سجى،،،،انتظر نتيجة التحليل وخايفة وايدي ع بطني وارجف ياااااااا عزة العزاني وكعت بالكاع وابجي اويلي شسويت بنفسي اني حامل يصخام وجهي ظليت ابجي والطم ع وجهي وع بطني خابرت ع مازن ومااعرف شنو حجيت ولا اتذكر شنو كتلة بس الي اذكرة كتلة تعال للشقة ضروري
مازن،،،جنت سهران الليل ع والدي وتأزمت حالتة واجتي امي روح ارتاح وليدي ونام بالبيت ودير بالك ع البنات وع اخوك
طلعت من المستشفى ورحت للكراج اطلع السيارة اتصلت سجى اهووو والله مالي خلكج ياسجى الي بية كافيني هسة ترجع تنك وتحجي واني كلبي خلص من الملامة كعدت بالسيارة ورفعتة جانت تصرخ وتبجي وج شبيج شصاير مافهمت عليها شي الا مصيبة وتعال للشقة كام وجهي ينطي الوان ومية حسبة اجتي بالي
رحت وبصراحة ترددت اصعد من كد مجنة نسمع ببغداد من مصايب واختطاف وقتل كمنة نخاف من خيالنة بعدين كلت مستحيل سجى يجي منها هيج شي نوب تجيني افكار اكول اخاف احد تعرضلها او بيها شي توكلت ع الله وصعدت فتحت الباب ولكتها تخوف صايرة عبالك شبح الضعف والشحوب تبجي منهارة بالكاع كعدت يمها شبيج سجى شصايرلج
سجى ،،،ماحجيت ولا كلمة ورفعت ايدي ونطيتة شريط فحص الحمل شافها وماافتهم شي
مازن ،،،شنو هذا وليش هيج مسوية بنفسج
سجى ،،،مازن هذا شريط فحص حمل اني حامل
مازن ،،،انصدمت وكفت وشمرتة عليها شبيج ولج شدتسولفين
سجى ،،،كامت تلطم وتبجي الي تشوفة مازن اني حامل واحتمال شهرين لان صار اكثر من 3 اسابيع ماجتني شنسوي اني اذا اهلي دروا مصيبة يذبحوني والله
مازن ،،، وتعرفين من منو حامل انتي؟؟
سجى ،،،وكفت كبالة واحس الدنيا تفر بية ومصدومة بسؤالة همست مازن خلي الله بين عيونك ولتنكر الي بطني وتنكر حبنة شنو هالسؤال هذا وصرخت
مازن ،،،لزمتها من ايدها ولويتها وج اي حب شنو شايفتني غبي وماعندي عقل ولا مركب كرون ستيل حتى اربي ابن حرام انتي تعرفين كلش زين شلون جنت ماخذ احتياطاتي ومستحيل يصير حمل حتى هسة دكوليلي حامل منك مع الاسف عليج والله
سجى ،،،ضربتة راشدي لا انت ولا اشرف واحد تحجي ع شرفي
هزيتها من ايدها وكتلها تنكلعين من الشقة ومااريد اشوف ركعة وجهج
سجى ،،،لزمتة من ايدة مازن لتتركني الله يخليك والله اهلي يذبحوني هذا ابنك اقسم بالله محد لمسني غيرك
مازن ،،،جريتها من ايدها وطردتها برة الشقة
ظلت تضرب بالباب وتصرخ وتدعي علية
سجى ،،،الله لا يوفقك ياسافل وتلكاها بعرضك وبأهلك وبخواتك وابجي كون الله يحرك كلبك مثل ماحركت كلبي عساها بحضك وبختك وتضرب بالباب افتح يا سافل ضيعت عمري واحلى سنيني وياك استاهل الي صار بية وتصرخ وتبجي
مازن ،،،كعدت بغرفة النوم وقفلت الباب علية وخليت ايدي ع اذني وصراخها ودعائها علية وع اهلي ظل صدى صوتها بأذني ظليت اشرب سيكارة ورة سيكارة ولان ماجنت نايم الليل كلة حسيت راسي راح ينفجر نمت بلا ماااحس بنفسي كمت اشوف كوابيس كابوس بظهر الثاني وصدى صوتها بعدة بأذني فزيت من النوم والدنيا ظلام دورت ع جهازي حتى اشوف شكد الساعة طلعت الساعة ب10 بالليل وشفت مكالمات من اهلي امي وخواتي تذكرت عفتهم بوحدهم البنات مع اخوية الصغير
فزيت بسرعة وعلكت الضوة واتصلت بأمي مترد
طلعت من الشقة وجانت رايحة سجى رحت بسرعة لبيتنة لكت هوسة ع بابنا طبيت اركض وجانوا العالم ملتمة ع اهلي وامي تصرخ طلع ابوية متوفي من المغرب واني ماادري
مرينة بأيام صعبة والي جان بينة مو هين صرت الاب والمسؤول الوحيد ع العائلة نسيت موضوع سجى او اني حاولت اتناساه بالرغم جانت تجيني بالكوابيس وتخوفني وجان حتى ابوية الله يرحمة يجيني بمنامي يوصيني بيها ويكلي اني مو راضي عنك ورة اسبوعين حسيت لازم اعالج غلطي واتزوجها ولازم اتأكد من الطفل اذا جان ابني او لا بالرغم جان وضعي مو وضع زواج لان جنت اشتغل وحتى اعيش اهلي والحمل صار ثكيل علية
رحت لفرعهم وجانوا ناصبين خيمة وعدهم فاتحة من سألت كالوا بنتهم مخطوفة ولاكيها مكتولة تحطمت وانتكست واحساسي بالذنب ظل ياكل بية كسرت سيم كارتي والرام وصوري وياها وكلشي يذكرني بيها حتى كليتي تركتها وفتحت محل صيانة وتجهيز برامج حواسيب وموبايلات والتزمت كلش بصلاتي وصرت ملتزم وحتى عمرة رحت واعتمرت لوالدي ايضا تغيرت حياتي جذريا بس سجى ماتركتني وظلت تجيني بالكوابيس صرت اكره انام والندم والقهر اكل كلبي حسيت فعلا ظلمتها واحتمال هية انتحرت وكتلت نفسها من وراية تحطمت وجنت دائما استغفر وادعي ربي يسامحني ويخلصني من عقدة الذنب الي راح تظل تلاحقني طول عمري
وللقصة بقية ،،،،،،
