گمرة

٢

مرت ايام الفاتحه وطلعت الاربعين وابوي ماشاء الله رجع كل الحيل بي عبالك رجع شاب مراهق ضحكته وصوته بلبيت ويدندن باغاني ويتعطر وسوالف مراهقين اني بيني وبين نفسي ماافهم غرضه بس انقهر امي ماصارلها شهرين وهو رجع لحياته ولا كأنو هاي الانسانه الضيعت شبابها وياه راحت
وره فتره كام يجي ع غفل للبيت ويطلب منا اني وخواتي نروح لبيت بيبي لو بيت واحد من عمامي ويكول اني امر اخذكم بعدين لان مشتاقيلكم يسالون عليكم احنا جنا نستغرب همه بحياتهم مااشتاقولنا بس مانعصي ابوي ونروح كبل
طبعا اختنا الصغيره اخذتها عمتي تربيها لان احنا مانكدرلها ماعدنا معرفه بالجاهل
مرت ايام وراحت ايام واحنا نشوف تصرفات ابونا اغرب من الخيال ونسكت لان اذا سألناه يكب بوجهنا ويصيح ويغلط وحتى يسب امنا
ف جنا عايفي ع راحته
بالمنطقه كام يطلع حجي عن ابوي انو عنده علاقه بوحده ويجيبها للبيت عاد احنا افتهمنا ليش يدزنا
وسفه يابويه هيج نسيت امي بساع بساع
ظلينا على هلحال خدامات لابوي وطلباته وماراضين عنا بداخلنا لحد مايوم جمعنا وحتى اختي المتزوجه وكال الخميس الجاي رح تجي وحده تحل محل امكم واريدكم تحبوها وماتضايقوها وكلمتها بلبيت مسموعه مثل كلمتي وماريد اي حجايه منكم انه الخميس متزوج
وعافنه وطلع واحنا ظلينا بواجي ووحده تواسي الثانيه بس كلشي مابيدنا نسويًلازم نخضع ونسكت
واجه الخميس وجتي صابرين تتمندل وعود عروس وخجلانه ابوي بيومها وصى بيبيتي تاخذنا نبات يمها وهيه تهلهل وفرحانه بزواج ابوي وتدعي كون على كصتها تشوف الولد يمه وترفع راسك بين الناس
ورحنا ويه بيبتي ومابطلنا بجي
بيبيتي : شبيجن وجه الفكر شبيجن تلطمن بدل ماتفرحن لابوجن بلكت الله ويفرحه ويعوضه عن وجه امجن النحس
هنا احنا ماتحملنا
بيبي امنا وجهها مونحس لاتحجين عليها
بيبيتي: اسكتن اسكتن بله
ومرت الايام والعروسه مشغلتتا خدامات الها ماتشتغل اي شي بلبيت ولاتطبخ ومن يجي ابوي تستقبله بنشرة الاخبار تعبانه وهلكت وبناتك ميساعدني وكله كذب وافتراء واحنا بس نتحسب عليها ومابيدنا شي بس نحجي ابوي يتخبل علينا
ما مر يوم اذا مو مسويه مشكله لو تنقل حجي لو تجذب لو تتهم بالناس يبوووي مو مره لا شيطان بهيئة مريه
وجانت تغار مني حيل تكولي تذكريني بأمج البومه تشبهيها نسخه والكل يكولون عليها حلوه واني طالعه عليها
وهاي صابرين كامت شدت وياي فد شده اذا مشطت وترتبت كالت عليمن مترتبه الا اكول لابوج عندج واحد واني اضحك على تفكيرها واكولها امي معلمتنا ع النظافه والترتيب و اني بعدني صغيره عن يا واحد تحجين
هيه تموت تريد بس تسويلي مشكله
وره فتره وبعد ماحارت صابرين شلون تسويلنا مشاكل وتتخلص من عدنا وبلذات اني كامت تسوي روحها تحبنا وتريد تصادقنا واحنا مانفهم شعدها من غرض بس كلنا نسايرها ونشوف
بذاك الوكت جانت هيه حبلانه ومدلله روحها وابوي طاير بيها ويدعي ولد
كامت ليل نهار متمدده وتصخر بينا وماتطلع الا نادر
بيوم جنت انظف وصاحتني
- زينه زينه حبيبتي تعالي
- الله اليستر من الحبيبتي ها صابرين خير عندج ولاده؟؟
- لايمه ويني بعدني بلسادس بس مابي اكوم ومحتاجه من السوك شغلات
- بس اني ابوي مايخلينا نطلع للسوك وحدنا
- اني من يجي اقنعه عفيه وتروحين مكاني بعد انتي للسوك
- بكيفكم بس كون ابوي يقبل
ومن اجه ابوي قنعته وتفاجأت راسا قبل وماعارضها ابد
وصاحني ووصاني بعد روحة السوك عليه
اني كلت يله بلكت هم اطلع واشم هوه احسن من الكعده طكت روحي
وكمت مرتين بلاسبوع اروح اتسوك
وبيوم جنا متسوكين وماعدنا نقص بس صابرين لحت عليه الا اروح للسوك هسه اجيبلها شغلات محتاجتهم ضروري
كتلها تاجلها ماقبلت ومصره حيل
رحت وماناقشتها وصلت للسوك وللمحل الي هيه وصتني اروحله دخلت وماحس الا واحد جلبلي بالمحل يريد يحجي وياي واني خفت طلعت ركض وظل يلحكني ويحجي حجي مااسمعه زين اني مرتبكة وخايفه منو هذا شيريد اخر شي لزم ايدي جرني وكال بسيطه تهربين مني ولاجنا متفقين نهرب سوه هو حجه هيج وانهزم وماحس الا واحد جرني حيل ارفع راسي هذا ابوي شجابه للسوك
- بويه افهمني ماعرفه هذا منو والله ماعرفه
- اصبريلي بت اقبال بس نصل للبيت
وصلنا ودفعني حيل وظل يضرب بيه حيل حيل واني ارفس جوه ايده
يابه ماعرفه وداعتك والله وروح اني مااعرفه وماادري شكال جنت مهزومه اريد اتخلص منه ولحكني
جتي صابرين والبنات التمن
وصابرين تكولي حيل ولج شلون تنزلين راس ابوج اني صوجي دزيتج للسوك عبالي شريفه
وابوي يسمعها ويزيد بلضرب حدما فقدت بين ادي ماحس الا مغذي بيدي معلكين
وخواتي يبجن يم راسي وخايفات
وهجوره هم جايه واول مافتحت حضنتني
ولج زينه شلون هيج تسوين كولي احجي اني اخيتج كولي واساعدج تعرفي عندج علاقه وياه
زينه: يمه هجوره شلون هيج تحجين ماتعرفين اخيتج ولكم والله ماعرفه ماعرفه
هاجر: ولج جا شلون منين يعرفج وهاي صابرين ماسكتت بس تحرك بابوي عليج ودكوله خلنوديها نفحصها خاف ماخذها
لطمت وجهي حيل ولج يمه الحكي علي يمه منين جتني هلبلوه
ولج هجوره لاتصدكوها هاي جذابه واذا ماطلعت هيه وره مصيبتي ولكم ماعرفه وحق النبي وتراب امي ماعرفه
وبهلاثناء دخلت ممرضه علي وكالت لهاجر اطلعي من الغرفه رجاءا
طلعت هاجر وعيونها تبجي علي
جتي الممرضه وكفت فوك راسي وتضحك باستهزاء
-يله لاتتعبيني
- شسوي يعني
-كشفي دافحصج
-يمه تفحصيمن ولج يمه الحكيلي اخاف
يمه مامسويه شي ليش مايصدكون بيه
- اذا ممسويه ليش خايفه يله حبيبتي ورايه شغل لاتاخريني
- وفحصتني واني مطمئنه مامسويه شي ويتبلون عليه وهاي صابرين اني اعلمها ام الشرف
طلعت الممرضه وحتى ماحجت وياي كلمه
وره ماطلعت وانكلبت الامه بره
صراخ وحجي واشكال
ودخل عليه ابوي وعمامي لازمينه كوه يريد يهد علي ويكولوله مو هنا يمعود لاتفضحنا ناخذها للبيت وشتريد هناك سوي بيها
ابوي اعصاب ويرجف ويغلط ويسب بأمي
واني دم ماظل بجسمي يمه شديصير والله مامسويه شي هاي شكالتلهم الممرضه...
يتبع

By: sahar hameed