گمرة

٥

طلعنا السوك اشترتلي ام حمدي دشاديش تلاثه بس الوان مارضت اظل لابسه اسود كالت يمه بعدج صغيره وامج اكيد تحزن من تشوفج بلسواد
وحجابات هم رهمتلي ويه الدشاديش وعباية راس وبوشيه مثل ماوصاها حمدي
ورجعنا للبيت العصر حضرنا الغذه وتغدينا وبدت خالتي تسولف وياي وتسالني عن حياتنا وحمدي كاعد ويسمع
حجيتلهم كل حياتي من اول مانولدت حدما صارت الحادثه وكلساع وابجي ويهدوني حمدي وخالتي ام حمدي وبديت اتعلم اصيحلها يمه وارتاحيتلهم هواي جني اعرفهم من زمان وهمه هم حسيتهم يبادلوني الشعور
ناس يخافون الله وبسيطين الحمد والشكر الك ربي نجيتني ووكعتني بهيج ناس اوادم تدريني مظلومه وماتضيع يمك حوبتي اريدك تنصفني وتظهر برائتي ولو بعد حين
مرت عليه الايام ببيت حمدي وبديت اتعلم عليهم اكثر وشويه نفسيتي تحسنت بس من يجي الليل وينامون اظل اتكلب بفراشي واختنك وكلما اغفى اتخيل الصار واتخيل ابوي يذبحني وافز مرعوبه ...
ام حمدي: صباح الخير يمه حمدي
حمدي: صباحج خير وعافيه يمه شنو كمره نايمه شعجب
ام حمدي لا كعدت فاتت تغسل بلحمام وتجي اني احضرلك ريوكك خاف مستعجل
حمدي : اساعدج يمه
بس يمه كوليلي شلونه رضاج عن كمره
ام حمدي: يمه رضاية الله عليها ماشفت منها غير كل خير مداريتني وتساعدني وحتى تعلمت تخبز وياي وورده وخلوقه وصلاتها بوكتها حسبي الله على الي راد ياذيها وانشالله حوبتها متضيع بس يمه اكو شغله بس متعبتني عليها
حمدي: خير يمه
ام حمدي: يمه هواي تفز بالليل سوده عليه ونوبات احس عليها تغطي وجهها وتبجي يمه خاف مامرتاحه هيه
حمدي : يجوز تشتاق لخواتها لو اهلها
او تتذكر الصار هم مو هين عليها يايمه
ام حمدي: يمه انه حسبه ببالي يمه خاف البنيه تحب لو احد ببالها اشوفها تصفن هواي وحجيتلك عن حالها بالليل والحب موحرام يجوز تحبه بنيه صافيه واكيد واعدها بزواج ويجوز هلموضوع فرقهم يمه ليش ماتسالها انت وتشوف طريقه يجوز بعده يحبها وياخذها ويسعدها وهم يستر عليها هم احنا مادايميلها يايمه
حمدي (من كالت هيج كلبي عصرني حيل والغيره شبت بيه شب)
يمه شتحجين انتي يا حب لا لا ماتوقع وبعدين يايمه حتى لو احد جان مفكر بيها وره عملت اهلها بعد اكيد مايفكر ويصرف نظر وهيه ماعتقد مامرتاحه يمنا لا يمه سدي الموضوع
دخلت كمره
كمره: صباح الخير
حمدي وام حمدي : صبحج الله بالخير
بس حمدي وجهه احمر وعيونه تجدح
حمدي
اول مره احس شعور غريب بداخلي تجاه كمره مادري يجوز لان صارت عرضي وماقبلت هلكلام من امي يجوز
تريكنا وامي راحت تخبز وكمره وكفت تشطف المواعين
تقربت عليها واباوعلها تبارك الخالق ياربي شنو من حسن
وبداخلي لا حمدي لا هاي مو تربيتك انت وعدتها تحسبها خيتك وتحافظ عليها وماتنظرلها بغير نظره
حمدي: كمره اسالج سؤال اتمنى ماتكذبين علي
كمره: لا مع الاسف عليك خويه حمدي اني جذبت عليك بيوم
حمدي : لا لاتفهمين غلط كمره بس قصدي ماريد تجامليني بلجواب
كمره: كول خويه اسمعك
حمدي: كمره مرتاحه انتي ويانه
كمره: يااا خويه شتحجي انت انتم اهلي صرتو وفضلكم شايلته حد مماتي ولو ادور الكون ماالكه بحرصكم ومداراتكم الي
حمدي: كمره اشوفج تصفنين هواي شاغل بالج شي كولي واني عد وعدي اساعدج كلما احتجتيني
كمره: اوووف ياخويه مامحتاجه غير سلامتكم بس الصارلي ياخويه مايروح من بالي صدكني انه صغيره جنت وبعقل طفله وفجأة كبروني واتهموني بلباطل وبشرفي الماعندي اعز منه
دمعت ... صعبه علي يا خوي صعبه
وركضت لغرفة امي تبجي
حمدي: سوده بوجهي من هيجت عليها مصايبها مسكينه ياكمره الله يمكنني واعوضج
....

وره سنه من وجود كمره ببيتنا والوضع تمام ومرتاحين حيل وياها بيوم اجو عمامي ثنين ونسوانهم فتحتلهم الباب واول شي اجه ببالي من شفتهم كمره
شراح نكولهم ويقتنعون لا
دخلتهم ورحت للترك وره البيت يخبزن كمره وامي
حمدي : يمه عمامي عدنا
ام حمدي: يمه صخام شذكرهم بينا هسه وشنكولهم
كمره : يمه انا اطلع من البيت بحساب جارتكم وجنت يمكم اروح للسوك اظل يم ام المخضر حدما يرحون
حمدي بعصبيه: وين وين ماتطلعين لاي مكان وبعدين همه يجوز مطولين لليل
ام حمدي: يمه هاي هيه كوللهم جارتنا وتجي تساعد امي وشيكولون خليكولون
طلعت امي سلمت ووصيت كمره تظل هنا ماتطلعلهم ابد ظلو يحجون ويسالون على اخبارنا وماندري سبب جيتهم
عمي: ام حمدي حمدي مو كبر شوكت يتزوج ماتردين وحده تساعدج
ام حمدي: والله ياابو احمد مايرضى يكول مامستعد للزواج وانه شفتلي وحده جارتنا صغيره ويتيمه وتساعدني يوميه تجي من يكون حمدي بلدوام ومرات تظل لليل وتروح وانطيها هلقاسمه الله من رزق الخبازه
مرت عمي: اي هاي الحلوه الجانت تخبز شفتها من شباج المطبخ تلكيها راسمه على حمدي اذا مو بينهم علاقه حب
قاطعها عمي: وشلون ترضيها ياام حمدي غريبه تفوت للبيت وعندج ولد مامتزوج
حمدي: عمي انه رجال مو ولد وتربايتي اصيله لاتخاف وكول لمرتك عيب الحجي الكالته هذي لا اخلاقي ولاتربيتي والبنيه محترمه شلون تجيب سيرتها بلباطل ماتخاف من ربها
بس كلت هيج وعمي كام يفور ويغلط عليه وعلى امي واني تعاركت وياه وطردته من البيت
وراها طلعت من البيت كلت لامي رايح للولد اصدقائي واتاخر
طلعت ودمي يفور من حجي عمي ومرته واضرب بلحجار برجلي وراسي مصدع حيل ظليت امشي مادري وين اريد اوصل وصلت للبستان الشفت بي كمره اول مره ابتسمت وكلبي وجعني اتذكرت شلون جانت ترجف وشلون اول ما فتحت عينها انصدمت بعيونها وجمالهن
استغفرت ربي ولك حمدي شجاي تفكر انت من كل عقلك تريد تحبها لاحمدي لا اصحى هاي امانه عندك
ظليت بره لنص الليل ورجعت دخلت البيت سمعت صوت جاي من المطبخ ركضت حسيت بشي غريب حمدي بصياح : ولج كمره .....