گمرة

٩

دخلت نسرين حياة حمدي وكمره بالغصب
كمرة جانت بداخلها كاتمة حزن جبير وبيوم الي تكون ليلة نسرين كمرة تظل لوجه الصبح تبجي بس مابينت ابد لحمدي
نسرين جانت وكحه وسليطة لسان جانت تاذي كمرة بلحجي هواي ومن يكون حمدي بلبيت تسوي روحها تحبها لكمره
كمره تحملت هواي اهانات وحجي وماجانت تشكي وجانت تحلف ام حمدي ان ماتوصل الحجي لحمدي جانت تخاف علي من عمامه خاف حمدي يضرب نسرين علمود كمره ونسرين توصل لعمام حمدي ويأذوه
ظلت كمره صابره تعبت هواي وذبلت من القهر بس كل همها تحافظ على حمدي
بعد شهرين من زواج حمدي نسرين حبلت وصارت المدلله
كمره دارتها هواي بداخلها جانت تتمنى هيه هم تحبل بس شكرت ربها ورضت بالواقع
حمدي بين الفرحان رح يصير اب وبين الي جان يتمنى هلطفل من كمرة
بلاضافه لكل هلحجي نسرين ماجانت رزنه كلما يطلعون للسوك ينتبهولها كمرة وام حمدي مو راحة وتبصبص لاهل المحلات ويذبولها حجي وهيه تتمضحك لو تغمزلهم وام حمدي ترزلها وتهددها تكول لحمدي بس مايفيد وكمره جانت تتوسل بام حمدي ماتوصل شي لحمدي خوفها على حمدي جان اهم من كلشي
فديوم الظهر كمره وام حمدي يخبزن واجه حمدي غفل من الدوام من وكت
ام حمدي : هلا بطولك يمه اليوم من وكت اشتاقيتلنا
حمدي : اي والله يمه وتعبان وطلبت رخصه وطلعت جوعان ميت جوع استعجلو بالغده يمه
كمره : تدلل ياماي عيوني احضرلك الحمام تسبح بينما نجهزلك الغده
حضرت كمره الحمام دخل حمدي يسبح جان الحمام فوك وشباك الحمام يطل ع السطح سمع صوت ضحك جاي من السطح لف الخاولي علي وطلع ركض للسطح
وجانت الصدمه
حمدي : لج نسرين ...
لك اليوم انعل والديك وين تنهزم مني
نسرين : يبوووو لا فدوه حمدي تعال حمدي فدوه وانه افهمك عمتي لحكيلي
حمدي : بت الكلب اصبريلي
وجابها جر من شعرها نزلها الدرج ويضرب بيها
نزلها جوه وباقي يضرب بيها وجوي كمره وام حمدي على صوتهم
نسرين : يماااا فدوه سامحني حمدي سامحني لخاطر ابنك البطني حمديييي
ام حمدي : يمه شصاير حمدي عوف البنيه حامل حمدي يمه فهمني
حمدي : عوفوني اموتها الكلبه الساقطه تتمضحك ويه زلمه ع السطوح ولج اليوم انعل عشيرتج انه تنزلين راسي
كمره هجمت على حمدي تريد توخره منها : فدوه حمدي عوفها حمدي لخاطري لخاطر ابنك
استمر حمدي يضرب بنسرين حدما نزفت واغمى عليها
نقلوها مستشفى بساع بس مالحكو ع الطفل مات ببطنها
رجعو للبيت بس حمدي متحلف يرجعها لاهلها ويكلهم على سوايتها وسالها عن هذا الشخص طلع جيرانهم الوراهم راحلهم بس لكاه مهزوم
حمدي : الجبان الخسيس بس وين ينهزم مني الا ادفنه بيديه
ام حمدي : يمه تهده بالرحمن هسه البنيه مريضه خلتطيب ونتفاهم
حمدي : مااتفاهم والله والا ارجعها لاهلها خليقتلوها ويغسلون عارها هلساقطه
كمره ركضت حضنت حمدي وترجف : لا حمدي لا
لافدوة لاتكول لاهلها فدوه حمدي لخاطري
وتبجي بحركه وتبوس ايد حمدي
حمدي : كمره شني سالفتج تدافعيلها هاي نزلت راسي بلطين ولج خانتني كمره وانه الخفت الله بيها وردت اعدل بيناتجن كلت حرام ولج تروح فدوه لتراب نعالج
كمره : راسك مرفوع انشالله حمدي سوي شتريد بس لاتكول لاهلها لايذبوحها حمدي فدوه
حمدي دمعت عينه وعافهم وطلع
اجت نسرين تمشي كوه وكعدت يم رجل كمره وتبجي حيل:
سامحيني خيه رغم كل السويته بيج تدافعيلي مااستاهل منج هلوكفه انه سامحيني بداعة حمدي
كمره : الله يسامحج نسرين ياريت لو محافظه على بيتج ورجلج ماجان هذا حالج خلي درس وتعلمي منه الا الشرف خيه لو راح محد يعوضه
وانه راح اقنع حمدي يسامحج ولو مااظنه يقبل
ظلت كمره تقنع حمدي بس حمدي ظل على موقفه واخر شي كدرت تقنعه مايكول لاهلها بس يطلكها
واتفقو يكولون طلكها لان نزلت الطفل وماتريد تعيش وياه
وهيه وافقت وتوعدها حمدي ان كالت غير هذا الكلام يفضحها ويخلي ابوها يذبحها وهيه وعدته بس كون يستر عليها ومايفضحها
وتطلكت نسرين ورجعت حياة حمدي وكمره سوه بس حمدي قرر يبيع البيت ويطلع لغير منطقه بعد سوايت نسرين وباعو البيت وانتقلو منطقه ثانيه
كمره كبرت اكثر واكثر بعين حمدي وام حمدي بس ظلت بنفسها تحبل وتفرح حمدي بطفل يشيل اسمه
فديوم طلبت من حمدي يقدم اجازه ويرحون لبغداد يزورون الكاظم ويغيرون جو يومين وينخون الكاظم بلكت وتحبل كمره
حمدي وافق ووعدها باقرب وقت يرحون
وفعلا قدم اجازه وراحو لبغداد نزلو يم الامام قررو يتغدون وراها يزورون ويظلون بالامام لحد الليل
كاعدين بلمطعم يتغدون ويسولفون كمره سمعت صوت مو غريب عليها رادت تندار بس خافت تكون غلطانه
بعد شوي رجعت سمعت نفس الصوت اندارت وصاحت
- هجوره ... اي انتي هجوره ماغلطانه انه مو ؟ وركضت تريد تحضنها
البنيه صفنت على كمره : شكلج مو غريب عليه انتي منين تعرفيني ؟
التفت كمره يمنه يسره تراقب
- هجوره انه .... انه كمرخ اااا اقصد زينه خيتج ( وكامت تبجي)
هاجر طلت صافنه ممصدكه والدنيا افترت بيها داخت وكعدت ع الكرسي وكمره مبتسمه وعيونها تصب دموع
- هجوره والله انه زينه لاتخافين خيتي انه مامتت صدكيني
فز زوج هاجر متفاجئ وحمدي وام حمدي جوي يشوفون شنو السالفه وجهال هاجر صافنين
هاجر : ماصدك عيوني عفيه كولولي انه بحلم
كمره : لاخيه علم علم ( وحضنتها ودموعهم تصب وكلماتهم توجع الكلب ظلو على هلحال حدما هدو وبدت كمره تشرح لهاجر وتعرفها على حمدي وامه )
كمره : هاي كل قصتي ياخيتي بس انتي شجابج هنا
هاجر : انتقلنا لبغداد قبل سنه لان ابو علي نقلو شغله لبغداد
(ابو علي زوج هاجر )
كمره : هجوره سولفيلي خواتي شلونهن كلبي مفرفح عليهم ووو وابوي ... ابوي شلونه هجوره شصار بعد غيابي احجيلي فدوه

By: sahar hameed