گمرة

١

اقبال : يمه زينه كومي ساعديني بلبيت كبل لايجي ابوج اني اغسل الحوش وانتي لملمي غرفة ابوج بساع يمه
زينة: اي يمه عيوني الج تدللي
شوكت يكبرن خواتي الصغار ويساعدنني تعبت بلا هجوره
اقبال: يمه ادعيلها الله يسعدها ببيت رجلها هذا مصيرجن يايمه تتزوجن وتطلعن من بيت ابوجن
كون ربي تشوفني بناتي كلهن مسعدات ومهنايات ببيت رجولتهن
زينة: يمه اني لاتدعيلي بلزواج ماريد
اقبال : لايمه لاتكولين هيج الزواج استقرار وسنة الحياة وستر يمه
زينه : يمه لاتزعلين علي اخاف يجيني واحد مثل ابوي ليل نهار تخدمي وماراضي
اقبال : يمه ولج سكتي لايسمعج يمه مابيها شي الرجال اله هيبته واحترامه وهو الله يعينه يتعب بالكاع يايمه واجب علينا نشكره ونتحمل عصبيته يايمه ايوج هذا
زينه: والله يايمه ماشفت مثلج شكد متحمله وكل هذا ومايوم صغرتي بقيمة ابوي بعيننا
ابو زينه: اقبال.. اقبال .. وينج
اقبال بسرعه فزت من مكانها وتلكت زوجها
ها ياعيوني هلا بطلتك الله يساعدك ويكوي حيلك
ابو زينه : ويكويج حضرتي الحمام
اقبال : حاضر يا ماي عيني تفضل
ودخلت اقبال تليف لزوجها وطلعت ركض صبتله الغده وكعدت جوه رجلي خاف يحتاج شي
ابو زينه : اليوم يجون امي ونسوان اخوي يسيرون علينا حضري عشا زين الهم
اقبال : غالين ويدللون عين غطا وعين فراش
وللعصر واجوي ومايوم جونا اذا ماسممو امي بحجيهم وصنفوها هيه وبناتها تصنيف
بيبي : شلونج ياام البنات (تقصد امي لان امي عدها بس اني وخواتي ٣ وماصار عدها ولد وخطيه هيه تجيب عمليات والطبيبه منعتها انو تفكر تجيب طفل بعد لان خطر على حياتها لان حبيبتي جانت ناعمه حيل)
اقبال: مية هلا بيج عمه نورتونا
مرت عمي الجببر : شني هاهيه بطلتو ماتريدين خلفه بعد؟؟
اقبال: ياريت بس الامر بيد رب العالمين والطبيبة كالت خطر على حياتي
مرت عمي الثاني : يااا سوده عليه ظليتي بحسرة الولد واني كل مااحبل ويجيني ولد سطرتهم ٥ والرجال مايشبع يريد بعد يله الله يرزقج عاد البنات عووووع اموت من خلفتهم
اقبال بحزن : الحمدلله كله نعمه من رب العالمين غيرنا مالاكيها وشبيهم البنات شحلاهم مالين علينا البيت بحنيتهم ويساعدوني هواي وشايلات ابوهم بالصلوات
بيبي : مانريد صلوات نريد وليد يشيل الاسم حبيبة يله المهم هاي قسمته شنسوي
اقبال نزلت راسها ودمعتها لمعت بعينها : اكوم اصب العشا عمه من رخصتكم
وتعشو سم الهاري وراحو واخذو شرهم
بالليل نايمين وسمعت امي تبجي وعلا صوتها شويه اسمعها تكول حرام عليكم هذا امر الله ياناس
ووراها اسمع ابوي كاملها دك رزايل وضرب
- اذا عليتي صوتج بعد الا اطردج بالشارع انتي وبناتج ادبسز
احنا ركضنا عليهم وامي كامت حضنتنا وطلعتنا مارادت يصير شي كدامنا
الصبح اول ماسمعت امي كاعده فزيت وركصت حضنتها
يمه بالي يمج الليل بطوله مانمت كون اذاج ابوي
لايمه لا ابوج ماياذيني هاي زعلت حبايب يمه لاتفكرون انتي وخواتج
بس اني اشوف وجهها بي اثار ضرب وايدها هم
سوده عليه شبيدي ياريت لو جنت ولد واخلصج من هلعذاب
وره كم يوم جانت يمنا بيبيتي وفجأة سمعنا هلاهل
الام: يمه مبروك مريتك حامل
ابو زينه : ياربي ولد هلمره
اني وخواتي كلنا امين وتخلص امنا من هلذله
مرت اشهر الحمل على امي بصعوبه ضعفت حيل وثكلت وضغطها يصعد وتتخربط ذبلت سوده عليه وكلما تروح تراجع الطبيبه ترزلها وتكولها اني حذرتج ماتحبلين بعد
وصلت امي لشهر السابع ورادت تموت من الاوجاع والثكل وورمت حيل وبيوم اسود وتعيس واسوء يوم مر علي امي جانت تغسل هدوم وفجأة عاطت حيل وركضنا عليها
يمه يمه شبيج يمه وهيه صاكة سنونها وعاطت مره لخ روحو لابوكم عندي ولاده
ركضنا على ابوي واستغرب كال اني اذكر هيه بلسابع يله لاحككم
ركض ابوي وكلنا وياه ووديناها للمشفى وانخبصو بيها الممرضات وجتي الدكتوره وبعصبيه اخذتها بسرعه غرفة العمليات طولت ساعه ساعتين وننتظر وماكو خبر اخر شي طلعت الدكتوره كالت الطفله نقذناها بس الام جانت حالتها خطره حيل البقاء لله
ماجنت اصدك بوكتها من كالت هيج الطبيبه كلت هاي تريد تخوفنا لو خاف تشاقينا بس لا هاي المواضيع ماتحمل شقه واباوع داير مدايري خواتي يبجن ابوي كعد بالكاع ومخلي راسه بين رجلي واني مصدومه حيل حتى ماكدرت انزل دمعه ظليت بس اصرخ حدما راح صوتي بس خلص بعد مايفيد
راحت شمعة البيت
راحت ام كلب الطيب
ام ضحكه وكلمة الحلوه
الصبورهً الخلوقه
رحمة الله على روحج يايمه بس جا غير تاخذين بناتج وياج وانوب صرنا خمسه منو النا ياربي اصلا اهل ابوي مايردونا ميتين ع الولد حد ما موتو امي
من طلعت ارواحهم انشالله وكون يبجون دم بكد ترابها
من وره هاليوم وغابت الضحكة من بيتنا صار كئيب اظلم موحش مابي روح
اني وخواتي ظلينا نداري ابوي ونحاول نسد فراغ امنا بس مستحيل نوصللها مستحيل

By: sahar hameed