صحت شرف و لقتْ نفسها مُغطيه بي ملايه بس ، دي الحاجه الوحيده البتسترها ~
كانتْ مُنهاره و رآسا عايز ينفجر من الصداع ، أول ما وعتْ لي الحصل ليها ده بدت تبكي تاني و هي شايفه هدوما مجدوعه بعيد .. زحفت علي ركبتا عشان تاخدهم سريع و تبدآ تلبسهم ~
و مع إنتهاءها جه ماهر داخل الأوضه و هي طوالي إستلمتو بالصراخ و الكواريك :
" يا حقير يا وقح يا كلب ، لي ما كتلتني و ريّحتني من الدنيا دي ليه ؟؟ خلّيتني ميته بمشي علي رجلين "
حاول يهديها :
" شرف .. ما تزعلي مِنّـ .. "
قاطعتو :
" ما تنطق إسمي ده علي لسانك .. أسكت هوش "
بقتْ تفتّش بي عيونا :
" وينو تلفوني .. وينا حاجاتي !! "
لقتْ شنطتا في الركن ، مشتْ عليها عشان تعلّقا في كتفا و تطلع ..
أوّل ما وصلتْ لي البوّابه الخارجيّه جه ماهر سريع و طلّع المفاتيح فتح ليها الباب .. ما إتلفتتْ عليو خالص ، و هربتْ بي خطىً سريعه من المكان ده و لكن ..
بعد فوآت الأوان !!
المشي بالنسبه ليها كان صعب و الأصعب منّو هو الإحساس الحاسه بيهو جوَّاها ، كأنّو قلبها بتقطع و عيونها بتذرف الدم عليو ، مشتْ جمب الحيط و المحلات المقفوله و هي ما عندها الجرأه تعاين حوالينا | فجأه كانت حتغمر و تقع ، إلّا إستندتْ على الحيطه و إستعادتْ قليل من قوّتها المنهكه ، إتجاهلتْ رنين تلفونا المتواصل و كمّلتْ خطواتها لي البيت ~
و هناك أوّل ما وصلتْ و رمت حاجاتا خشّت الحمام على طول عشان تستفرغ و بعدها تآخد دوش طويل , و تطلع علي أوضتا ، دموعها و حُرقتها لسه ما وقفو - قامتْ دارتْ نفسها باللحاف اللي كان بي مثابة صيوان لي عزاها ~
فجأه النور بتاع الأوضه ولّع و سمعتْ صوت أمها بتقول ليها :
" شرف .. إنتي متين جيتي أصلو و إتمدمتي كده !! "
البت ما حرّكت ساكن و حتى كتمت أنفاسا لغاية ما أمها طفت النور و طلعتْ و هي فاكراها نايمه ..
بس شرف مآ غمض ليها جفن إلا مع الفجريه ~ من فرط التعب و الضغط و رغبتا في الهروب من الواقع الأليم الإنكتب ليها ..
مرت تلاته أيام ما طلعتْ فيها من البيت ولا حتّى من غرفتا ، حتّى أمها شكّتْ إنّو الموضوع يكون مجرد عيا عادي زي ما بتّها قالت ليها , بس فضلت تسكت و تخلّيها علي راحتا ..
و في البوتيك ~ جات زبونه تفتّش في الهدوم .. و رفعت يدها لي ماهر تقول ليو :
" لو سمحت "
هو أشّر بي يدو لي لنى نظام تقوم تمشي ليها .. و البت قامتْ سريع علي الزبونه اللي سألتا :
" عايني موش كان في واحده شغّاله هنا و طيبه خلاص إسمها يظهر لي شرف "
لنى قالت ليها :
" آي آي شرف "
" آها فاتت وين دي !! "
" لي يا مدام !! يعني طالبه منّها حاجه مُعيّنه أو عايزه تشتكي منّها و كده ؟ "
" لالالا خالص _ أقول ليكي البت طيبه و أخلاقا جميله , أنا بس زبونتا "
" آها .. شرف دي أخدتْ ليها إجازه مفتوحه لأنّو عندها ظروف عائليه .. و حترجع في أقرب فرصه .. بس أنا موجوده ممكن أفيدك بي أي شي "
" لا لا شكراً .. حجيها مره تانيه "
و فاتتْ طلعتْ !!
لنى إتغاظت و مشت لي ماهر عشان تقول ليو :
" و بعدين يعني !! دي ما حاله دي ، تالت زبونه تسأل من شرف و تطلع من غير ما تشتري حاجه .. و البت دي آنا ضربت ليها زي ستين مره بس أبت ترد "
ماهر إبتسم و قال ليها :
" خليها علي راحتا و ما تديها قيمه .. هي كده كده حترجع تاني "
.
يتبع....
