بقلم اماسي الليل ( ام مريم)
سماره: من صدمتي ونار قلبي حسيت جاسم مثل الچمره الي مخليها جوه رجلي وين ما اخطي تچويني ... تاهت عليه امشي بلا وعي هاي دموع لو مطر احس السما تبچي على حالي
زاد المطر ومغوشه عيوني بين دموع وبين قطرات مطر احسها تغسل هالدموع .... فقدت احس نفسي بسجن ... ويا هالسجان مراح يعتقني الا يعذبني ... ربي اليتيم ماعنده حوبه عندك
ليش ربي تسلمني بيده ... واني اسجدلك راجيه تخلصني منه ...محاسه دا اصيح بصوت عالي ... الا من شفت امي
اطبطب على چتفي
ايمان: ميخالف بنتي ربج ... احن من الكل ...
ميصير تحچين هيج ... ولهسه مندري الولد ... شنو حالته
ادعيله ... يطلع عايش
سماره: اسمع امي بس ما حاسه بيها بس احس كل ما يخلون الشمسيه على راسي ابعدها ... اريد المطر يغسلني من همي
اريده يبقيني صاحيه... وعندي يقين ربي مراح يعوفني ...
ويا كل شهگه احس رحمة الله تزيد ... وتزيد قطرات المطر ...
حسيت ما بقت عندي دموع ... ووصلت للنهايه ... ثنيت ركبتي وگعدت عليها بالكاع ... ونزلت راسي وتجيت جسمي من خليت ايدي على الگاع.... اضرب بتك ايد ... وبصوت عالي ربي ارحمني ... تعبت
ولتخليني أيئس من رحمتك واطلع عن هدايتك .... اذا انت ما نصفتني منو الينصفني ...
ايمان: ابچي عليها ...كافي ماما محد يكدر يأذيج واني موجوده حتى لو اعرف
اقتله ... ربي بنيتي راح تروح مني.... ربي لبسوها ثوب الهم وهي بعدها ما شافت من الدنيا شي
الله لايوفقك يا جاسم ابن بدريه اريد حوبة هاليتيمه تطلع بيك ...
گومي ماما گولي يا رب
سماره: رفعت راسي يا رب .. ردت اگوم ...يمه ..مابيه اكوم احس رجلي مشلوله
ايمان : اسم الله ماما ... ماما محمد يمه شيل اختك ويايه ..
سماره : سندوني ووصلوني للبيت مشت رجلي وياهم بس اني لا حاسه بخطوات ولا حاسه بمكان .... من دخلت البيت ... ركضت ادگ على بيت ناطق بلكت احد يطلعلي ... اجاني صوت مخنوگ بالدموع
الو
سماره : الو زينب .. تعرفين شي عن ناطق
زينب: نقلوا للمستشفى
سماره: سمعت صوت جاي قريب على زينب .... سدي كل الي جراله من وراها
زينب: سماره راح اروح
سماره: زينب فدوه بس طمنيني عن ناطق ... والله اني ما الي
ذنب ... هو ابن عمي بس والله اني اكرهه...
توت ... توت... توت
من سدت الخط عرفت مو هي احد ثاني ...بقيت لاحول ولا قوه انتظر اسمع خبر من عمي .... وقلبي نار والدموع مفارگت عيني
الصدك ما عرفت ابچي على ناطق على حظي.......... ابچي وبقلبي اگول هاي حوبة ابراهيم طلعت بيه وبأخو الله لا يوفقه
هو وگف بطريقنا اني ما الي ذنب
گابلت الشباك الكدام باب البيت وگعدت انتظر عمي يجي واعرف منه الاخبار .... صفنت على الجو المغيم ... والهوا عالي ... يضرب هالشجر ... يميل لكن مينكسر وتخيلت نفسي مثله هالمنظر ...واحجي ويا روحي هم يجي يوم ... ورا هالعاصفه ...تصفى حياتي وتطلعلي شمس وابقى صامده وماانكسر ..هم يجي يوم واتذكر هالايام واني مبتسمه كدرت اعديها ... واعيش سعيده بعد هالحزن ...
تنهدت بحسره... ياربي عندك كلشي ممكن ... ماكو مستحيل
انداريت ... اشوف امي گاعده تصلي وعيونها مليانه دموع ...
انداريت على الشباك وعيني على السما ياربي شيل حملي عن امي ... ... وراها بكم ساعة ...دخل عمي وجهه تعبان ... رحت سألته على ناطق حقد عليه ...
عيسى: ما همج ابني ... تسألين على خطيبج .... كلشي مابي ابني اللي راح ينسجن .... ساعه سوده يوم الي شفتج واخذت امج ....
ايمان: عيسى ... لتذب بلاك علينا ابنك شراني ... وما بقلبه رحمه
والي مثله ... اكيد نهايته السجن ....
سماره: عمي مقهور وگاعد مخلي ايده على راسه ... حتى ما رد على امي ... گتله عمو فهمنا شنو الي صار مو وكت عصبيه وتتعاركون اني اخلي ناطق ... يتنازل بس فهمنا
عيسى: ناطق جان طالع عليج ... يجيبج من المدرسه ... تابعه جاسم ... گايله اذا ما طلگتها ... افرغ المسدس ... براسك
ناطق ... ضاربه ومحاول يبعد المسدس عن أيد جاسم ... لكن من متلازمين جاسم ضغط على الزناد طالعه طلقه ض ... ببطن ناطق ... جاسم شايفه واگع منهزم ميدري ...باي مكان انضرب ...شايفهم حمزه ابن شاكر العطار ... صديق اخوة ناطق من ديضاربون ... راكض مبلغ اخوة ناطق
طلعوا لاخوهم وبلغوا المركز ... ولزموا جاسم ... بتهمة شروع بالقتل ... وهسه دزولي خبر ... الولد عمليته نجحت لان الطلقة
مخترقه الكلية اليسرى والفص الأيمن من الكبد وجرح طولى ب المعدة والأمعاء الدقيقة واصابته بالغة ودخلوا غرفة العمليات 4 ساعات گلت ما راح يعيش بس الحمد لله طلعوا قبل ساعة واموره زينه دخلوا للعنايه المركزه وهسه قبل لا اجي بدقايق بلغوني اتعدى مرحلة الخطر .....
سماره : الحمد لله والشكر ... لتخاف عمو اني من يصير زين اخلي يتنازل عن القضيه
عيسى: عمو ... فسخوا الخطوبه ... ما يردوج بعد ... امه وابو گلولي ... لا توصلين ولا تشوفي ... ميريدون يشوفوج ... محمليج سبب الي صار بين جاسم وناطق ...
ايمان: يطبهم مرض وهي شعليها قابل هي ضربته ...
سماره: ما كدرت احجي شي بس دموع تنزل ... اوف يا سماره
جاسم حرمج من ابراهيم وهسه من ناطق ...يا خوفي تالي يغدرج القدر والنصيب وتصيرين اله ... بعد كل هالقهر ... ينتظرج قهر وضيم اكثر وياه
مرت كم يوم ... امي قنعتني بكلامها نفسخ الخطوبه احسن ...دزت امي الشغلات الي جايبها الي ناطق لبيت اهله ... الولد بعده بالمستشفى ... (الي عرفته من مرت اخو ميدري وسأل عني اهله گايليله ما اجتي ولا سألت عنك ... وامها دزتلنا خبر سماره تريد تفسخ الخطوبه والولد مقهور منج ... گلهم يمكن جبروها .... امه گايلتله لا شافت ابن عمها دخل للسجن خلصت منه وبعد ماعدها مصلحه وياك لو تهمها ومغزر بيها جان سألت هي وامها عليك ) ... اني من هالموقف جان اكدر اروحله وابين كذبهم ... بس گلت ماكو فايده ... ماطول كذبوا ولفقوا ولفوا السالفه عليه ذولي هم يتعبوني اذا اخذته ويبقون معاديني ويكرهوني طول العمر ... كلام امي صح خلي كل واحد يروح ب طريقه ... بعد مترهم هو الولد ..الله طلعه من الموت بسببي وحقهم اهله ... يخافون عليه ... شكد ما مقهوره على عمي شكد ما بداخلي مرتاحه جاسم بالسجن .. ومرات اگول ان شاء الله ميطلع منه بس ارجع اگول لا الله يفرجها عليه لخاطر امه وابو .. مو هينه عليهم واكيد ابراهيم هم مقهور ... على اخو .. مهما يكون يبقون اخوه ووكت الشده واحد يحن على الثاني ....
ثاني يوم اجى عمي (گلها لامي فوك المشكله الي على راسي انوب ابراهيم من عرف سماره مو عاقده واهل الولد فسخوا الخطوبه يريدها
واني ... ما اكدر بعد اخذها اله واخو بالسجن بسببها ... وصارتلنا مشكله بالبيت بقت امه ادگ وتلطم ... گلتله اذا تاخذها لا انت ابني ولا اني امك ... اذا فاتحج بالموضوع صدي ..وسماره تگله ما اريدك) ...
ومره ثانيه انكتبلي اتواجه ويا ابراهيم وما اصير اله بسبب جاسم
اندگت الباب طلع محمد ... رجع گال ابراهيم يريدج انت وامي ... يگول ما اكدر ادخل حالف ... امي گلتلي والله هالولد ... حرام اخو جاسم ... طلعنا ....
ابراهيم: شلونج يمه
ايمان : الله يسلمك يمه ... ادفع كفارة لحلفك بساعة عصبيه وتعال فوت
ابراهيم : اذا انطيتيني الي جايج عليه ادفع كفاره وافوت بيتج
رايد سماره
ايمان: يمه مترهم انت عاقل وتعرف اني اذا انطيك بنتي ... وابوك رجلي مقابل ولا امك قابله معناها دا احاربهم ... بالاخص
قلبهم محروگ على اخوك ومحمليها فعلت اخوك ودخوله السجن
يمه سماره يتيمه مو حمل بهذله ... وقهر ... امك متريدها ... وحالفه عليك ...
ابراهيم : اگعدها وحدها ... سماره وافقي لتخافين معليج بيهم
والله محد يكدر يندگ بيج
سماره: ما اكدر ... گتلك لو بغير ظروف والله ما اقبل بغيرك ...
بس بوضعنا ماكو امل ... اذا اوافق معناها اهجم بيت امي ...
وامك تغضب عليك وانت متستاهل غير الخير ... ان شاء الله تاخذ الاحسن يجوز ربك ما كاتب اصير من نصيبك كاتبلك الاحسن مني
ابواهيم : سماره لتخبليني ... تفكرين بالكل واني متفكرين بيه
لج وافقي ... وطز بالكل ... هي تصفى
سماره: (بداخلي اريد انهي هالموضوع واگله موافقه وقلبي ملهوف عليه ... خايفه اگله لا وينقهر والله حتى حسيت عندي مشاعر تجاه هالولد ... بس ما مكتوبلي اصير من نصيبه ...الكل ضدنا ... لا زم اصده
ابراهيم من گتلك وعد اذا جاسم عافني اصير الك ردت اهديك .. وابعدك عن المشاكل ... مجنت صادقه ... الصدگ ما افكر بيك كزوج .. انت اخويه ... وما اكدر اشوفك غير اخ
ابراهيم: انت كذابه ... اني مو غبي من اجيت اطلبج مره ثانيه اعرف من وعدتيني مجنتي تكذبين .. واعرف مجبوره على هالكلام ...بس انطيني مجال ... اقنعهم ...واخلي ابويه وامي يوافقون ...ساعتها ماعندج حجه لا انتي ولا امي
ايمان: لا والله ماعندي حجه اذا ابوك وامك قبلوا تاخذ سماره برضاتهم ... ازوجكياها... وتعال اكعد يمي ... اخاف وجودها بيتكم يسبب مشاكل بينها وبين امك
ابراهيم : سماره مو تغدرين بيه وترجعين لخطيبج اذا راد يرجعلج
سماره: ما اريد اوعدك بشي امري مو بيدي ... بيدهم ... بس لو بأختياري ما اقبل بغيرك يا ابن عمي ...
ابراهيم : ان شاء الله ... متصيرين لغيري
