هنادي

دمع عيني ونستي

#zainab_alnajar
الجزء العاشر

ليش عمار ليش .. هنادي منهارة كلش بالگوه مصبرة نفسها اول ما دخلت غرفتها قفلت الباب وتبجي بعمرها ما مقهوره هلگد ومن منو .. من اغلى انسان بگلبها .. صدگ اني هلگد غبيه وماشكيت .. هو هذا الموضوع طلع يا عمار ... متلهفه اشوفك ماضنيت راح تحجيلي عن زواجك.. اااه ياهم الي بگلبي ما تحمله جبال دخيلك يارب ريحني .. اول مره اضعف .. اول مره احس نفسي مكسورة ..
تذكرت كلام ست انتصار
_ هاي زوجته سارة
_ ليش عمار متزوج
_ اي معقوله ما تعرفين.. عنده اولاد 2 وبنيه من اخذها صغيرة عمرها 16 سنه والدته الله يرحمها گالتله ماما صغيرة ومامكمله دراستها وماتوالمك وهو گالها احسن اربيها على ايدي
رادت تسد اذانها وماتسمع . تريد تهرب من المكان .. اخذت امها گالتلها خلي نروح . تحس نفسها بعد ماتقاوم .. سلمت على لينا واجتي تطلع وصار عمار بوجهه .. لحيته عاليه والدمعه بعيونه .. بس هي دموعها تمسحها وتنزل رفعت راسها
_ البقاء لله ابو ياسر .. وتركته بسرعة تريد جرعة قوه بس توصل البيت بيها .. عمار كشف هي عرفت كلشي .. لا ارادي دموعه نزلت وعرف راح يخسرها ..

حسن دگ الباب ساعتها يالله انتبهت اجه يحاجيها وتفاجأة بشكل اخته
_ هنادي شبيج شصاير
_ مابيه شي حسوني ،، وتمسح دموعها ،، بس انقهرت على لينا خطيه منهارة الاهل شگد غالين .. دير بالك عليها هالايام محتاجتك صيرلها امها وابوها وحاول طلعها من حزنها
_ حبيبتي لينا قهرتيني عليها هنادي اروح اتصل بيها هسه خلص العزاء بلكي تجاوبني

راح حسن . وهنادي اول شيء سوته قفلت تلفونها ماتريد لا رساله ولا اتصال من عمار حتى صوته الي صارت مدمنه عليه ماتريد تضعف گدامه ونزلت تروح على ندى زوجة اخوها ..
- كافي هنادي لاتبجين اول مرة اشوفج ضعيفة .. خلينه نفكر شتسوين
_ ليش هو بعد بشنو افكر ندى.. كسرني .. ليش ما گال من الأول ليش خلاني اتعلق بي
_ حقج هنوده حبيبتي طولي بالج واسمعي منه
_ ندى هو المختارها ومحد غاصبه عليها ولا صاير ضرف بحياته يجبره .. ولج عنده 3 اطفال ويمكن حامل بالرابع من شفتها .. ولج زوجته حلوه وشفت نظرات الحب بعيونها اله .. ندى شتگولين اني مسويه شيء بحياتي ويريد ينتقم مني .. ماكو تفسير
_ لا انتقام ولا شي لازم تسمعي حتى ترتاحين
_ من طلعت وعرف بيه دريت شفت دمعه بعيونه بس شنو فايدتها ويجوز الدمعه على فراق والدته اي صح ليش تنزل عليه دموعه .. صورلي الدنيه جنه ندى اني الي بمراهقتي ماسويت خطأ وكلام الحب ما همني بيوم .. بس هو جنت احس بكلامه قبل لا يحجي .. احس حتى بأنفاسه .. وعيونه .. معقوله عيونه تكذب !!! .. ماريد اسمع شي منه حتى تلفوني قفلته
_ ليش قفلتي هو هسه محتاجج
_ محتاجني!! هو عنده حضن زوجته يرتاح بي .. اني محتاجة ارتاح اكثر منه
_ دكافي تبجين ياعيني شوفي شصار بحالج گومي غسلي وابقي يمي اليوم باتي لان علي خفر وحتى ماينتبهون عليج بالبيت
..
.

سكتاوي طعم الالم .. ومر الطعم ماينجرع
آثاره تدمي الگلب .. ودم نقلب هالدمع
ميخالف اتحمل انا .. واتحول بليلك شمع
بس لا تترك رويحتي .. صوت فراگك ينسمع
فارس معدل بالوصل .. لكن بهجرك مو سبع
محتاجج..