گمرة

٨

ثاني يوم الصبح كمره كعدت متاخره جان حمدي بلدوام وام حمدي تخبز
كمرة حجت لخالتها وكالتلها توصل لحمدي انو كمره موافقه ومستحيل تلكه مثلك
ام حمدي فرحت هواي بس بينها وبين نفسها شالت هم لعمام حمدي خاف يرفضون انتظرت يرجع حمدي وتشوف شناوي يسوي
بعد الغداء ...
حمدي وام حمدي يشربون الحاي وكمره راحت سوت نفسها تريد تنام حتى ياخذون راحتهم
ام حمدي: يمه عندي الك بشاره
حمدي : يا الله
ام حمدي: يمه كمره وافقت
حمدي فرح حيل والدنيا ماساعته : صدك يمه ؟! يمه شكالتلج يعني ؟
ام حمدي: يمه موافقه وخلص وتكول وين الكه احسن من حمدي واخيرا يابعد روحي افرح بيك واشوف جهالك انشالله بس يمه وعمامك شلون
حمدي: يمه ماظل عدهم بنات بناتهم تزوجن وماالي شغل بيهم انه اعقد على كمره واتزوجها ياله انطيهم خبر
ام حمدي : لايمه شلون حجي هاذ يمه روحلهم وان عارضوك عود سوي الي براسك ومحد يلومك
حمدي : ماشي هسه اروحلهم لعد
....
حمدي بييت عمه الجبير
- عمي انه نويت ازوج امي تعبت وينرادلها مره وياها
العم: ها مو شكلنالك ياحمدي من الاول انت مارضيت وهسه ماعدنا بنات ننطيك
حمدي : لاعمي انه لكيت المره يتيمه وامي ترتاحلها هواي وماالكه افضل منها تخدم امي
زوجه العم: اي هاي ام عيون الصفر والله جنت حاسه تريد تصيدك
حمدي : عمه مااسمحلج هذي صارت عرضي وانه طول عمري حاسبها اختي وهيه ماتصيحلي غير خويه بس فكرت بيها تنفع زوجه شريفه وطيبه ومداريه امي شريد اكثر
ع العموم انه حبيت انطيكم خبر وماراح اسوي عرس والخميس الجاي اعقد عليها تحبون تشرفونا اهلا وسهلا
في امان الله ...
رجع حمدي مرتاح العلي سواه وان اجو وان مااجو هو مامحتاجلهم
بالليل رجع حمدي اول مافتح الباب صادفته كمره بس شافته انهزمت للغرفه مستحيه
حمدي ابتسم بداخله : يمه يمه
ام حمدي : هلا بوليدي العريس
حمدي : ههههه اشكرج يمه
يمه هاهيه بلغت عمامي ومادري يجون لا العليه بلغتهم
ام حمدي : يمه بارك الله بيك لعد من باجر تاخذنا للسوك نجهز العروس يمته قررت تعقد
حمدي : يمه الخميس خير البر عاجله واليوم ثنين تلحكين انشالله وراح اوصي صديقي بلكت يحصلي غرفه نظيفه مناسبه
ام حمدي : براحتك يايمه
حمدي : يمه منا للخميس ماراح ابات بالبيت احس كمره تنحرج مني وحتى بالنهار احاول مااتواجد هواي
ام حمدي : يمه بارك الله بيك ماضاعت تربيتي
حمدي باس راسها : يمه اتمدد ساعه وكعديني اطلع علمود الغرفه ...
وبدت تحضيرات العرس وانخبصو كمره وحمدي وام حمدي وفرحانين حيل واجه الخميس
ذبح حمدي ذبيحه وطبخو للمعازيم عمامه مااجوي عدا عمته وزوجها جانت تحبهم
والجوارين معارف ام حمدي هم حضرو
كمره جانت فرحانه حيل وبنفس الوقت تتمنى لو جان وياهه اهلها وامها وخواتها بهيج يوم
عقدو للعرسان وزفو العريس لعروسته
دخل حمدي وكمره مثل الكمر المنور كاعد ع السرير ودموعها تجري بخدها
حمدي كعد يم رجليها : مبارك علينا يابت كلبي
كمره بخجل : الله يبارك بيك ويمكنني من سعادتك
حمدي : لالالا كمره مااقبل بدموعج ليش تبجين
كمره تبجي : اتمنيت امي وخواتي وياي اليوم
حمدي : كمره انه امج وابوج وخواتج وكلشي التردين اصيرلج
كومي حبيبة كومي نصلي ركعتين لوجه الله حتى يبارك بحياتنا ويخلي السعاده مرافكتنا دوم
كمره : صار كايمه ..
جان احلى يوم بحياتهم كمره تحس الدنيا ضحكتلها والله عوضها بحضن كله حنيه وحب ورحمه بيها
وظهر قوي تستند علي وماتخاف
واثبات لشرفها وانو هيه بريئة من كل تهمه بحقها
ومرت الايام بييت حمدي بسعاده وام حمدي فرحانه بكمره وحمدي حيل
مرت سنه على الزواج بس بدون اطفال شكد حاولو بس الله ماراد
حمدي وام حمدي جانو يتمنون بس ماضوجو كمره ولاجرحو شعورها
كمره بدت تنقهر وتتنمى تفرحهم وهلشي جان يحزنها حيل
وبيوم زارهم  عمام حمدي زياره مفاجئة
العم : حمدي شوكت نشوف حهالهم مو جنكم طولتوها
حمدي : من الله يأذن عمي وانه مامستعجل ع الخلفه
العم : هااا يله الله يرزقكم
المهم حمدي انه جايك بموضوع وانت اكيد ماراح تردني
حمدي: اامرني عمي الي اكدر علي مااقصر
العم : بت عمك نسرين تطلكت من زوجها
حمدي : لا اله الا الله ابغض الحلال
العم : هاي هيه شتسوي قسمتها
حمدي : الله يعوضها المطلوب مني شنو
العم : هاي بت عمك وعرضك وماالها غيرك تاخذها وتستر عليها من كلام الناس تدري الناس ماترحم المطلقه
حمدي بغضب : عمي شتحجي لا تعذرني مااكدر انه متزوج واحب زوجتي وماريد اخرب حياتي
العم : وياهو الكلك تخرب حياتك هذا زواج على سنة الله ورسوله والشرع محللك لو صرت حريمه وتخاف من مرتك
حمدي بعصبيه اكثر : عمي مااسمحلك انه رجال ابن رجال بس الي يتزوج اكثر من مره كون يعدل وانه اعرف مااكدر اعدل لا ماديا ولا معنويا
العم تعصب وكام يصيح ويغلط وتدخل العم الثاني واخر شي كالو لحمدي كلمة وحده ياتتزوجها يانهدر دمك ونكول تزوج وحده من الشارع ماندري اصلها من فصلها وجابلنا العار
هنا حمدي زادت عصبيته وانفعل حيل وتصايح ويه عمه كله اتبرو مني وطلعوني من العشيره اذا تردون بس زواج مااتزوج
العم : اخر الكلام حمدي لو توافق لو نهدر دمك وعندك مهله لنهاية الاسبوع واجي تردلنا الجواب لو جايب سيد وياك وتعقد لو شايل كفنك
طلعو العمام
وكمره وام حمدي يسمعون الحجي كمره خافت حيل وكامت ترجف : يمه فدوه لاتخليهم ياذون حمدي يمه انه راضيه باي شي بس رجلي يظل سالم
حمدي فدوه طاوعهم والله ماازعل منك يمه لايهدرون دمك ياهو الي غيرك فدوه حمدي
حمدي مايجاوبها بس دمه يفور بالعصبيه
مشه الاسبوع بقلق وحزن وكمره طول الوقت تقنع بحمدي وحمدي قافل وحالف مايتزوج بت عمه اجت نهاية الاسبوع وصار الموعد وحمدي ماقبل يروح بالليل صار صوت رمي قوي يم باب حمدي
طلع حمدي مالكه احد افتهم انو هاي رساله تهديد من عمامه
كمره : حمدي فدوه اروحلك هلمرة تهديد مره ثانيه يسوونها صدك لخاطري حمدي انه وامك ماالنا غيرك فدوه لاتعصيهم
ام حمدي ببجي : يمه كلام كمره صحيح سوي اليردونه وامرك لله وليدي واحنا عاذريك يمه
بعد توسل واقناع شديد من كمره وام حمدي وافق حمدي بس ماقبل يروح لعمامه دز امه تجيب البنيه ويعقد عليها هنا وظل معاند
راحت ام حمدي وفعلا نطوها البنيه ووافقو واخذوها لبيت السيد وراح حمدي عقد عليها وجابها للبيت
استقبلتهم كمره باركتلهم وحابسه دموعها غصب حمدي طلب من امه ترجع البنيه لاهلها بينما يرتب وضعه حمدي لان البيت مايكفي زوجتين وفعلا راحت ام حمدي وفهمتهم بالموضوع والعمام ولا ول مره قررو يساعدون حمدي كالوله بيع بيتكم ونساعدك تجمل فوكاه وتشتري اكبر
وفعلا باع البيت واشترى بنفس المنطقه بيت اكبر ورتبو غرفه لنسرين ووره شهر تم العرس ..

* حبايبي اتمنى تشاركوني ارائكم بلقصه وانتقاداتكم