريومه
ويايه كالتله اي اكيد دكتور وجان دكله ان شاءالله انمرلك للعيادة اني وامي كللها اهلا وسهلا بيج ست بااي وقت واني مصدومه بس افر بااذاني مجنت اعرف شنو الموضوع جان بجرني من يدي وكلي جيبي الجنطه مالتج واني مثل الرجل الألي رحت جبتها واجيت وطلعت من المدرسه عد اذكرت انو جمال بااي حق يتصرف هيج ويايه
وكلتله انت شنو الي سويته وشلون دكللهم اني خطيبتك جان يكلي وانتي اطولين اصيرين خطيبتي والله انتي مريضه مثل ابوج يرادلكم علاج كتله شنو الي سويته لعد جوة ولويش هيج اجيت حجيت كلي عجبني اسوي هيج حتى بعد ينعرف عليج انتي مخطوبه وبعد محد يتقدملج
وجان كل شويه يضحك كتله وانت شعليك اذا ازوج ولا لا
كلي هيج اخبث كتله لويش كلي وانتي نسيتي الماضي اني من يوم الي طلعت من بيتكم ومن يوم الي نهانيت منج ومن ابوج وشلون رفضتيني وشلون هذا ابوج الي صار مخبل هسه وكف والدي والدتي وكسر عينهم وحجه عليهم من هذاك اليوم افكر شلون انتقم منج ومن ابوج وهسه اصور الوقت حان حتى اخذ حقي كتله انت ماعندك حق عندي ولا عند ابويه كال ابوج اي ممكن ماعندي شي وياة لان الدنيا ماقصرت بي
والفلوس الي جان يتصور يكدر يشتري العالم بية خسرها وراحت واخوته الي جان يثق بيهم باكو وتاليته
تخبل خطيه خاف عبالج مااعرف اخبارج ترة كل اخباركم اعرفها واعرفها اول بااول وكلش زين واعرف بيج ازوجتي واحد فاشل عايش ويا ماما وبابا ويصرفون عليه وعندة علاقات بنسوان موزينات وبعدين اطلكتي ولو هو جان لايكلج
شكلك مثلك بس يله الله يريد يرجعج لبيت اهلج حتى اني اخذ حقي منج كلتله مو من حقك انت تحاسبني على شي كلي والله مومن حقي سنتين توهميني بحبج واني كمت اعبدج واريدج ومااصدك اشوفج ودكليلي مومن حقي مومن حقي من خليت امي وابويه ينهانون بسببج وظل والدي فترة طويله مقاطعني ميحجي ويايه مومن حقي مو كتله اي مومن حقك اني ماكلتلك فديوم اني احبك كلي بس انتي جنتي تعرفين اني احبج وتعرفين اني اتنفسج بدال الهوا
واني متيم بيج ورغم هذا ماكلتيلي ومن كلتلج اخطبج مارفضتي وخلتيني بموقف المهان ولذليل ليش سويتي هيج لان اني بنت المراة الي تشتغل يمكم لان اني فقير
مصورتج انتي هيجي تافة وسطحيه وتفكيرج مادي
اصورتج انسانه مختلفة عن اهلج طلعتي مثلهم وحوش مال فلوس وتاليتكم خسرتوها من طمعكم وشجعكم هذا الي يتباها لان الملك لله
ورغم هذا اني اشكرج على شي واحد كتله شنوة كلي انتي انطيتيني الحافز الي يخليني اتغلب على قدراتي والي خلاني اشتغل وادرس واحقق الشين الي جنت اطمحلهم الفلوس والشهادة والي انتي هسه اثنينهن فاقدتهن عود خلي يفيدوج الطلاب مالتج من اجي اشمركم بالشارع واخليج تجين تبوسين يدي انتي وابوج وارد اعتبار اهلي
واعتباري جنت من اكول هيجي جانت امي تلومني ادكلي لاابني لتحجي هيج الانتقام مرض بس للاسف كرهي الكم تغلغل بمسامي
اني ظليت ساكته ومجاوبت وظلت عيونه مخوركه ظل يباوع عليه وصوته صار ناصي
كلي ليش مريم ليش كسرتي شعوري ليش حولتيني لاانسان قاسي مافديوم رحتي عن بالي بس الجرح الي خليتي بكلبي هوايه اكبر من حبي الج
