گمرة

١٠ والاخير

هاجر : اوووف يازينه اطمنج خيتي حوبتج طلعت بكل من اذاج وبرائتج الكل عرف بيها
وبدت تبجي هاجر وتحجي لكمرة
صابرين كبل لاتموت كامت تهذي باسمج واصيح سامحيني زينه
كمره : صابرين ماتت ؟!! شلون ؟!
هاجر: اي خيه جايتج بلحجي صابرين حبلت بولد بس سوده عليه انولد مشوه هلولد عده كليه وحده و٣ فتحات بكلبه واشكال الوان حتى شكله مو طبيعي وابوي صرف العنده والماعنده علي وتالي مات الطفل ماظل عايش
وراه صابرين صار عدها بعيد عنج خبيث برحمها وشالو رحمها بس ماتحسنت انوب المرض اكل كل جسمها اكل
اخر يومين زاد عليها الوجع حيل وكامت تهذي تصيح على ابنها انوب كامت تهذي بيج وابوي تخبل واعترفت هيه وره مصيبتج متفقه ويه الولد وويه الممرضه وكل هاي حسد وغيره اعوذ بالله وجانت تريد حتى خواتي الصغار ترسملهن على رسمه بس عمتي وره مصيبتج اخذتهن خافت عليهم حست صابرين الها ايد
ابوي من سمع انجلط وذاك هو من يومها ممدد بلفراش لايتحرك ولايحجي بس يون ورجعن يمه خواتي يخدمننه

هاجر تحجي وكمره دموعها تصب
كمره: فدواتك ربي سمعت حمدي الله ماضيع حقي اني بريئة وثبت برائتي وحوبتي ماضاعت

ظلو حمدي وكمره وام حمدي يومين ببيت هاجر وراها قررو يرجعون هاجر ودعت اختها وطلبت منها تزور ابوها وخواتها لان ابوها بايامه الاخيره ويظل اب مهما صار
وفعلا من رجعو كمره طلبت من حمدي يسمحلها تزورهم ووافق
وصلت كمره لبيت اهلها استقبلنها خواتها بفرح ودموع جانت هاجر حاجيتلهم القصه
وبعد ماشبعو بجي وحضن كمره رادت تشوف ابوها ودخلت لغرفته
لكته ممدد ومايشوف زين ولايكدر يكوم ولايحجي تقربت من ايده باستها
كمره : بويه عرفتني
ابو زينه بس صافن ومستغرب مايشوف زين
كمره : انه زينه بويه تذكرني لو لا
ابو زينه فتح عيونه على وسعهن وخاف
كمره : لاتستغرب بويه انه زينه انت ردت تموتني وتدفن عاري بس الله باوع لحالي وكتبلي عمر جديد
انه زينه التهمتوها كفر وسرقتوا حياتها وطفولتها
زينه الي ضربتوها وهنتوها وعيشتوها بالم وخوف وظلم
عبالكم يضيع حقي يم الله لااا حشاه يدريني مظلومه ووكفلي وعوضني عنكم وعن ظلمكم نطاني زوج وام وحياة كريمه
وطلع حوبتي بكل واحد ظلمني

بدت دموع ابو زينه تصب وبين علي الحزن والندم وزاد ونينه

كمره: انه بريتكم الذمه وسلمتكم لرب العالمين وماعندي شي بعد اكوله بس اشكر ربي الظهر برائتي الف الشكر لله استغفر ربك بويه وادعي الله يسامحك
وطلعت زينه تبجي حيل ومارجعتلهم بعد بس ظلت تخابر خواتها وتسال عليهم ووره اسبوع توفى ابوها وشافت مهما يكون لازم تحضر عزه ابوها
طول العزه زينه مابطلت بجي بالرغم من كل اذيته انقهرت لان مات والله غاضب علي
وبالثالث تعبت حيل وانهارت بالبجي واغمى عليها نقلوها مستشفى وبعد التحاليل جانت الفرحة الجبيره
زينه حامل 😊
وعاشو زينه وحمدي احلى حياة وصار عدهم علاوي ثمرة حبهم ومالي عليهم البيت

ولهنا انتهت قصتنا اتمنى استمتعتو بيها
اياكم وظلم الناس لان رب العالمين ميضيع يمه حق و
مهما كنت مظلوم تاكد انو رب العالمين يمهل ولايهمل

(دعوة المظلوم ما ان تصل بين السماء والارض حتى ينادي الباري وعزتي وجلالي لانصرنه ولو بعد حين )

انتظر ارائكم وانتقاداتكم البناءه

By: sahar hameed