سماره : من وصلنا للمجمع... وطبگ السياره ..
بعصبيه.. من الخوف انشلت رجلي ...واحس تطلع نار من خدودي ... نزل .. انزل .. اندار فتحلي الباب ...عاط بيه انزلي
نزلت ... وصلوا يمنا ... خواته وامه .. وهمسه وامي ...
همسه ونور حسوا بيه شي ... بس اتوقعوا خايفه او مرتبكه
حجوا ويايه ... ديهدوني ...
منذر: ماما.. ماكو داعي بعد تصعدون ويانا ... اذا نحتاج شي علي ورؤى بصفنا
سماره: من صارت امي بوجهي ... متحملت حضنتها وكمت ابچي ...گتلها اصعدي ويايه ... گلتلي مترهم ماما .. الولد
مخلى امه وخواته يصعدون وياكم ... عيب اصعد ..ويزعلون من عنده ... اجى وكف بصفي ...
ايمان: خاله بعد ما اوصيك عليها
منذر: ان شاء الله
سماره لزم ايدي ... وصعدنا وورانا رؤى وعلي .... هم راحوا لشقتهم واحنه دخلنا لشقتنا ....
سد الباب عافني وراح كعد بالصاله ... اني رحت للغرفة النوم
كعدت على الفراش طگيت بچي ... ورا شويه سمعت صوت كزاز
نكسر ... بداخلي گلت اليوم مراح يمر عليج بخير
دقايق وفات ... نار ... وصوته عالي
منذر: بعياط... والله اذا اعرف جان عندج شي وياه قبل ...
لا اندمج ...
متحملتوا ... لازم يشوفج وتشوفي ... واني اسألج شبيج مكلتيلي
خليتني مثل الطرن ...
سماره: والله ما ادري بي من اجى ولا عندي شي وياه ولا حجيت وياه
( كذبت) ولا خليته يشوفني ... الصبح طلعت للصالون ومن رجعت ... مشافني غير من طلعت وياك
منذر: جنتي لافه الشال بالبيت
سماره: والله لافته ومنزعته من لبست البدله بالصالون ... الى ان اجيت انتَ....
ركع الباب وطلع ... بقيت ابچي الى ان غفيت على الفراش
حسيت بي من فتح الباب بقيت مغمضه عيني ...دخل اخذ مخده وطلع .....
بقيت گاعده للصبح ... الى ان اندكت باب الشقه ... دخل للغرفة
منذر: كومي بدلي ... رؤى بالباب ...
سماره: اخذ بجامه وطلع .... كمت لبست بجامتي ... وفتحت الماشات وشلت الورد ... طلعت للحمام سمعت صوت رؤى بالصاله .... غسلت وجهي ...
ورحت يمهم
صباح الخير
رؤى: صباح النور ... جبتلكم ريوگ ....
سماره : شكرا تعبناج ويانا
رؤى: دمشي خلي نسوي چاي ... واحضرلكم الميز ... حتى اروح
سماره: من دخلنا للمطبخ
رؤى : اكلج شكو البارحه صوت عياط منذر ... وصل يمنا ...
وردت اجي بس علي مخلاني ... خو ماكو شي ... وعيونج مبينه باچيه
سماره: بداخلي ضجت ونقهرت گلت هسه هاي تروح تفتهم غير شي ... جاوبتها مو خفت يتقربلي ... واكثر من مره اجاني ...
اخر شي صار عصبي ...
رؤى: يعني ما تم زواجكم
سماره: مكدرت اگلها لا تم ... جاوبتها ... لا لحد هسه خايفه
وهو عافني براحتي
رؤى: لعد شلون من امي متصله عليه بليل گللها كلشي تم
سمارة: حسيت راح اوگع من طولي ... من الي شفته من البارحه لليوم ... وفوگاها هسه طلعتلي هالسالفه ... شراح يخلصني منه
جاوبتها ... ما ادري يجوز مراد يضغط عليه ... وراد يفرح خاله
رؤى: هاااااا..... يله اخذو راحتكم ... وماكو داعي هالكد خايفه
خلي الامور طبيعيه ....
سماره: ان شاء الله .... من طلعت متحملت فتت للغرفه وبقيت ابچي ... ورا شويه دگ الباب لا قافلته
منذر: افتحي الباب
سماره: منذر روح وعوفني .... ترى راح اسوي بنفسي شي من وراكم
منذر : افتحي الباب ... لا اكسره
سماره: جنت واصله مرحله كاره الدنيا وكارهه نفسي ... وحتى خوف ما بقى بقلبي ... فتحتله الباب
منذر: حجيتي ويا رؤى شي
سماره: بعصبيه ...سألتني على عياط اخوها ... جاوبتها ما كدر يتقربلي ... معرفت احجي شي ثاني .... لان عياطك الي سمعوا البارحه يگولون ... هذا لگى مرته موبنيه ...
مراح يتفسر شي ثاني ... بين اثنين عرسان مصارلهم عشر دقايق من فاتوا للشقه ...
بقيت ابچي صرت عصبيه نار .... واني دا احجي
عمري كله ما سويت شي غلط
وشفت قهر محد شافه بعمري بس مو بكد القهر الي شفته منك
اسهل ما عندك تتهمني وتحاسبني على شي اني ما الي ذنب بي ... يعني واذا جان رايدني ... اني شنو ذنبي ... اذا عمي دازه يسلمني الك .... ما الي علاقه بمشاعره ولا اكدر اقاطعه يبقى ابن عمي واخويه واخو اخوتي
عافني وطلع .... بقيت بالغرفه وحدي ....
بعدها سمعته يحجي بعصبيه ... عرفت ويا خاله لان دا اسمعه يگلها( هالموضوع ميخص احد ... واني مو صغير ...حتى تسأليني تقربت عليها ... ولان اعرف بيج تلحين گتلج تم ...
مرتي صغيره ..جانت محتاجه اصبر عليها لحد متتعود عليه
وهسه كلشي تم... ولهنا بعد لتسألين على شي يخص حياتي ويا مرتي ... اني مو خالد .. وتدخلين بخصوصية بيتي وعلاقتي بمرتي ... اخر شي گلها اي مو كلامي مو على مرامج ...فطلعت مو زين ... اسالج سؤال اكو يوم اتعاملت وياج لو ويا ابويه
بشي ميرضي الله ... ...
لعد ماطول لا ...عوفيني اني ارتب حياتي اني مو زغير انت من تدخلين وتفرضين رأيج على بيتي معناها دتصغريني ..
واني مو رجال بعينج ...
اي هو هذا الي اريده منج ... ارتاحي لتشغلين نفسج بيه
اني اعرف اريح نفسي ... وارتب اموري ...مع السلامه ...ان شاء الله نمرلكم . )
وراها صار سكوت ... شويه سمعت .... سماره تعالي تريگي
استغربت ... طلعت لگيته واگف ينتظرني بنهاية الممر قريب على المطبخ
جاوبته اكل انت ما اشتهي ...
منذر: تعالي
سماره: رحت... دخلت للمطبخ ... احمي الچاي واصبله
دخل ورايه ... شاف عيوني مورمه ...
منذر :تريدين تعرفين الي خلاني بهالحاله البارحه
من دخلت سلمت (مجنت اعرف هذا ابراهيم ... الا من گلي
دير بالك اسمعك تغثها اخليهم يترحمون على روحك كافي جبروها عليك )
لو مو خليت عقلي براسي وعرفت يريد يسوي مشكله ... ويخرب العرس .. جان أتصرفت ويا غير تصرف ...
سماره: (اتفاجئت بكلام ابراهيم...هذا انقهر مكدر يمشيها بسلام راد يخرب العرس والله ستر ) .... واني شنو ذنبي تحاسبني ... على كلامه
منذر: فقدت من گلي جبروها عليك ... بقيت افكر اجيب واودي بهالكلمه ...كبرت براسي لحد ما فقدت ...والي زاد السالفه براسي كلت اكيد حجى وياج شي قبل الزفه ... وشافج بالبيت
بالبدله وچتافج مكشوفه تخبلت وبالاخص من اتذكرت سألتج بالتلفون .. بيج شي مگلتيلي ابراهيم موجود
انتِ غلطتي من ضميتي عليه
سماره: بقلبي ادري بي عصبي ويفقد بس مجنت ادري بي ذكي
وكدر يتحكم بهالعصبيه ... وما سوا مشكله ويا ابراهيم ...
لان عرفه يريد يخرب العرس ....وكمل العرس ... ساكت بس دماغه يشتغل والشك يلعب براسه
ذكي لدرجه عرف صار بيناتنا كلام ... الحمد لله من سألني بالسياره سولفتوا سكتت ... وبعدين گتله ما سولفنا ..جان طلگني وميدري بنفسه من العصبيه .. هذا ابراهيم الفقير
ما سلمت من شره
منذر: كافي بچي انتِ هم غلطانه
سماره: مكدرت اگلك لان اعرف هاي النتيجه ... اعرف راح تشك وتتخيل امور مموجوده .... جرني لحضنه
منذر : حبيبتي ..لتضمين عليه شي ...حتى ميصير بيناتنا مشاكل ... يله خلي نتريگ... اني على ريوك البارحه
سماره: هسه احميلك الاكل اني ما اشتهي
منذر: خلص ملازم ...لتسووين شي
سماره: طلع من المطبخ عبالي راح نام بالصاله ... رحت للغرفه
لگيته نايم ... طلعت ... اتصلت على امي سولفتلها الي مسوي ابراهيم
انقهرت گلتلي ... ماما داري رجلج مثل ما بي عيوب بي محاسن
على الي سمعته منج كبر بعيني على موقفه البارحه ...طلع اعقل من ابراهيم الي نگول عليه فقير وطيب .... والله يا ماما ... الانسان ميعرف الله وين كاتبله الخير ... خلي الامور تمشي بيناتكم ... لازم تعرفين شلون تصرفين ويا رجلج وتكسبي
جاوبتها ان شاء الله .....
گمت سويت غدا ... ورحت گعدته ...
منذر گوم اتغدا
منذر: عوفيني سماره اريد انام
سماره: منذر ترى اني هم مثلك مماكله من البارحه .. بس صدك
الصبح مجنت اشتهي اكل ... من الخوف الي عيشتني بي البارحه ... التفت عليه
منذر: انتِ عشتي خوف ... اني من دخلت لبيتكم الى ان حجيت وياج الصبح ... مثل الميت .. ما اتذكر شي من الزفه ....
سماره: دگوم حبيبي ...خلي ناكل وننسى الي صار البارحه
منذر: صبي هسه اجي
سماره: دخل عليه للمطبخ ... اخذ ايدي باسها ...
منذر: حبيبتي لتاخذين كلامي ساعة العصبيه جد واتحملي طبعي
سماره: ادري بيك متقصد بس الكلام يأذي ..بالاخص بموضوع الثقه
منذر: والله عندي ثقه بيج بس ماعندي ثقه بالعالم ...
سماره: كعدنا نتغدا ... بدا يذبلي حجي بالضحك ...ويتغزل
منذر: سمسم اوديج للصالون ...الله لايوفقه لابن عمج ضيع عليه الليله حتى ما ركزت بشكلج البارحه ...بس حاليا مركز ...تعالي
سماره: منذر بس اشيل السفره
منذر: عوفيها بعدين.....
حبيبتي وزوجتي وام بيتي ...اني وياج صرنا واحد... من هاللحظه
سماره: نمت بحضنه لاول مره احس بالامان... جنت مفتقده حضن ابويه ... لگيته بحضن رجال صارلي اب وزوج
ً
