عمامي هدو ابوي واخذوني من المستشفى للبيت بلاهانات والسب والغلط
اول مافتحنا باب البيت دفعوني حيل بلكاع وكل واحد يريد ينهش من جسمي عمامي وابوي ولد عم ابوي وصابرين وعماتي وبيبتي كلها تسب وتشتم وتضرب واكثرهم ابوي واني استنجد بي
يابه والله ماعرفه وعيونك وروح امي ومايصدكني ولايخليني احجيله اي شي
ويتوعدني اليوم موتج على ايدي اليوم اخلصج خلاص واخلص من عارج
وجان كل بالي هاي مجرد تهديدات لحد ما صاح بيهم
وخرووووها من كبالي اليوم الا اموتج وادفنج بيدي واخلص من عارج ادبسز
جيبولي سجينه ولكم ليش صافنين عليها هلعاهره
ورجعو عمامي جرو ابوي لغرفة الظيوف وصاحو بخواتي ياخذوني لغير غرفه حد ما نشوف ابوي شناوي يسوي بيه
اخذوني ويحضنن بيه سوده عليه وكلشويه ودخلت وحده من عماتي لو نسوان عمامي وسمتني بلرزايل واني ابجي واحلف وماكو فايده
لليل واجو عمامي الصغير والوسطاني وابن عم ابوي
-يله امشي كومي
- وين والله مامسويه شي
- يامامسويه كومي انتي ماالج حل غير نكتلج ونسد حلوك الناس
ضربت حيل خدي يمه شجاي تكولون حرام عليكم هذا ظلم اني بريئة بويه تعال احجيلك والله بريئة بويه وظليت الطم واضرب حيل على راسي وهمه جروني صعدوني سياره واسمع ابوي يكللهم لاترجعون اذا مودمها تجيبولي بيدكم
وهمه يهدو ويكولوله اوامرك ماشيه بس ابقة انت لاتجي ويانه وانت منا مريض ويصعد ضغطك ويجوز تقشمرك بلطريق وتخليك تغيير رايك
تحركت بينا السياره الطريق كله ماسكتت من البواجي واتحسب على صابرين كله منها
ماخليت لاسوره لا دعاء
ربي امن يجيب المضطر اذا دعاه ويكشف السوء
ربي تدريني مظلومه ويتبلون عليه ربي انصرني واظهر الحق
وصلنا بساتين هوايه ومنطقه تخوف ودنيا ليل وماكو ولاحس بشر
عمي الصغير اجه وكف كبالي كال باعي زينه
اني جبتج هنا لان شفت ابوج قافل مايصدكج خصوصا وره مااكدت الممرضه فعلتج
بس اني مامصدك
ومتاكد هاي لعبة من صابرين
والا افضحها بس اتاكد والزم عليها شي واطلع برائتج حتى لو بعد دهر
بس هسه مابيدي شي عليج اذا بقيتج ابوج يكتبج خلاص ومايرحمج
واحنا قررنا نخلصج من جوه ايده
اني تطمنت نزلت على رجل عمي وايده بوستها
عمي الله شاهد علي بريئة وهاي الممرضه متاكده وراها سر والله مامسويه شي
عمي: اشششش كافي لايسمعج احد
احنا راح نخليج تنهزمين هاي المنطقه بعيده ومايوصلها ابوج ونهاية هاي البساتين بيوت هواي بلكت احد يحن عليج وياخذج حتى لو خدامه صرتي هيج يرضيج لو نرجعج لابوج يقتلج
عمي بس اني اخاف اهنا عفيه لاتتركوني وين اروح وين انطي وجهي
باقي وياج اني للفجر ماكدر اظل اكثر لا ابوج يشك بينا
وهذا كل الاكدر اقدمه ترضين لو ارجعج
صفنت ودموعي تتجارى
راضيه عمي وبجيت بحركه ونمنا بلسياره للفجر وره الصلاة نزلوني وراحو وبعد مالتفتو وراهم ابد
وظليت اني وحدي بلبستان توه ضوه الفجر مبين والجو بي بروده شويه ارتجيت على شجره وظليت ابجي بحركة واناجي ربي واهل البيت
كد مابجيت عيوني انسدت واحس راسي ثكل مدري نمت مدري فقدت الوعي وماحسيت على شي بعدها
فتحت عيني اشوف بغواش واحس مي ينكط على وجهي واشوف هيئة شخص كبالي اول مره يصادفني
اريد اركز مااكدر راسي ثكيل وعيوني مغوشه
حسيت الشخص ابتعد شويه عني وبده يحجي وياي
- خيتي تسمعينني اريد اساعدج انه لاتخافين
بعدني دايخه وجسمي يون علي من الضرب
بس كدرت افتح عيني زين كمزت من شفته وجان حاط كمادات على راسي شلتها وردت اركض انهزم خفت منه
بس ماكدرت جسمي مكسر حيل احس تعوقت مابيه اكوم
رجعت ابجي بحركة وهو يحاول يهديني
حمدي: خيتي لاتبجين والله مالي اي غرض غير مساعدتج
سمعت حجي عمج ونيتي اساعدج بس احجيلي شني قصتج واطمأني..
حمدي يعرف نفسه..
انه حمدي عمري ٢٦ سنه موظف حكومي بسيط شغلي اداري والدي استشهد بالجيش قبل ماانولد
ربتني امي وتحملت هواي لحتى تخليني اكبر واتخرج
امي جانت يتيمه ومن مات ابوي تيتمت اكثر
اهل ابوي هواي اذوها وحرموها من ورث ابوي ابوي جان متمكن حيل بس كلشي ماحصلت امي من ورثه عدا بس راتبه التقاعدي بلكوه خلوه يبقى الها وبيت ابوي قسموه حصص وباعو واتقاسمو بيناتهم وهيه ظلت تتوسل بيهم ينطوها ولو غرفتين منه نعيش بي انه وياها مارضو
ظلت امي تخبز وتبيع للمنطقه وتشتغل بالبيوت وويه راتب ابوي ومساعدات المنطقه الها الي جانو يحبوها هواي ويدروها انظلمت حدما كدرت تكونلنا بيت صغير حيل غرفتين وحمام ومطبخ هذا الحجي اني وصلت للمتوسطه وتوسلت بيها ابطل واشتغل واساعدها مارضت
كالت اقبل تشتغل بس بلعطله يمه انه مادايمتلك ولازم تصير عندك شهاده وشغله تعينك ع الحياة
بس البيت جان بعيد هواي عن ناسنا وعمامنا وهمه هم سحبو ايدهم منه ماالهم غرض بينا
يجونا بس من اكو فصل بلعشيره حتى اشارك بي لان درجو اسمي بلعشيره
عمامي جانت خلفتهم بس بنات وابوي الوحيد العنده ولد
وجانو دائما يكولون لامي حمدي لازم ياخذ وحدنا من بناتنا هذا الوحيد ولازم ورثنا يظل بيناتنا
هيه جانت ترفض وتكولهم ابني يكمل ويتخرج وبعدها الله كريم محد يجبره على شي وبعدين بناتكم اكبر منه كلهم واني مااظلم ابني
تعبت امي هواي حدما تخرجت وتعينت ونوبات هم ادورلي شغل العصريه وامي بطلت من شغل البيوت بس ظلت تخبز للعالم ماقبلت تعوف الخبازه
فديوم جنت متعارك ويه عمامي يردون يزوجوني وحده من بناتهم الي ماظلت غيرها الباقين تزوجو وخلصت منهن بس ظلت هاي يجيها النصيب وعمامي يرفضوه لحتى يجبروني اخذها وانه مااقبل تعاركت وياهم وطلعت اشتم هوى صار الليل وانه افتر بالبساتين وكلت اصلي الفجر يله ارجع ماالي خلك مختنك وكلت لامي اتاخر لايظل بالج وعفتها دموعها بطولها وكلت من ارجع اراضيها
ظليت افتر وتعبت استقريت عد شجره ضخمه ومددت
فجأة سمعت صوت سياره بعيده وراها اسمع بجي بنيه وكلمات مااميز شتكول ووياها رياجيل اني توجست كلت يجوز ذوله جايبيها يعتدون عليها ظليت لابد وره الشجره واسمعهم
ماافتهمت القصه بس سمعت واحد من الرياجيل صوته جان ضخم وواضح وسمعت كل حجيه وهيه تبجي حيل وتالي عافوها وراحو يركضون ظليت اراقبهم صارو بعيدين وهيه ظلت تبجي بحركه وتلطم وتون موجوعه اخر شي وكعت من طولها انه ركضت عليها حركتها ماالها صوت بس نفس يصعد وينزل حاولت اصحيها كامت تون بصوت عالي وترجف ووجهها صار احمر وجسمها يرجف لزمت وجهها انجويت
هاي صخنت شسوي ياربي ركضت ع الماي نزعت شماغي الجنت لافه براسي وبللته وظليت اسويلها كمادات واجيب ماي بيدي واغسل وجهها وايديها وهيه جمره صايره والدم صاعد بوجهها حاولت اشربها مي وظليت على هلحال لابيه اخذها مشفى ولا بيه اتركهها وماعرف شنو وراها
ساعه ظلت فاقده وتالي حسيتها بدت تصحى والحراره قلت
فتحت عيونها بتثاقل اني وكفت بعيد شوي
بس شني سبحان الخالق تبارك الرحمن سمار حنطاوي وعيون صفر جنها عيون البزازين ملامح ناعمه جنها طفله
كلبي رف من باوعت بعيونها
أنت تقرأ
گمرة
Short Story- يابة وداعتك وروح امي ماسويت شي يابة لاتقتلني اني بنتك اخاف يابة - وخرووووها من كبالي جابتلي العار اليوم اموتها بيدية واغسل عارها اليوووووم -----------
