مازن،،،تغيرت حياتي جذريا وعدت علية 3 سنين تفكير وتعب وقهر تحطمت نفسيا وجسديا تزوجوا خواتي الاثنين وحسيت جزء من حملي خف تزوجوا اخواتي واني اتذكر دعاء سجى عليهم وجنت خايف لا تطلع بوحدة من اخواتي ظليت اني واخوي الصغير وامي ظلت بوحدها وجانت تريد من يعينها بالبيت جانت تريد مني اتزوج واني قافل مااريد اتزوج وكرهت كل مرة بهل دنيا وكلشي يذكرني بسجى الي صارت مثل الشبح الي يطاردني بحياتي
ظلت تلح علية ع الزواج امي وجانت صح تعبانة كتلها بكيفج كالت شنو تريد مواصفاتها كتلها بكيفج بس تكون بنت عالم وناس ومتدينة
خطبتلي الوالدة وحدة من اقاربنة ملتزمة جدا ومتدينة وعائلة جدا محترمة خطبنة وكل مااباوع بوجهة اشوف سجى كبالي وحتى جنت كل مااناديها سوسن اغلط واناديها سجى شكد جانت حبابة وبنت حلال ولاكدرت تدخل قلبي
سوسن ،،،،مازن شكد جان طيب وابن حلال بس جان جاف وجامد ومرات فجأة يصير عصبي جنت بالبداية اضوج من طباعة بعدين تعودت عليه
مازن،،،من قرب زواجي تعبت نفسيتي اكثر وكبرت معاناتي جنت اشوف وجه سجى بيها والكوابيس متتركني اتعرفت ع شيخ بمنطقتنة وصار شخص مقرب لان جنت ملتزم بالصلاة بكل فرض اصلي بالجامع رحت عليه وسألتة شلون اتخلص من هالكوابيس لان كمت اكره حتى انام كلي شنو قصة هالبنية وياك كتلة جانت تربطني بيها علاقة وتوفت بس تظل تلاحقني تعبت منها
الشيخ ،،،والله يامازن مااعرف شأكولك بس متجيك روحها الا اذا جانت تطلبك فد شي لان روحها ممرتاحة او احتمال تاركتلك فد شي وتريدك تاخذة عموما راح ارقيك وانطيك سور وادعية ترقي وتحصن بيها نفسك وواظب ع اذكار المساء وماقبل النوم وان شاء الله ترتاح
مازن،،،حيرني حجي الشيخ شلون احتمال تاركتلي فد شي او تطلبني شي وهي ماتت والطفل بطنها غلست على الحجي وواظبت على الاذكار والادعية ماارتاحيت كلش بس افضل من السابق
تزوجت وطبعا مكدرت اول يومين اتقرب لزوجتي احس نفسي مربط جانت متفهمة وطيبة وساعدتني اكدر اتجاوز هالمحنة بس حتى من دخلت عليها جنت احسها واتخيلها سجى
سوسن ،،،جان وبعز المعاشرة يناديني سجى وبالايام العادية وتعودت هالشي قبل جنة نتعارك وانجرح كل ميكولي سجى بس جان يحلف انه مانطق ولا ناداني بهل اسم واشوف شكد متأثر وموقصدة فكمت ماانتبه ولا اعقب وحتى من يناديني سجى اكولة نعم حبيبي
مازن ،،،جانت سوسن طيبة وبنت حلال وماغثتني ابد ظلينة سنة متزوجين ومصار عدنا طفل وجانت هية تتمنى يصير عدنا وكل متجيها الدورة الكاها تبجي مرة اجيت من الدوام ولكت نفس الشريط الي مرة خلتة بأيدي سجى لزمتة وايدي كامت ترجف اوووف شوكت تطلعين من حياتي ياربي ارحمني والله الي امر بي مو شوي عذاب بكل معنى الكلمة
طبت سوسن وشافت بأيدي الشريط وكعدت وبجت كالت تأخرت علية يوم واحد وجبت شريط فحص الحمل وهسة نزلتلي حتى قبل لا استخدمة وبجت كتلها سوسن شيلي هالفكرة من بالج ليش هالكد هالموضوع شاغل بالج كالت اني حاسة رب العالمين ماراح يرزقنة بطفل ولا راح اسمع كلمة ماما
كعدت كبالها وهمست ليش هيج دكولين ومسحت دموعها وكلت بكلبي وعبالك تعرفين بضيمي ولعنة سجى الي ماراح تفاركني طول عمري تذكرت من جانت تدعي علية وتصرخ وتبجي واكول معقولة رب العالمين راح يعاقبني ويحرمني من نعمة الاطفال
ومن كد مالحت سوسن علية اخذتها ورحنة على احسن دكتورة ومن بعد ماسوينا كل التحليلات والفحوصات كالت المدام عدها مشكلة وحملها صعب الا زرع
مازن ،،،جان مكلف الزرع ولان جانت تتمنى طفل وافقتها سوينة الزرع وحملت سوسن وجانت طايرة من الفرح بس اني مجانت عندي اي مشاعر وعبالك مات كل احساس بية
جانت فرحانة كلش سوسن وتعد يوم يوم لولادتها ومرة اخذتها لمول المنصور وجنة كاعدين ودنتعشة ومااعرف شلون رفعت عيني الطاولة الي كدامنة شفت سجى وككعت اللكمة من ايدي وبلا مااحس بروحي وكفت جانت تريد تطلع متغير لون شعرها واشياء متغيرة بيها واللبس والكشخة ووياها رجال جبير بالعمر وعبالك مسؤول وشواربة عالية وطاير وراها عبالك ممصدك وشايفها
اني بقيت مسطور وواكف معقولة تشبها لا هية لو شما تسوي وشما تغير بنفسها هية اعرفها من بين الف
منتبهت علية وسوسن ظلت تباوعلها وكالت اكو شي مازن !!!، ماااااااازن شبيك فضحتنة اكعد شكو شصار
مازن ،،،مارديت كتلها هسة اجي
لحكتها ومن الهوسة ضيعتهم وظليت ادور بالمول مثل المخبل وظليت بالساعة نسيت سوسن والعشة وكلشي من ايست وملكتها رجعت بس وجهي ميتفسر وسوسن صايرة نار وتعاركنة بيومها وجانت ليلة كشرة بعدين كلت اني لازم اراجع دكتور نفسي لان كمت اتخيلها بكل مكان وبوجه كل بنية
وللقصة
