سماره: طول طريق الرجعه بقى يحجي ويايه على طبع اهله ...
منذر : سماره امي والبنات من يحجون شي يغثج ... لتزعلين كأنه ما سمعتي ... انت منو عندج اهم اني لو هم
سماره: طبعا انتَ
منذر : خلص لعد سوي الي يريحج ويريحني لتاخذين كلامهم ويأثر على علاقتنا
سماره: من كلامه فهمت امه معترضه عليه ومرايدتني ...
منذر: سموره اريدج تنتبهين على دراستج واي شي تحتاجي اني ادرسج حبيبتي ...انتِ شلونه مستواج
سماره: معدلي نص السنه ٩٢... شفته ابتسم
منذر: صدك والله
سماره: والله ... شفته فرح
منذر؛ اني لحد صف ثالث متوسط مجنت شاطر ... بس من صرت صف خامس ... صار عندي هدف اطلع دكتور مثل خالي عايش برا ... بديت ادرس ووصلت صف سادس بس سوالف عمت عليه التهيت بالاربعين يوم ... طلعت هندسه مو طب ...
سماره: شنو السوالف
منذر : حبيبتي سوالف متعرفيها ...
سماره : وصلني نزل سلم على جدي ... گلي انتظريني اخابرج بليل
من دخلت للبيت ... بين مابدلت نزلت خابرت امي ... سولفتلها على منذر ... گلتلي هذا متعب اذا شكاك بس انتِ مو عنوديه ولا تصرفاتج مموزونه حتى تخافين منه هو لو ما شافچ ماشيه عدل مايستعجل بالعقد يخطبج ويبقى ... يختبر اخلاقج ... بس هو متأكد ... وهذا شكله ابو نسوان ماطول شكاك ... ماما صيري سبعه لتخلي يلعب بذيله ... ترى لتصدگين يتوب اذا متلهي
عن هالدرب
گتلها شسويله... ما اعرف وماعندي وكت اني دوام وهو دوام
ارجع عندي دراسه ... وهو العصر گلي يطلع ... وبليل گلي نتخابر ... بقت امي تحجي واني بداخلي مامهتمه اهم شي عندي ادرس واطلع معدل ... وما اخلي هالموضوع يأثر عليه ..
من صفحة افتهمت امه معترضه عليه لان هاي تقارن ابنها مهندس واني طالبه وحالته الماديه زينه واحنه متوسطه وواذا على الجمال ابنها هم حلو ... معناها اني اذا اريد اسوي لنفسي شي كدامهم اطلع معدل وكليه مثله او اعلى ساعتها ... متشوفه
هواي عليه ...
ورا ما راحت امي بقيت ادرس ... من خلصت بقيت افكر بكلامها
گلت معقوله يعني وصلني ... وطلع راح على وحده ... معقوله الرياجيل هيج عينهم فارغه ... وماعدهم وفى ...لعد ليش يخطب لو يتزوج وحده متملي عينه يبقى يدور وراها ....
لان هو من يدور وحده يتزوجها اكيد يدور وحده ماعرفت واحد قبله ... حتى يرتاح وهو يبقى يلعب ويونس روحه ببنات العالم
اوف هاي امي شلون خلت براسي شغله اخاف اليوم حبيته شويه كرهتني بي ....
دك التلفون .... الو
منذر : خفت الگاج نايمه
سماره: لا جنت ادرس وقبل شويه خلصت ...انت اتأخرت
منذر : جانت عندي شغله تاخرت بيها ...
سماره: ليش انت عندك شغل بليل
منذر: لا رحت ويا علي عدنا شغل خاص
سماره: بقلبي طلع ديشتغل واني عبالي ويا وحده
منذر: انتِ وين هسه
سماره: بالغرفه من شفتك تأخرت صعدت انام
منذر : ليش اكو تلفون بغرفتج
سماره : لا بغرفة بيبيتي هي وجدي بالهول كاعدين على التلفزيون
منذر : شتلبسين بالبيت
سماره: اهو هاي السوالف سامعتها
منذر: وكع قلبي ... منين سامعتها
سماره: اوف شكد غبيه هذا هسه يفهم غلط ... سامعتها من بنات ويايه بالشعبه مصادقات ... مرات يحجون واسمعهم
منذر: ومن تسمعيهم... ميعجبج تصيرين مثلهم ....
سماره: لا لان مبالي غير هدف اريد ... اوصله
منذر : شنو هالهدف ...احجي وياها بس قلبي مامرتاح
سماره: اطلع معدل عالي وادخل كليه ... مثلك
منذر: اي احسن ... التهي حبيبتي بالدراسه ... ومن تسمعين
سوالف البنات ... وتعجبج خابريني سولفيلي شنو يحجون
..اني رجلج حلال تحجيلي كلشي ماكو بيناتنا عيب ولا حرام
سماره: بقلبي عزه هذا راح يتخبل شال المستحى بسرعه
منذر: حبيبتي .. انت ممخليه مكياج ولا مره ....
سماره: لا ولا مره ... بس خالتي گلتلي هالايام تاخذني اروح اشتري ...
منذر: لا اني احب شكلج بدون مكياج
سماره: منذر اذا اشتري ... اخلي بس من تجيني لو اطلع وياك
منذر: يله بكيفج لعد اني امر اخذج
سماره ذولي البنات الي بالمدرسه لتكعدين وياهم
سماره: بقلبي يبو فتحت على نفسي باب ... هذا راح يكرع راسي ... بس فكرت لا احسن خلي يلتهي يفكر بيه ... حتى اخاف عنده سوالف يبطلها ...
جاوبته لا مو صديقاتي بس وحده منهم ماعده بصفي هي خوش بنيه بس تحبه وهو هم يحبها ... صار ٣ سنوات
منذر: لا حبيبتي هاي مو خوش بنيه ماطول بعدها بهالعمر وتعرف واحد من ورا اهلها هذا ميتزوجها بس يگضي وقت وياها
سماره: ليش انت مجرب هالشي قبل
منذر : اي مجرب وتالي من ردت اتزوج ما اخذت ولا وحده منهن
اختاريت وحده ... ماعدها هالسوالف
سماره: بس هي بسبب كلامك خليتها تحبك وتتعلق بيك وتالي تعوفها
منذر : سماره انتِ هالسوالف تعرفيها من البنات لو من خطيبج
سماره: منذر ناطق خطيبي مو رجلي لتصور اني انطي مجال او هو تجاوز الحدود .. الولد جان يجي يكعد بحضور امي لو اخويه
منذر: بس جان يوديج ويرجعج للمدرسه
سماره: عشر دقايق روحه وعشر دقايق رجعه ...نسولف على المدرسه
منذر: بداخلي فتحت على نفسي باب ... وذكرتها بهذا خطيبها
سموره اشتاقيتلج ... باجر امرلج العصر
سماره: منذر عندي امتحان ... اخاف ما الحگ
منذر : لعد امرلج نص ساعة واطلع ...
سماره زين تعال تغدى ويانه ....
منذر: مو اني اطلع ورا ال٢.٥
سماره: اي عادي احنه هم هيج وكت نتغدا لان يادوب بين ما ارجع واطبخ ...
منذر: ليش تعرفين تطبخين حبيبتي
سماره: اي اعرف ....شنو اسويلك باجر
منذر: اي شي حبيبتي .... سموره ... مگلتيلي شلابسه بلبيت
سماره: ضحكت ... لابسه دشداشه گطن
منذر: باجر اجي اشوفج ... حبيبتي يله روحي نامي وراج دوام
تصبحين على خير
سماره : وانت من اهله ... سد التلفون لكن وراها دك ٣ مرات بأوقات متباعده . ...دكه ويسده ... شكله ديتأكد التلفون مو مشغول ... خلي عادي ماطول متأكده من نفسي ما اسوي شي غلط ... هو يتعب ويايه اني ما اتعب وياه ... ولو راح يخنگني ويخليني اكذب عليه ... مثل علاقتي بناطق ... صح ما تعدينا الحدود ولا تعلقت بي ... مجرد شخص جنت مرتاحتله ... وجنت اسمع منه امور عاطفيه بسيطه ويتغزل بيه ... واني اخر فتره
گمت اتشاقى ويا واخذ وانطي بالكلام ... صح بحدود بس اكذب اذا مگايلتله مشتاقتلك او مسمعته كلمه حلوه ....
هالمنذر ... راح يخليني احبه ...على سوالفه
