هاله: بطريق الرجعه گتله هسه يحجون عليه لان كلش اتأخرت هاي اول مره بحياتي اتأخر برا البيت الى التسعه ونص وحدي محمد: هاله وحدج شنو مو اني وياج ثانيا ليش ايرزلوج قابل طالعه ويا صاحبج اني عاقد عليج يعني انت مرتي لتخافين اني انزل وياج .....وصلنا للبيت دخل محمد ويايه حتى محد يحجي عليه من دكيت الباب شافني مخبوصه محمد:لج انت شكد جبانه راح ابقى يمكم لليل يله اعوفج حتى بعد محد يكدر يحجي او يعترض هاله:دخلنا كعد ويا ابويه وفراس ابويه گلي كدامه شو اتأخرتوا جاوبه محمد والله عمو هي گلتلي اريد ارجع بس اني اخرتها گتلها ماخذ اذن من عمو (فشله) وبقى يبسمرهم خلال الكلام وضحلهم هو ولي امري صار .....من ديروح گلي اني ردت اوصل لاهلج بعد محد يعترض ويفتهمون امرج صارت يمي لتخافين حبيبتي محد يكدر يضوجج بعد جاوبته ادري محمد :يله حبيبتي اني اروح .....سألتني باجر اشوفك جاوبتها اذا صارلي مجال امرلكم فد ساعه بس اشوفج لان ارجع متأخر من المعمل جاوبتني براحتك لتضغط على نفسك هاله:اريد ابقى يوميه اشوفه والتهي وياه الى ان انسى سيف اليوم حسيت محمد قريب عليه بس كصديق او شخص ارتاحيتله واحس بالامان وياه لان كلمته هي الي تمشي فوك كلمة اهلي وهو يسوي الشي الي يريحني ولو هم اهلي رايدلهم واحد مثل محمد گوي حتى يحسبوله حساب مثل رجل سرى لان صلف وميمشي بلي يريدوا خلاهم يحسبوله حساب ويتكفون شره ميدخلون بحياة سرى الي يريده رجلها هو الي يصير ورا مراح محمد وصعدنا للغرفه بقيت احجي لهند كل الي مريت بي اليوم هند:هاله والله هذا محمد دره لج لتصيرين غبيه وتضيعي من ايدج الولد يحبج وبس يريد يرضيج ويقربج منه حتى تبادلي نفس المشاعر هاله:هند اني اليوم طول ما هو كدامي ميجي سيف على بالي بس ابقى وحدي اكوم افكر بي بس من احس على نفسي استغفر واحاول افكر بمحمد واشغل روحي بكلامه وتصرفاته ان شاء الله يكدر يدخل قلبي ويخليني اتعلق بي لان اليوم كلش جنت مرتاحه ويا من كعدنا نسولف..... وحبيت صفة الاهتمام الي بي لان طبعه ابو بيت شفته من متسوگ حتى حليب لابن اخو جايب وطلعت دلال (مرت ماهر )مموصيته بس هو متذكر لان هو الي يجيب غراض البيت كلها ويعتمدون عليه بكلشي هند:من حجي هاله حسيتها متعرف هي شتريد بالضبط تتخيل نفسها تحب سيف وهي من اول يوم بقت بيها ويا محمد اخذ اهتمامها بس بداخلها عناد متريد تعترف هي تريد حياتها ويا محمد تستمر وتريد هالشخص لان الوسواس براسها يقنعها هي تحب سيف ويمكن تحبه صح بس هالحب مابي اي امل بعد انتهى قبل ما يبدي راح ابقى وراها الى ان تكف عن التفكير بسيف وتحب رجلها هاله :ثاني يوم مشفت محمد رجعت ريمه لعادتها القديمه رجعت افكر بسيف ومشتاقه اشوفه بس من احس على الغلط الي دا اسوي بحق محمد ابقى ادعي يطلع سيف من قلبي ومن عقلي ما اريد افكر بي يا اللهي صارت عندي حاله اكو وسواس بداخلي يحرضني احجي لمحمد اني احب غيره ومااكدر اكون اله زوجه لو من افكر اني خلص بعد ايام اتزوج واروح لبيته ابقى ابچي واقرر افركش الشغله بأي طريقه بس من اصلي واستغفر احس رب العالمين يرجعني لعقلي واتذكر سيف ما منه أمل حتى اخرب حياتي ويا انسان ميستاهل مني غير الحب والتقدير لان ثبتلي حبه من قبل حتى ما اتعرف عليه سيف اني حبيته هو ما بادلني اي مشاعر اني اتخيلت هالمشاعر وقشمرت روحي لازم اشيله من راسي قبل دخلته بدماغي وقلبي لان جنت اشوفه واحجي وياه هسه ما طول بعد ما اشوفه لازم انساه ورا يومين اتصل محمد على بيتنا صاحوني جنت بالحمام گتلهم اخلص واتصل عليه من طلعت من الحمام اتصلت عليه الو محمد :نعيما قلب هاله:شكرا شلونك محمد:مراح انكضيها على التلفون اريد امر اشوفج هسه هاله:محمد خلي اسألهم هسه اجيك .......رحت سألت اهلي گلولي خلي يجي رجعت الو يله تعال انتظرك محمد: هسه جاي تريدين اجيبلج شي ويايه هاله:لا سلامتك محمد :يله حبيبتي مع السلامه مؤقتا هاله :صعدت للغرفه بدلت نفنوف ابيض ونيلي اقلام سويت شعري ذيل مخليت مكياج لان ميحبه يحب وجهي على طبيعته جنت فرحانه لان اريد اشوفه حتى ينسيني سيف ولان ويا احس نفسي قويه عندي سند واحد واگف بظهري نزلت بقيت انتظره بالحديقه من سمعت صوت السياره فتحت الباب واشوف سيف كبالي كاعد بالسياره دكات قلبي موگفت بين شوق ومشاعر حب صحت اول ما شفته بين خوف لان محمد راح يجي واخاف يحس عليه بوست ام سيف سيف :ولج هاله شو كاطعه يا بذاته ليش متجين ويا اهلج لو ملتهيه ويا الخطيب ونسيتينا على الخير سمعت بالخطوبه ان شاء الله نخلص من زمن هم هاله: من سمعت كلامه متت قهر بالگوه حبست دموعي لان اني احبه وهو مو يمه ولا حاس وديحجي مبتسم وفرحان واني دا اموت بداخلي بس جاوبته گتله والله ملتهيه ويا محمد دنرتب الامور ان شاء الله اجي ويا اهلي مره لخ بس بداخلي خلص ما اوصل بيتهم بعد دخلت امه يم امي من حسيت راح ابچي دخلت للحمام بجيت لحد ما ارتاحيت غسلت وجهي وصعدت خليت مكياج حتى ما ميبين جنت ابچي وواذا احد حس اتحجج بالكحله دتأذي عيني ....نزلت لگيت محمد كاعد بالهول وحده جان احساسي من شفته ردت ابچي بحضنه لان اعرف هو الوحيد الي يهتم اذا يشوفني مقهوره وراح يخفف عني بس الي صار كرد فعل للي اني بي من وكف وابتسملي رحت حضنته وبدون وعي گتله اشتاقيتلك بس مجان اشتياق لحبيب اشتياق للراحه والطمأنينه محمد : حضنتها فرحان لان متوقعت راح تاخذ عليه بهالسرعه وتشتاقلي جاوبتها اني مشتاقلج اكثر حبيبتي
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
