مازن ،،،ظليت كاعد ع درج الى ان اذن الفجر وبدة الصبح يطلع واني بين الصاحي والنايم
سجى ،،،صليت الفجر وعبالي مازن راح كعدت اموري وغسلتلة وبدلتلة وتريك وبلشت اراجعلة دروسة صارت ب7 ونص فتحت الباب وطلعت وشفت مازن
مازن ،،،وكفت وباوعت للأمير مر من يمي وعبالك اغراب ولا باوع بوجهي
سجى ،،،انت شجابك عبالي رحت
مازن،،،اريد احجي وياج طول الليل مانمت والف حسبة بالي
سجى ،،،كلت بكلبي اوووف ماراح يعوفني مازن بحالي وراح يظل ورة امير واحتمال يحرمني منة سايرتة وهمست شنو الحسبات الي بالك تفضل ادخل
مازن،،،دخلت وكعدت سجى راسي راح ينفجر اريد جاي
سجى،،اي لحظة رحت للمطبخ وسويتلة واني اعرف شنو الي يدور بالة وشنو الي ينتظرني
جبتلة الجاي وكعدت بوجهة شرب الجاي وكلي امير عندة جنسية اوراق ثبوتية بيان ولادة؟؟
سجى،، ليش تسأل ؟؟
مازن،،حقي لومو حقي اسأل ؟؟
سجى ،،،دنكت عندة شهادة جنسية بدون بيان ولادة
مازن ،،،همس سجلتي بأسم منو ؟؟؟
سجى،،باوعتلة وظليت ساكتة
صاح بصوت عالي احجي بأسم منو سجلتي
سجى،،،جفلت وهمست بأسمك مسجل
مازن ،،،شلون بأسمي ولج غبية لو تستغبين
سجى ،،كمت للغرفة وجبتلة الهوية مالت امير وشوفتة
مازن ،،،وكفت اباوع للهوية ولسجى ومصدوم امير مازن لطيف شلون هيج
سجى،،،ذولي ماعدهم شي صعب لتنسى معارفهم والمسؤولين الي عدهم وحتى الي طلعولي جنسية وغيروا اسمي حتى محد يتعرف علية من اهلي ومعارفي
مازن ،،،اممممم اشوف فليحة عرفت بسرعة اني ابو امير
سجى ،،،عرفت والله هاي الدكة الناقصة من فليحة الله ليوفقها
مازن ،،،جنتي ناوية تضمين علية وتظلين عايشة ومعيشة ابني بالحرام
سجى،،،غمضت واخذت نفس هسة شنو رايد مني لاتغثني ولا اغثك جيبلي من الاخر مازن
مازن،،، مااكدر اخذ امير منج ولا الي حق بس بنفس الوكت مستحيل اخلي يعيش بهيج وضع
سجى ،،،باوعتلة بغضب اي كمل
مازن ،،،بعد اذا تصلين الكرادة احش رجلج حش وذبحج على ايدي
سجى ،،، اي ؟؟؟
مازن،،،والشقة هاي تتركيها وتقطعين كل صلة بذولي السفلة
ظليت اسمع واباوعلة همست وين اروح
مازن ،،،بيتي تجين
سجى ،،،،صحت نعم عيني شنو تفضلت ؟؟
مازن ،،،عندج حل ثاني لو عاجبتج هالوضعية
سجى ،،،تريد نعيد غلطنة قبل 12 سنة اني مو ذيج سجى الطايشة الي تركض وراك ع العمياني
مازن ،،،غمضت وكتلها لا ان شاء الله الغلط ميتكرر هالمرة نعقد واخليج على ذمتي
سجى ،،،،ضحكت من كل كلبي شوف شلون دنيا من جنت الك وشريفة نكرتني وماقبلت تزوجني ومن صرت رقاصة جاييني تطلب مني تزوجني
مازن ،،صحت يعني شنو الحل برائيج اخلي ابني بهيج مزبلة لخاطر الله لو تريدين اخذة منج واخليج تحلمين تشوفين اظفرة وترة بالمحكمة وشرعا يحقلي اخذ حق الوصاية عليه اذا اثبتت شنو مهنة امة
سجى ،،،ضربتة راشدي وطردتة من البيت واتهسترت صراخ وبجي
مازن ،،،طلعت واكول بكلبي سامحيني سجى ماكو الا هالحل حتى اصحح غلطي
سجى ،،،حسيت روحي مختنكة ومازن راح يقضي على اخر امل الي بالحياة امير والي هو الوحيد الي بقالي بدنيتي وعرفت ماراح يتركني بحالي بس بنفس الوكت حتى اذا وافقت وتزوجني راح اعيش بتعاسة وماراح يحترمني وهو يعرف ماضية الاسود
