بقلم اماسي الليل
ثاني يوم الصبح امي وصلت سولفتلها على سوالف خالتي وبناتها ... وموقف منذر ...
ارتاحت ... خالاتي جانوا كلهن ملتمات بيت بيبيتي وبناتهم المتزوجات ... خالتي امنه گلتلي اليوم نروح ناخذلج بدلتين
بعد البسيهم .. وخلي رجلج يتباهه بجمال مرته
جاوبتها خاله لازم اتصل عليه ما اكدر اطلع بدون علمه
اتصلت بي ورا ما رجع من الدوام الو مرحبا عمو
عمي: هلو عمو شلونج حبيبتي
سماره: بخير اسأل عليك اذا متصير زحمه عمو منذر رجع من دوامه
عمي: هسه اصيحه ...
سماره: اعتذر راح اتعبك
عمي: لا بنيني ماكو تعب ....
منذر: الو سمسم شعجب مخابره هيج وكت حبيبتي خو ماكو شي
سماره: لا الحمد لله ماكو شي بس اريد اروح ويا خالاتي وبنات خالاتي اخذ بدله ثانية
منذر: اني امرلج اخذج
سماره: ما اريد اتشوفها مثل الورديه ... وترى وامي ويايه
منذر: لا اني اجي اخذكم وعود ابقى بالسياره ... ما اشوفها
بس انتِ حبيبتي ... على كيفج ويايه مو ياخذج الواهس الحفله بس بنات وتفلتيها
سماره: خليني اللبس براحتي ...الورديه اروح بيها ( والثانيه اللبسها هناك يعني بس انتَ اتشوفها
منذر:اجي هسه والله مشتاقلج
سماره: حبيبي والله البيت مليان حتى ما اكدر اكعد وياك
منذر: ماشي ... شوكت تريدين امرلكم
سماره: ب٦ قلبي
منذر: دبقي ويايه منا لسته... اگلج ورا منخلص من حفلة المهر حبيبتي نبدي نكمل الشقه والكهربائيات
سماره: حبيبي بعد وكت خليها على العطله
منذر: سماره اني احتمال قبل مداومين سادس اسوي العرس
سماره: منذر اخاف امي متقبل ...
منذر: اني اقنعها بس انتِ بيضي وجه وطلعي معدل حتى تأمن انت مملتهيه
حبيبتي متريدين ننجمع بيت وحدنا ... من ارجع من الدوام الگاج تنتظريني .. وتالي الليل تنامين بحضني ...
سماره: حبيبي والله اني هم اريدك على طول ويايه ... بس اخاف من اتزوج بالسادس ... ما اطلع معدل
منذر: لانتزوج بالسادس ..حتى ...تاخذين عليه وعلى البيت بين ما تبدي المدرسه ... ذاك الوكت مرتبه امورج ... واني وياج اسندج دراسيا وعاطفيا هههه
سماره: الاسناد العاطفي متأكده منه ... متقصر بس الدراسي
اخاف تلهيني عنه بالاسناد العاطفي
منذر: سماره ولد خالتج هم يمكم بالبيت
سماره: بقلبي اوف متوب .... لا حبيبي ماكو احد وولد خالاتي كلهم كبار ومتزوجين
منذر: يعني يجون يم بيت جدو
سماره: اي مرات يجون هم ونسوانهم يسلمون يبقون شويه ويروحون بس هاي تصدف ... الجمعه لو اذا احد مر لخالتي
امنه لان بيتها قريب علينا يمرون
منذر: سماره اخر يوم امتحانات... ورا بسبوع نتزوج
سماره: ابتسمت ... بقلبي حرام اذا انت عقلك مال واحد اكبر مني ب١١ سنه .....
يله راح اروح ابدل ... انتظرك
منذر: يله حبيبتي .... ما اتأخر عليج بس اليوم كله طبيعي ما ريد مثل البارحه ...
سماره: ماشي يله انتظرك ..... مر علينا .... رحت ويا امي وخالتي وبت خالتي .... اخذت فستان فضي فيزون ترتر( هذا المويل بوقتنا حفرة الصدر چبيره والظهر هم حفرته چبيره بدون ردن وقصيره فوگ الركبه بشبر تقريبا ) لان بدلتي الورديه طويله وبيها ردن
صح حلوه ونازكه ومنذر رادها ...بس ردت شي يلفت الانتباه
الصدك من قستها ردت اصيحه اخاف يعترض بعدين بس بطلت گلت يشوفها يوم المهر ...
اخذتها وبقيت قلقه اخاف تصيرلي مشكله وياه من رجعنا ..
گتله منذر انزل شويه ...نكعد بالحديقه وكت غروب
هو ميگول لا ... نزلنا امي وخالتي وبت خالتي دخلوا واني ويا كعدنا على المرجوحه
منذر ترى الي اخذتها قصيره وبدون ردن
منذر: جيبيها خلي اشوفها ...
سماره: لا باجر تشوفها بس گتلك حتى متتفاجئ وتسويلي مشكله
منذر : يعني باجر مشخلعه حبيبتي ... كومي البسيها وصيحيني اجي اشوفها يله اقرر
سماره:لا منذر عفيه لتتنحس ... قابل تغار عليه من البنات
منذر : اي والله اغار عليج ... متكيفين ... اريدج الي وحدي
سماره: لا ما اكيف...راح تخليني البسها مو بوسته من خده
منذر: لا ما اتقشمر ... الا اشوفها ..
سماره: لا متشوفها باجر تشوفها حتى لو تزعل وراها اصالحك
منذر: هههه والله شكلج راح تجلطيني ... باجر
سماره : اني ما اعترضت من اختاريت البدله الورديه مشيت على مرامك هسه انت هم لازم متعترض على الفستان
منذر: سمسم انتِ مخليه حمره
سماره: والله ممخليه ... شوف مسحت شفتي بأيدي ابتسم
منذر : لا اني اريد اشوف .... ماطول الدنيا ظلمه تعالي اكعدي على رجلي
سماره: ما اكعد الا توافق
منذر: البسيها ... وهذا اسلوب المساومه ما احبه ... مال رخيصات بعد لتعيدي ...
سماره: گام وطلع زعلان ..... حتى مخلاني احجي شي
كلش انغثيت ... ومعرفت مني الغلط لو هو نحس واكو امور ميتقبلها ....
من ضوجتي صعدت نمت ...
ثاني يوم كعدنا الكل مخبوصين ... اتوقعته مراح يجي عليه مثل ما اتفق ويايه هو يوديني للصالون ...
بس اجى على الموعد ... من طلعت سلمت عليه ما رد
طلعت امي ورايه ... وصلني ...
منذر: خاله من تخلصون دگيلي ارجعكم
سماره: جنت مقرره اخلي مكياج فاتح ... حتى اخلص من لسانه ...بس ركبني العناد ... گلت خلي اعلگها هو زعلان زعلان خلي ... ارضي نفسي واسوي الشي الي عاجبني ... اخذت المجله الي بالصالون گلبت بيها بين ميجي دوري ... اختاريت تسريحه ومكياج .... ألوانه ترهم على البدلات ... بحيث من باوعت لنفسي بالمرايه الظل فضي واسود والحمره ...وردي طوخ (فوشي) گلتلي خليتلج حمره سحريه لان امج گلتلي اخاف تروح ...طوختها ... بقلبي گتلها حلو حتى اذا اريد اتراجع وامسحها مابيها خط رجعه ... يله سماره هو زعلان اصلا ...
لبست البدله... اتصلت عليه امي ... گلها لتطلع اني من اوصل ادگ باب الصالون
شويه ووصل طلعتله بس شفت هزت الراس ...مال واحد متحلف ... ميكدر يحجي كدام امي ... وصلنا للبيت ورجع ... يمكن على كد مسافة الطريق ودگ عليه
منذر: دتسويها شغل عناد ... اظاهر بدا يطلع وجهج الحقيقي
روحي وحدج للقاعه ...
سماره: بدت دموعي تنزل ...وبداخلي متت خوف ورچفه بجسمي
من كلامه بس اذتني حجايته مال يطلع وجهج الحقيقي جاوبته
دا ابچي ماكو داعي اروح للقاعه ... يجوز رب العالمين سبب سبب حتى لهنا و
يفرقنا لان انت شكاك ومتعب نفسك ... واني نظيفه لدرجه اتصرف طبيعي زياده عن اللزوم وممكن انت تفسر هالشي على
مزاجك وقناعاتك ...وشفت عندي وجه ثاني ...
انسد التلفون بوجهي ....طگيت بچي.... ومحد يدري بلي صار والكل ... جوا دتحضر نفسها
