بقلم اماسي الليل ( ام مريم )
سماره: ثاني يوم رجعت من الدوام ... بسرعة دخلت سلمت وصعدت ابدل ملابسي ...بيبي وين جدوا ... گلتلي من سمع راح يجي منذر طلع يجيب فواكه
بيبي ليش خليتي يروح خطيه وين بي حيل ... يعني منذر قابل يدري عدنا احد ويعتب اذا مجبناله فواكه ....
بيبيتي وجدي .... شايلين قلب ونفس طيبه لدرجه متتخيلوها
عايشين على التقاعد... واني استلم راتب ابويه ...مرتبين امورنا
وخالتي القريبه هم ما مقصره عليهم كل متمر تجيبلهم مسواك ملابس شنو محتاجين ... تذكرهم ..بالاخص بعد ما كبروا ولدها وبناتها وكلهم متزوجين ومتوظفين بعد ماعدها مسؤوليات تكدر تساعدهم ....
بيبيتي وجدي مرضى بالنظافه ... بيتهم اصلا ميتوسخ لان كلشي يرجع لمكانه ... وميفوتون البيت بالمداس او الاحذيه
كلشي مرتب ومنظم لكن من اتفوتون البيت اثاثه على السبعينيات وكت ما چانت بيبيتي شابه ومأثثه بيتها وعدها امي وخالتي ممتزوجات ....
الصاله بيها تخم قنفات روميو وجوليت ... والبوفيه والطبلات خشب الصاج والسجاده الايرانيه ...
والهول بي تخم قديفه ازرق وصاج ... وتلفزيون محطوط على ميز بي رفوف زجاج من جوه والبيبان هم جام و البردات بيج وبيها نقشه زركه مثل الزنبقه طبعا هاي البردات جانت موجوده بكل بيت عراقي والزوليه صاحبة النقشه المعهوده بكل بيت عراقي مع تغير اللون ... انتاج شركة الغزل والنسيج العراقيه ... بيت جدي الون الاغلب هو الازرق
وغرفة النوم سرير حديد بي اعمده ... وبرده تول شفافه ... لونها ابيض تغطي السرير
والفرشه ورديه بيها بجعات والمخاد مكتوب عليها احلام سعيده
والميز تواليت والكنتور خشب صاج اهم شي المخده ريش ... من اصعد انام مرات ابقى اطلع ريشه واللعب بيها الى ان انام
- [ ] اما المطبخ بي ديلاب لونه شذري بصف الطباخ وميز ينطوي رجلية ستيل اسود ..والكراسي هم تنطوي... وكاونتر خشب لونه ابيض...
دخلت للمطبخ... احضر الغدا... دخل ورا شويه جدي جايب المسواگ
الجد: هابابا حضرتي غدا زين
سماره: انطيته كلاص مي ...جدو منذر مو غريب صار..... عادي ياكل مثل اكلنا ...
الجد: بابا مو ميصير اول يوم يجي يتغدا عدنا .... لازم نسويله عزيمه
سماره: لا عادي هو ميدور هالسوالف ... ثانيا انت ليش رايح وشايل هالمسواگ وحدك ... اليوم هلكت من ورا منذر لو ادري مگايلتله تعال تغدا يمنا
الجد: جدو بعدني شباب ... وين بيبيتج
سماره: بوسته حبيبي الله يحفظك ... بيبي كاعده تشمس بالسطح بهالحر ( تگول الشمس اطيب وجع مفاصلي وعظامي فخطيه تصعد تكعد وتفتح شمسيه على راسها ... والشمس تلوح بس رجليها ... جدي وبيبيتي شكلهم حلو ... تحسوهم شي انتيكه راقيين بتصرفاتهم ونظام حياتهم واخلاقهم ...)....
خلصت طبخ ... فتت سبحت لبست دشداشه قطن ... نص ردن ...مجان عندي اهتمام .. لنفسي كوحده عاقده وتفكر .. لازم تعجب خطيبها(زوجها) ... يمكن السبب اني احب اكون طبيعيه ما احب المظاهر ولا احب اضحك على احد اريده يتقبلني مثل ما اني ....
سمعت صوت الباب اندكت عرفت منذر وصل .... طلعت فتحتله الباب ...وجهه احمر من الحر ...( بشرته بيضه وعيونه بيها لون عسلي شعره اسود )... هلو شفته طلع غراض من السياره وعلبه
منذر : شلونج حبيبيتي اخذي الكيكه بين ما اجيب بقيه الغراض
سماره: الحمد لله ... (اخذت العلبه من ايده ودخلنا للبيت... تعال غسل وجهك )
منذر : وحدج بالبيت
سماره : لا تعال غسل بين ما اصعد اصيحهم .. گلي انتظريني نصعد سوا . رحت خليت الكيكه بالثلاجه ورجعتله بيدي كلاص مي
منذر: اخذت المي ....سموره شو اليوم هم راجعه تخجلين مني ...
جبتلج غراض عود شوفيها
سماره : ...بداخلي جنت فرحانه من انطاني الكيكه...خلص هذا الشخص صار ولي امري ...والشي الي يجيبه جايبه علمودي
ويحاول يرضيني مو مثل البقيه اني احاول ارضيهم
لا مخجلانه يله خلصت خلي نصعد ...
منذر : تقربت عليها خليت ايدي على چتفها ...تعالي نكعد شويه
بين مينزلون ...
سماره: مقبل يگعد بالصاله حب الهول ... لان بارد .. گلي وصيت نور ( اخته)... جابتلج هالشغلات لان اني ما اعرف بهالسوالف
رحت فتحت لگيت سشوار وفرچ شعر ورولات وعلب مكياج ... وبجايم ... وتلفون ... گلي هذا اربطي بدل مالتكم ومن ادك تكدرين تصعدي للغرفه تحجين ويايه جاوبته واير ليس... گلي اي
شكرا تعبتك
منذر: حبيبتي هالايام تطلعين انتِ ونور وامي تكملون شغلة االذهب وباقي الامو. علمود حفلة المهر ... بس يرتبون شغلة القاعه ... نحدد اليوم
سماره: ياريت تخلوها يوم خميس حتى ثاني يوم ماعندي دوام
منذر : گتلهم ... يختاروا خميس
سماره: خلي اصعد الغراض وتعال ويايه اصيحهم من السطح
خلى ايده على چتفي راد يشوف الغرفه الي انام بيها ....
دخل ويايه بالغرفه ... گتله هاي غرفة امي ... قبل متزوج ابويه شفته ديتفحص المكان ...
منذر: وغرفتج قبل متزوجيني .... اريد اوصي على غرفة نوم بيضه عاجبني ... تحبيها بيضه لو صاج
سماره: بكيفك ميفرق عندي .... خلي اصيحهم حتى ننزل نتغدا ابتسم
منذر: اني اصيحهم انتِ خلي مكياج اريد اشوفه عليج ... والغرفه نختارها .. سوا ان شاء الله
سماره: طلع خليت كحل وحمره وحمرة خد ... ارتاحيت لان
ميحب يفرض رآيه يحب يشاركني بالاختيار ... وبسيط ميدور مظاهر. مثل امه ...
من نزلت ... جان گاعد ويا بيبيتي وجدي ... من شافني ابتسم
سألتهم اجيب الميز هنا لو بالمطبخ ...
الجد: لابابا جيبي هنا
منذر: اني اجيبه وينه
سماره: بالمطبخ ...اجى ورايه
منذر: حبيبتي لايگلج
سماره: عرفت يقصد المكياج ... استحيت منه ...اخذ الميز وداه رجع اخذ الكراسي ... ولو بيده حتى اني يشيلني ويوديني للهول لان رجع راد يشيل ويايه اكل گتله لا روح اني اجيبه ... هو جان بعده مماخذ على المكان وباقي عاقل ..محاول يتقرب مني ....
من كعدنا نتغدا ... گله لجدي بيتكم ما شاء الله ... يخلي الواحد من يدخله ترتاح نفسيته
وهالكلام حسيته صادق بي لان هو كلش بسيط ... وميهتم للمظاهر ..... حب الاكل
منذر: عاشت ايدج ..
ورا الغدا المفروض يروح جدي چلب بي
منذر :مو عدها امتحان غير وكت امر ... ما اريد الهيها
جاوبته ابقى عندي فيزياء حتى اذا احتاج منك مساعده تقريني .. وثانيا ما اكلت من الكيكه
منذر: بصوت ناصي ابقى بس اخاف اكل الكيكه الكدامي
سماره: خجلت وبديت احب وجوده ويايه ... احسه يعرف يتصرف
تصرفاته موزونه كدام جدي وبيبيتي ... شخصيه واحسه بگدهم
من يحجي وياهم بمواضيع ....وويايه تصرفاته تختلف من ساعدني ودا الميز والكراسي للمطبخ بقى يغمزلي مثل المراهقين .. ويتشاقى ويلمح ...
منذر: سموره تدرين احب تصرفاتج لان كلها على طبيعتج
حتى ارتاح من اشوفج هيج ... من دخلت وشفتج بملابس البيت
وعلى طبيعتج وجدج وبيبيتج هم ماعدهم تكلف ... اخذت عليكم وعلى المكان
سماره: يله مره ثانيه جيب بجاما لو دشداشه وياك ... حتى تاخذ راحتك اكثر .... شوف جدي علمودك راح اليوم للسوك جايب فواكه لنسيبه
منذر: ليش خليتي يروح رجال چبير ... انتو منو يسوگلكم
سماره:ما ادري بي رايح من رجعت لگيته رايح وخالتي تسوگلنا
كل ميصير عدها مجال ومرات اني من يحتاجون شي سريع اروح
منذر: من تحتاجين شي دگيلي اني اجيبه ..حاولي لتطلعين غير للمدرسه
سماره : شلت ماعون الفاكهه .. ميخالف ما اطلع واذا ردت اطلع انطيك علم ... يله خلي نروح للهول
بقوا يسولفون ... اني صعدت جبت كتبي ... ونزلت ادرس ... بالصاله قريب عليهم
ورا شويه دخل منذر ... گلي خلي جدو يروح ينام لان غفى وهو كاعد ...
رحت لكيت بيبيتي مترخصه ورايحه تمدد لان متكدر تكعد وقت طويل وجدي غافي وهو گاعد ... خليته يروح ينام
رجعت كعدت بصف منذر ...شوفي الانسان من يصير بهذا العمر مثل الطفل
جدج ذكرني بأبن خالد... ( اخو ) هم من يتفرج تلفزيون يغفى وهو كاعد
سماره: مو هو كل يوم هيج وقت ينام خطيه بس علمودك حاول يبقى كاعد وما كدر
منذر: خلصتي ...
سماره : بعد شويه ....
منذر: يعني تلحگين تخلصي ورا ما اروح
سماره: بدا يلعب بشعري ... اي الحگ ...سألته ليش راح تروح
منذر: حبيبتي اريد اروح اسبح واغير ملابسي من طلعت الصبح
لحد هسه
سماره:بداخلي شكيت اخاف يريد يروح عنده موعد ... ومل هنا لان ملتهيه عنه بالقرايه ...
اخاف مليت ....
منذر: لا حبيبتي ... بس ما اريد الهيج ....
سماره: لا تقريبا خلصت بعدين اكمل .... ابقى شويه حتى اسويلك جاي لو عصير ويا الكيك
منذر: حضنتها مواني اخاف ابقى ...واضعف كدام هالعيون ...
سماره: غمضت عيني واحس قلبي طاير من الفرحه ... واخيرا
اكو من اخذ قلبي وخلاني احس وياه بأمان واحب قربه بدون خوف وحذر ... من قرب شفايفه ..خلاني احب قربه الي ولهفته عليه ..حسيت بمشاعر واحاسيس وكلام يرضي انوثتي ..من غزله ونظراته عرفت اني جميله ...
منذر: حبيبتي مو تحجين الي يصير بيناتنا كدام صديقه او احد
سماره: لاطبعا اعرف هاي خصوصيه اطمئن
منذر: بوست ايدها حبيبتي اني وياج مطمئن على نفسي اعرف تصونين اسمي وعرضي ... بس انبهج من البنات حتى لتوكعين بمشاكل
اي شي تريدين تعرفي اسأليتي الي اني اقربلج من الكل ... واخاف عليج ... وطول ما انتِ مريحتني وبريئه وماشيه على مرامي ..
شتريدين اسويلج ...
سماره: اني اريدك تريح راسك ولتصور وراك او گدامك اسوي شي غلط لان اخاف الله قبل ما اخاف منك وامي مربيتني صح
منذر: اسمعها ومرتاح قلبي ...هالبنيه لو تريد عيني انطيها ..
فرحان بيها لدرجه ما اريد اعوفها وتغيب عن عيني ... مشاعرها نظيفه ماعدها تجربة... وكلش بيها حلو
سماره: شنو اسويلك ويه الكيك
منذر: مبتسم تبقين ويايه ...
سماره: لا صدك ... شنو اسويلك جرني
منذر:ابقي ويايه ما اريد شي
سماره: منذر اخاف يكعد جدي لو بيبيتي ...يضحك واحب ضحكته ... احس نفسي قصيره يم طوله وضخامته ... واني طولي ١٧٣... ليش تضحك
منذر: اضحك لان اريد اعوفج وما اكدر ... والله اريد اروح للبيت
وما اريد اروح ... دوختيني ام عيون ...
گومي سويلي چاي حتى وراها اروح
سماره: گول والله راح تروح للبيت
منذر: ضحكت لعد وين اروح
سماره: ما ادري احسك مو فقير وعندك علاقات ... ضحك
ليش تضحك احجي الصدگ
منذر: لا ماعندي .... فقير ...
سماره: شفته يضحك ضحكت ويا ترى والله كذب انت مو فقير
منذر: ليش هالسمعه شنو شفتي عليه مو مگابلج من رجعت من الدوام لهسه ... وبليل أحجي وياج تلفون ... شوكت عندي
سماره: عادي خليك بس اذا لزمت عليك لزمه وعرفت عندك علاقه
ما ابقى وياك
منذر: ماكو غيرج مره بقلبي ...
سماره : ليش تضحك من دتحجي والله عندك شي
منذر: يعني حرام اضحك ...والله ماكو غيرج بقلبي
سماره : اي واضح ... انداريت دا اروح للمطبخ ... وگف بسرعه يضحك جرني لحضنه
منذر: والله احبج وحبيتج من اول يوم غمزتلج وطنشتيني
بشهرين جريتي رجلي ...
سماره: بس بعدني عد كلمتي اذا اعرف عندك علاقه ما .....
سكتني .... ... اتجاوبت وياه ابتعدت عنه خفت لا يشوفنا جدي او بيبيتي ...
منذر:مبتسم لج بابا انتِ مرتي .... ممسوين شي حرام
سماره: ادري ممسوين شي حرام بس استحي يشوفوني
سويتله الجاي ... وبقى يداهرني ... الى ان راح ....
من خلصت دراسه ... اتصلت على امي ... گلتلي ابراهيم متأذي ومتخبل على اهله لان عمج انطاج لمنذر
جاوبتها ... كلشي قسمه وهو مو قسمتي ....بقينا نسولف اني وامي ... سديت الخط
رأسا دگ شلت السماعه الو
اجتني ألو بعصبيه .... ويا من صارلج ساعه شاغلته
سماره: منذر شبيك ويا امي
منذر: وواحد هلگد يشغل التلفون ....
سماره: منذر تحاسبني على كلشي بس متحاسبني شكد احجي ويا امي اني ما اشوفها كل وين ووين ..مو ناقصني انحرم اسمع صوتها ...
منذر: لا مو ردت اسأل خلصتي الامتحان ومن شفتج طولتي
خفت لا مدرستي ( طلعت حجه)
سماره: جاوبته ضايجه ...خلصت وهسه نعسانه راح انام ...
منذر: شنو القصه سويتيها زعله .... من حقي اعرف ويا منو
دتحچين ... صارلج اكثر من ساعه ... گلتي امج وافتهمت ومجان قصدي ... امنعج عنها ... يله باي ... روحي نامي
سماره: وانت من اهله سديت الخط .... ورا ساعة دگ دگه ورجع ب١٢.٥ هم دگ دگه ديتأكد التلفون مو مشغول ...
صفت هذا... متعب نفسه وراح تصيرلنا مشاكل ... بسبب هالمرض
