هنادي

ليس لي مكان

#هنادي

#الجزء 14

#zainab_alnajar

مرت ثلاث ايام وعمار على اعصابه مايعرف شنو رد هنادي .. لا هي تجاوبه ولا حسن گال ال لينا شي
بيوم بالليل اجتي سارة للصالة كلهم مجموعين .. وماعاجبها الوضع وتحجي ويه نفسها ..
_والله فوگاها ماعاجبها وين تلاگي مثل اخويه
_شبيج سارة شو تحجين ويه روحج
_ على هنادي افندي ماعاجبها العجب والله ماتقبل ما عنده شهادة .. اني گلتلها لامي من الاول مانروح هاي ام خشم
عمار ابتسم هسه يالله ارتاح _ لاتحجين على البنية والله حقها لو لينا هم ما انطيها شنو عبالكم لفلوس كلشي
_ اوي شدعواها هي شمكمله عود قابل دكتورة لا وجماله جبيرة
_ يعني شگد عمرها مثلاً وخبصتينا جبيره وجبيرة لو الا مثلج تتزوج عمرها 16 سنه ..
_ اليسمع يگول مو انت الي ردتني انت ردت وحده صغيرة ليش تنكر
هو النقاش ما يفيد وياج .. عافهم وطلع بالحديقة ويفكر بكلام سارة .. حقيقة هو راد ينتقم الكرامته بس هم يحبها .. مداريته وتسمع كلامة برغم لسانها وام اولاده بس ماتفهمه .. بعكس هنادي جاذبيتها بهدوئها بنزاكتها بحنيتها ضحكتها لا وتفهمه بدون مايحجي وهوايه اشياء تتشابه بينه وبينها.. بقى بصراع بين حبه الهنادي وحبه السارة
...
...
هنادي صارت كل يوم خميس تروح تشوف الاطفال وتاخذلهم هداية وتشجعهم هي ومهند تحس براحة وياهم وماتتذكر شي وهي يمهم .. مرات ترفع راسها تشوف مهند يباوعلها ومبتسم .. ومرات هي تباوع عليه شلون يعاملهم مثل اطفالة .. ياترى شنو داخله هذا الانسان
_ اگولك حسوني .. اشوف استاذ مهند دائما يجمع الاطفال الفقراء يوم الخميس بمطعم ،، استحت من اخوها تگوله اروح وياهم ،،
_ هاي ما ادري بيها بس اعرف بي مشترك بمنضمات مساعده المحتاجين وهسه عنده حمله بالكلية للنازحين ..
_ اهااا ربي يوفقة
_ هنوده صدك هاي عطله نصف السنه جتي شنو رأيكم نروح لكردستان كم يوم
_ والله ياريت شوف ماما وبابا وعلي واحمد تصير حلوه
_ ولج اريد اخذ لينا
_ اي شكو بيها تجي ويانه
_ هذا عمار هسه اكيد ما يقبل خلي اگوله حتى اذا يجي ويانه
اويلي يارب 😔 _ اي ماشي گولهم وشوف
وصدك ماقبل واتفقوا يروح هو وعائلته وياهم

حسن ولينا طايرين مثل الفراشات وفرحتهم مبينه بعيونهم واحساسهم بجفوف ايديهم واحد مايفارگ الثاني الا وقت النوم... اخوانها كلهم جانوا محتاجين هذه الاجازة الكل فرحان .. الا هنادي شگد تحاول تمنع نفسها من عمار وتشوفه گدامها لا والنوب هو وعائلته شنو قصده يريد يأذيني .. وهو مثل واحد المكتف مايگدر يوصل اليمها ماعنده غير نظراته يتبعها وين ماتروح .. غرفهم كلهم قريبات واحده على الثانيه بس هالمرة اهلها كلهم وياها وسارة زوجته لو بس شكت راح تفضحها وتفضحة يعرف بيها شگد تغار
الصبح گاعدين كلهم يفطرون بمطعم الفندق وفجأة ..
_ صباح الخير
_ 😯 صباح النور يا هلا استاذ مهند
_ شلونك حسن شلونج ست هنادي
_ بخير استاذ تفضل ويانه
_ تسلم حسوني شفتكم حبيت اسلم عليكم ،، باوع الهنادي ،، عندي شغل والله لازم اروح
_ نسيت اعرفك استاذ والدي واخواني علي واحمد واستاذ عمار تعرفه ولينا خطيبتي ..
_ اهلا بيك ابني تفضل ويانه ياعمي
گعد وياهم مهند حسن سأله
_ استاذ اجيت سياحة مثلنه
_ لا والله حسوني اجيت على النازحين ،، ونصه راسه ويحك شعره ،،
الكل انتبه وركز وياه
_ اجيت اروح للمخيم مو تدري بأخير حمله سويتها بالكلية وهسه جبنالهم مواد غذائية ورايحلهم ان شاءالله
_ بارك الله بيك ابني
_ هذا واجبي عمي كان ممكن احنه بمكانهم وهذوله جانوا معززين ببيوتهم الله يفرجها عليهم
هنادي گامت راحت على ابوها حاجته بصوت ناصي
_ بابا اريد اروح ويه استاذ مهند فدوه بابا الله يخليك
_ بابا وين تروحين يجوز المكان خطر وشلون لوحدج ويه الرجال
_ واحد من الولد يروح ويايه بابا تدري شگد اتمنى اساعدهم
وافق ابوها بس اخوتها ماقبلوا بعدين قنعت حسن يروح وياها بس مايتاخرون مايريد يضيع وقت بدون لينا
اما عمار صار نار وهو يشوف ويسمع الي يدور .. يتمنى يصرخ ويضرب ويكسر بس شراح يگول وشنو السلطة عليها .. صدگ الي يحب يصير اناني .. والي آلمه اكثر هنادي مارفعت عينها وباوعت عليه تغاضت عن وجوده جانت مشغوله تقنع اخوتها ومن وافق حسن راحت بسرعة تجهز نفسها ..
راحت ويه استاذ مهند وحسن اخوها لمخيمات النازحين .. بالبداية حيل تالمت وبجت الوضعهم وهي تسمع قصصهم اكثر العوائل مو كامله بكل عائلة شهداء او مفقودين والاطفال بحث آخر يكسرون الخاطر بس من بدأت توزع المساعدات وتشوف الفرحة بعيونهم ودعواتهم صارت دموعها فرح واستاذ مهند والفريق ما غاب عن بالهم شي حتى العاب الاطفال جايبيها تمنت تبقى اكثر بس حسن يريد يرجع ترخصت من استاذ مهند ووعدته تحاول تشاركهم عجبتها افكارهم ورجعوا اتصلوا بالباقين كانوا بأحد المصايف .. راحت على ابوها وبقت تسولفله على كلشي شافته وسوته وطلبت منه يسمحلها تنضم لهذا الفريق ابوها شجعها لان هنادي ماخذه اطباع كثيرة منه يباوعلها ابوها بعين فخر
راحت ويه لينا وحسن تتمشى عمار مايعرف بيها رجعت شافته هو وسارة واطفاله.. ويلعب وياهم بالمي واحد شايله على اكتافه وسارة رادت توگع مسكها وقريبه منه ويضحكون ..
هنادي ابتسمت من شافت سعادتهم ويه ابتسامتها دموعها .. عرفت قرارها صح وعرفت !!!
لن يكون لي مكان يوماً بحياتك
لن ابني سعادتي على سعادتك
يكفيني انك بخير
ولن اندم على قراري

عمار انتبه عليها من مرت ورجع العصبيته من تذكر هي راحت ويه مهند وما اهتمت الوجوده اصلاً
رجعوا كلهم للفندق وراحوا للمطعم ياكلون .. من يدخلون شافوا مهند والفريق كله يدخلون .. سلم عليهم واخذه ابو علي يسولفون انعجب بشخصية هذا الشاب .. عمار وجود مهند كلش يستفزه وماطايق وجوده .. هنادي ترخصت بس تروح تغير ملابسها وترجعلهم صعدت . واول ما فتحت الباب وماحست الا شخص لزمها من ايدها وسد حلگها ودخل وياها الغرفة
_ اش اسكتي هنادي
_ عمار شنو تخبلت هيج تسوي .. رجاءً اطلع بره مابيه حيل مشاكل و ماما وبابا ويايه بالغرفة هسه يجون وبعدين زوجتك وين تعرف اذا شافتك شراح تسوي
_ ولج اسكتي شويه اسكتي ..
صارت ويه الحايظ وعمار قريب منها كلش بحيث انفاسة تضرب بوجهها وعيونه بعيونها
_ تونستي ويه مهند افندي ؟ يحجي همس بس عيونه نار .. هنادي ساكته .. جاوبي خاتونه .. شنو قصدج من هيج تسوين
_ وشنو سويت اني .. اولاً مارحت اتونس .. ثانياً ما رحت لوحدي اخويه ويايه
_ بس فهميني شدسوين كل خميس تلتقين بي وهسه نظراته الج ورحتي تركضين وياه شتريدين تنتقمين مني لو تسويها وحده بوحدة شفتيني ويه سارة وتريدين تأذيني وتثيرين غيرتي
_ عمار لهنا وبس .. ابتعد شوية هاي وكفتك ويايه حرام .. دفعته بعيد عنها .. شوف ابو ياسر كل خميس نلتقي صح بس لو نازل وانت تراقبني جان شفت شنسوي .. نجمع الاطفال الفقراء ونحاول نسعدهم كم ساعة واني الي طلبت انضم اله ..
عمار مو هنادي الي تنتقم الكرامتها بأنسان مثل ما سويت انت ولاجل كرامتك تزوجت سارة .. وبرغم ما انت تگول تندمت اني شفت العكس سعاده وحب بعيونك الها والاطفالك وصدگني اني فرحت لسعادتك هاي .. بس تدري انت شنو انت اناني تريد حبي وحب سارة تريد تتملك قلبي وخلاص ومافكرت بمشاعري من خليتني اتعلق بيك وانت ملك انسانه ثانية!! المهم نفسك وغريزتك .. عمار روح لزوجتك اني مجرد نزوه بحياتك .. راح تنساني بيوم
_ ولج احبج هنادي وتريديني اتركج
_ وتحب سارة .. شنو من گلب عندك .. ما احبك .. روح اكرهني .. ليش تخونها ولك ماتستاهل .. ولا تتصور اكو شي بيني وبين مهند حالياً لا مايجمعنه غير عمل الخير
_ معقوله هنادي تجرحيني لهلدرجة كلماتج سكاكين بگلبي ولج ما اصدك هذا كلامج .. ما اصدك تروحين مني ..
_ لا صدگ .. واتمنى تكرهني حتى تنساني .. ارجوك اطلع ماريد مشاكل

‏أرأيت السماء كيف تُرافق الأرض في كل أحوالها ليلها ونهارُها بمطرها ودفئها ؟ أريـد أن أرافقك العُمر كله كَ رفقة السماءِ والارض .. لكنك لست لي سافارقك كفراق الشمس والقمر ارأيتهم التقوا يوماً!!

تصويت ورأيكم يهمني
الجزء القادم سيكون الاخير