هنادي
الجزء 15
#zainab_alnajar
_ طالع هنادي الضاهر نزلت نفسي كلش هواية.. صدگيني ما اضايقج بعد ماتصورت لهلحد كارهتني
_ ياريت اكرهك كان صار كلشي سهل عمار ياريت بسهوله اطلعك من گلبي .. حبنا عقيم
_ كان بأيدج يصير مثمر بس خلص الي مايريدني ما اريده وما افرض نفسي عليه
هنادي بغرفتها تتذكر اخير كلمات العمار ومن بعدها اختفى لا رسالة ولا اتصال
صراع بداخلها بين .. هذا احسن .. وبين اشتياقها اله حتى لو كانت ماتجاوبه بس تحس هو بعده يتذكرها
،، كافي هنادي هذا افضل ..
عندما تحب شخصاً من قلبك لا تتغير مشاعرك تجاهه ؛ حتى لو أخطاء ؛ لأن العقل هو الذي يغضب ..
أما القلب فيبقى مليئاً بالحب
رجعت هنادي للدوام ونفس روتين حياتها و ماكو احد يرسم الضحكة على شفاها غير الطفله رهف بس حاولت تبتعد عن مهند خافت يكون كلام عمار صح ماتريد تجرب مشاعر من جديد وجانت الها وجهه نظر
عمار بكثر ما كان زعلان من كلامها الاخير بس مايگدر الا يروح يشوفها ويلاحضها تعبانه اغلب الوقت والحياة الجانت تنعكس بوجهها هسه اختفت .. مرات يلوم نفسه ومرات يلومها هي لان مانطت فرصه لعلاقتهم كان مقتنع يتقدملها ونسى كل العواقب راح يأثر بيها على كل المحيطين بي .. زوجته .. اطفاله .. واخته .. بعكس هنادي الفكرت بكل الاحتمالات
مهند انتبه على غياب هنادي عنه جانت تجي تشوف الطفله وتروح بطلت تگعد وياهم بدون ما يحس وجد نفسه يدور عليها .. هو الي ماهمه حب او عاطفة من يوم استشهاد اهله بس لحد الان مايعرف هذا حب او اعجاب بشخصيتها
اليوم خميس اخذ رهوفه ودخل للمطعم ينتظر هنادي اليوم لازم يحاجيها يريد يعرف ليش ابتعدت
اجتي ادور على الطفلة مهند گالها انتظري لاتطلعين وراح هو عليها
_ ست هنادي شلونج
_ اهلا استاذ بخير الحمدلله
_ ست تفضلي ويانه
_ اعتذر والله ما اگدر ،، ونصت راسها ،،
_ اريد احجي وياج بموضوع وان شاءالله ماتتاخرين ،، يحك بشعره ،،
_ ماشي استاذ ،، ودخلت للمطعم وهي متردده
جانت مشتاقة للاطفال واستقبلوها نست نفسها وياهم وتضحك من گلبها ..
_ امممم هنادي .. اسمحيلي ارفع التكلفه 😊
_ عادي استاذ اخذ راحتك
_ لاتعتبري تدخل مني بحياتج ولا اريد افرض شي عليج .. بس ليش بطلتي ماتجين من ننجمع ويه الاطفال تدرين بيهم شگد حبوج وحتى الفريق يسألون عليج كان بودي تنضمين النا بعد الي شفته منج وكمية الحماسة والحنيه الي بداخلك
_ تنهدت وگالتله .. والله اني هم احبهم واستمتع وياهم .. بس تعرف نظرة الناس و ماكو احد يخلص من لسانهم واني كلشي ولا احد يذكرني بسوء .. استاذ احنه عايشين بمجتمع تحكمه عادات وتقاليد ومادامنه عايشين بي لازم نحترمها ونتقبلها .. ،، نصت راسها ،، تدري استاذ من جنت اجي هنا اهلي ما يعرفون واني مامتعوده اكذب عليهم صح اني لعمل الخير بس الناس ما يعرفون هذا الشي والهم الضاهر جنت احس بذنب والفريق اتمنى انضم بس كله شباب واخذت رأي الوالد ورفض للاسف
_ هاي بسيطة جان گلتيلي من الاول ليش الاحراج .. اكو فريق بس بنات وتطوعي وما شاء الله عدهن حماسة مثلج وشغلهن بسيط حملات دعائية وتجمعون مبالغ ماتروحون حتى للمخيمات .. المهم من هذا كله نساعد المحتاج وكل من ضاقت الدنيا عليه
،، رفعت راسها .. _ صدگ استاذ 😇 والله ياريت .. شافت عيون مهند تلمع ودموع يقاومها وتهدد تنزل
_ شبيك استاذ
_ هنادي من فقدت اهلي بانفجار جنت منهار كلش والدي تصوب وحالياً حركته كلش قليلة.. حسيت الدنيا انتهت خلاص ليش عايش والمن اعيش .. لحد ما تعرفت على شخص مثلي فاقد كل اهله بس كان مبتسم گلتله معقوله تبتسم بعد كل الي صار بيك .. اخذني وياه ورحنه لحي فقير كلش وجان ماخذ وياه اكل وملابس و العاب.. من وصلنا وتجمعوا الناس عليه لان يعرفوا وهو يوزعلهم ويضحك من يشوف ضحكتهم .. ورجع اخذني على شخص كانت عمليته ثاني يوم وضعه خطر وما عنده فلوسها .. طلع فلوس العمليه وباسه وطلع وهو يسمع ضحك عائلته ودعائهم .. عرفت رب العالمين ياخذ شي وينطيني شي .. عائلتي راحت بس عندي صحة وفلوس من وكتها عرفت شنو السعادة .. ههههه دوختج ويايه هنادي .. بس ما اعرف ليش حجيتلج هاي اول مره احجي ،،
_ بالعكس استاذ كلامك حيل مؤثر .. الله يرحم عائلتك ويخليلك الوالد ويبارك باعمالك .. استاذ راح افاتح الوالد بفريق البنات ان شاءالله يقبل هههه هم اخذتنه السوالف وتأخرت ..
_ خليني اوصلج هالمره ولاتخافين انزلج مكان قريب على بيتكم
_ ماشي استاذ 🙈 واذا الوالد قبل اگوله الحسن يگولك وتسجلني وياكم
_ لا اخذي رقمي حتى اگولج شنو اللازم تسوي
