مرت الايام ... وعرفت من امي جاسم انحكم .... شكد جنت شايله منه بس بلحظة الي عرفت بي راح يقضي كم سنه بالسجن ... نزلت دموعي ... عليه... حسيت دخلت بخطيته ... وبخطية البراهيم ... اثنينهم ما ارتاحوا بسببي
بهاليوم تمنيت لو الله ما خالقني ولا متحمله ذنبهم ... ادري هي حكمة رب العالمين بس ... بداخلي قهر عليهم ما انسى طول عمري ... حسيت سعادتي ويا منذر جانت سبب بتعاسة غيري ... مرت كم شهر بهالايام منذر صار كل شي حلو بحياتي ... حتى مرض الشك الي عنده حبيته وحبيت حرصه وخوفه عليه ... منتفارك غير من يروح شغله ومن يروح تالي الليل
لبيتهم ...ماكذب من گلي اني اساندج ... حتى گام يدرسني وبيوم واغلب ايام الخميس على الجمعه ... يبات يمنا بالبيت
علاقتنا صارت واضحه هو يفهمني واني ساكته واني افهمه من نظرة عينه ... لكن ... الشي الوحيد الي بقى ينغص هالفرحه
كلام امه وتجريحها الي ويا كل مره التقي بيها وبروئ...
اكتم ... مراره وألم ... لكن الي يصبرني ... على افعالهم وكلامهم ... اشوفهم يخافون من منذر ... وكدامه يحاولون
يبينون شي ثاني ...
ومن هالمرات ...بيوم الي استلمت النتيجه ... جان منذر ينتظرني برا المدرسه ... طلعت مثل الطفل الفرحان ... اريد ابشره ... اريد
اثبتله اني انسانه عندي طموح ... وتعبه وتعب امي .. طول الوكت كدامي ... اريدهم يرفعون راسهم بيه ... من استلمت نتيجتي بص خامس علمي ومعدلي ٩٨ ...بهاللحظه نسيت بيوم من الايام
حزنت .. ومريت بظروف صعبه ... اتذكر كل كلمه ... تشجيع وفخر من مدرساتي ... لان طلعت الثاني على مدرستي
... من فرحتي ... تخيلت نفسي مثل الطفل ... الشايل متيجته وفرحان ... من شفت منذر ... واگف ... بباب المدرسه ركضت
حضنته ... لو بيدي اطير ...
منذر جبت ٩٨... شفت فرحة أب بنجاح بنته
منذر: اي ورده ... سمسم جنت متوقع ... اطلعين معدل واتباهه بيج بس متوقعت عندج هالامكانيه...من تخلين شي براسج گول وفعل ... اليوم الي تريدي يصير اطلبي يجرالج
سماره: حبيبي ما ريد كافي عليه شفت الفرحه بعينك ... خلي نرجع اريد اتصل على امي ابشرها ...
منذر: يله قلبي ... خلي نروح نبشرهم وراها نطلع ..
سماره:من وصلنا لگيت جدي واگف بالباب ... ينتظرنا
منذر گلي اني اريد ابشره ...
نزلنا من السياره خلى ايده على جتفي
منذر : جدو جابت ٩٨ ... من هسه صار عدنا دكتوره ... بالجيب
الجد: عفيه جدو تعب امج ما راح دروحي بشريها خطيه من الصبح ... كاعده على التلفون
سماره : حضنته جدو والله ما اجازيكم انت وبيبي الله يحفظكم الي .... اول مادخلت .... بيبيتي جتي تركض بس على ابتسامتي وفرحتي عرفت حصلت الي تعبت عليه .... فتحت چيس الجكليت ويا كل هلهوله ... ورفعت ايد... جوايه ... ألوان
تخيلتها مثل المطر ... الي بچيت جواه ... بدل دموعي من الحزن للفرح ...
اتصلت على امي .... يا فرحت امي ... يمكن صارلها سنين ما ضاكت مثل هالفرحه ... فرحتها مثل الي چان ... عايش بنفق مظلم ... واليوم شاف الضوه ... على صوت بچيها ودعواتها ...
دموعي تنزل ... وعدتها ... غير مجموعه طبيه ما اطلع ...
منذر: حبيبتي ليش هالبچي ... انطيني خاله احجي وياها
مرحبا خاله
ايمان: هلو حبيبي ... بالخير عليك وعلينا
منذر : اشكرج بس اني اريد هديه
ايمان: ادلل گول وادزلك احلى هديه
منذر : لا خاله هديتج يمي ... اريد احدد موعد عرسنا ..
وقبل متفكرين ... اني اوعدج ابقى بظهرها ...وما احلي شي يأثر على دراستها ... وطلع نفس امعدل بالسادس يمي
ايمان: والله خاله ... اني مأمنه عليها وياك ... توكلوا وحدد اليوم
منذر : مو هذا الاسبوع الخميس الي وراه .... حتى هسنه نطلع
نكمل ... امورنا
ايمان: الله يوفقكم وليدي ...
منذر : رحم الله والديج ... ان شاء الله اخليها بعيني ...
هاي سماره وياج
سماره: بقيت اسولف ويا امي ... ورا ما خلصت مكالمه ... طلعنا
نفتر نفتر ... اخدنا كهربائيات
جنت فرحانه بكل قطعه اخذها .... فرحانه لان راح يصير عندي بيت اني صاحبته اني الي اقرر وضعه وحياتي بي .... ماكو احد يجبرني على شي ولا اخاف من احد .... مكان استقر بي
وما افكر باجر اني بأي بيت ... خلصت رحلتي من بيت بيبيتي الى بيت عمي الى بيت جدي ... راح استقر وابدي حياة جديده
منذر: سمسم كافي اليوم تعبت وجعت ... خلي نروح لبيتنا
سماره: يله براحتك ... نكمل غير وكت ..... وصلنا لبيت اهله
بيتهم بالمنصور من البيوت الراقيه والچبيره ... بس الطرمه والحديقه بكد بيت جدي ... كل هالمساحه والبيت الحلو مجان بعيني ... لان ويا كل مره ادخله اطلع ... محمله هم ... وكلمات
تأذيني
جانت عندي خوفه ... لكن مجبوره اجامله واتواصل ويا اهله
عمي الرجال ورده
من فتح الباب ... وشاف فرحة منذر متباهي بيه
عبر بكلام حلو ... وبوسني من راسي ... وگلي هاي عليها هديه
لكن من دخلنا ... وخاله شافت منذر فرحان ... والگاع مشايلته
حسيته ديگللها شوفي هاي الي اني اختاريتها واختياري صح رحت بوستها
رفاه: اي شدعواك الي يشوفك يگول معدل صف سادس
كومه يطلعون معدلات بهالسنين ... وتالي بالسادس تفشلنا
منذر: مرتي متفشلني ... من هسه دكتوره
رفاه : اي قابل منكيف ... بلكت تطلع صدك شاطره... عاد نتباها
بشغله
شفت منذر ... ضاج گلي اصعدي غيري ملابسج .... حتى اصعد ابدل ...
عمي: يله دكتوره ... مو تنسين عمج .... تشوفيله جاره ويا السكر
سماره: ان شاء الله ... صحه وعافيه ... ادعيلي عمو
عمي: والله عمو ادعيلج مثل ما ادعي لولدي وبناتي ...
سماره: صعدت المكان الوحيد الي احبه بهالبيت غرفة منذر ....
احس هالمكان الي بي مثل ما اله ....احبه لان اشوف بي حبه ويا كل مره اشوف صورتي محطوطه على الميز الي بصف فراشه
بالمره الاولى الي دخلت غرفته ... جانت اكو صوره ( فرح) صغيره مخليها على مراية ميز التواليت الصدك معرفت... هو مخليها لو امه رادت تضجني لان تعرف راح اجي بيومها
بس الصدك انقهرت ... ومن عاتبته حلف ميدري بيها بس
حملته الغلط لان بعدها صورتها موجوده ... للعصر صاحني طلع
كل الصور الي ماخذها بالجامعه وهي موجوده شككها ...
گلي ها هسه ارتاحيتي ... والله متجي على بالي شغله صارلها سنين والبنيه اتزوجت ... والحمد لله ما صارت لان جان متوالمنا
ويا كل هالمشاكل والاعتراضات ...
صح بيومها انقهرت ... وماصدكت مشاعره انتهت ... لكن بمرور الوكت ... حسيت هو صادق ويايه ... وحبه الي نساه هالبنيه
منذر: وين صرتي
سماره: اوه منذر فززتني .... والله
منذر: شفتج تأخرتي ... دكتوره قلبي يوجعني ..عالجي قبل ما يوصلون بيت خالد
سماره : ابتسمت ... من ورا ملحتك بسالفة الدكتوره كدام اهلك خايفه لا ما اطلع طب وتفشل
مندر: هو اني متقصد احجي حتى يصيرلج واهس اطلعين طب
سمسم شو انتِ محلوه ..
سماره: ضحكت ... لا محلوه خلي ننزل
منذر: خو انتِ بيت اهلي منشفتها ويايه ...
سماره: هنا استحي ابقى وياك بنفس المكان وحدنا
منذر: ايام .. ونبقى وحدنا بشقتنا ... حتى خطار ما استقبل
سماره: راح انزل حبيبي مو تتأخر اضوج ابقى وحدي جوه
منذر : هسه انزل ... ما اتأخر
سماره: نزلت ...بقيت ويا عمي وخاله بالهول ... ورا شويه نزل منذر ...
وراها دخلت رؤى وعلي .... بقلبي گلت كملت ... ( رؤى حامل بس لو يخابرها تجي لاي مكان ... شويه وتلگيها يمهم.... علي ورا المهر يله عرفت يصير ابن خالة عمتي ...)وراها دخلوا بيت خالد ...كلش احبهم لان همسه ورده وخالد هم حباب ... صح مابيني وبينه ميانه ... بسبب فارق العمر ... بس كلش يحترم
وكلامه موزون ... وهم فرق بينه وبين همسه ب١٠ سنوات ...
اول نص ساعة ... الامور طبيعيه ... لان كلهم ملمومين يسولفون ... وراها .. دخلنا المطبخ نحظر الغدا ... بدت
الاسطوانه
رؤى: ماما تدرين اركان ( اخو علي) دز اهله على ضحى ( بت خالتهم )
رفاه: يفتهمون ... وحظهم كاعد ياخذون نسوان مال وجمال
سماره: شفت همسه ابتسمت ... دتگلي بدت ... اني ولا كأنه اسمع ولا اشارك
رؤى: صدك مبروك گالوا مطلعة٩٨
سماره: شكرا ...
رؤى: هاي ضحى امي كتلت روحها رادت تاخذها ... لمنذر
بس هو الله يسلمه ميفتهم ...تحجج بلبسها ميعجبه
رفاه: مو لان حظها مكاعد ولا هو حظه كاعد ...
سماره: بقلبي استغفر الله والله حتى اذا اريد ارد ما اعرف اردهم ...
همسه: والله خاله ... يفتهم ما اخذها ... ضحى تتنعوص.. ومتتوالم ويا منذر ... لان خفيفه
رفاه: ضحى خفيفه ... لازم انتِ ارزن من عدها
همسه : شجابها عليه متوصل لاضفري
رفاه: الي يمدح نفسه يذمها .... يله كلشي قسمه ونصيب احنه ماعدنا حظ ... لا ولدي ولا بناتي ....
اليوم منذر فرحان بسماره ... مطلعة معدل ...لان بعده يقارن بينها وبين فرح ...
همسه: خاله انتِ اول الي عارضوا الزواج شعجب اليوم دتمدحيها
رفاه: اي صح عارضت بس البنيه مهندسه واهلها واصلين ...سماره انتِ شايفتها شكد حلوه
سماره : اي شفتها حلوه
روئ: لازم منذر شوفج صورتها ... كدامه هم گلتي عليها حلوه
سماره: هي البنيه حلوه قابل اگله مو حلوه
رفاه: سماره صح تشوفوها ساكته بس تشتغل من جوه لجوه
تعرف شلون تقشمر منذر
سماره: هنا طفرت روحي .. جاوبتها .. كل رجال عنده ماضي ...
مو من حقي احاسبه عليه ... عليه هسه ..
رؤى: اخوتي مو فقره اخاف تشوفي .. كدامج حباب ... وراج يلعب بذيله ... بالاخص منذر ... بنات المنطقه كلهن صديقاته
سماره: انت گلتيها صداقة مو زواج ... يجي يوم يبطل من يستقر
رفاة: والله تتبعب المره ... هذا خالد لليوم مرتاح وستقر اني احجيها كدام همسه ... حتى لتنحسب غيبه اني طبعي اتعلمي عليه اطگها بالوجه والله اني ورا سنتين من زواجهم ... من شفته ممرتاح گتله اتزوج... مقبل ...واعرف علمود الجهال
ومنذر اذا مرتاح والله هم ازوجه.. ..
همسه: خاله هو انتِ مكدرتي تزوجيهم من شباب صغار ... راح تزوجيهم على مزاجج من يكبرون ... لعد متزوجين علي وفراس ...
رؤى ورنا هم ممريحاتهم ...
سماره : صارت بينهم حرب بالكلام ... مخلصت الا من خلينا الاكل على الميز ... الفرق بيني وبين همسه جان ...يحجون عليها كدام خالد ويسكت ميرد .. واني كدام منذر ميكدرون يضوجوني او يحجون عليه بالعكس ... يسوون الامور طبيعيه ... بس المشكله الي خلتهم ... من يكون مموجود يسمعوني كلام يغث لان يدرون ما احجي وانقله الي اسمعه منهم ...
حاولت انصح همسه متتدخل وياهم بجدال ....
گلتلي ... سماره اني هم جنت مثلج ما اجاوب بس من كثر الدك تعلمت اردهم .... انت هم راح يجي يوم وتردين وتجاوبين لان هن ... يطلعن الواحد من طوره .. بقباحتهن ...
مرت الايام بسرعه ... بين انكمل اثاث الشقه وبين احضر امور العرس ...
جنت فرحانه مراح اكعد وياهم ... لكن مجنت اعرف ... مجرد
وجود رؤى الباب گبال الباب ... راح يخليني اعاني ...
وجربت هالشي من بديت اروح ارتب الشقه ... تدخل ويانا بحجة اساعدكم وهي تنقل ... كل حركه وتصرف بيني وبين منذر
بحيث رتبت الصاله ... ومنذر ويايه ميخليني اجر ...بس اگله وين يخلي الشغله .. هو يشيلها ... ورا ساعة ما اشوف الاخالتي فوگ راسنا ...
ساعة تگول اي والله خوش مشغلته... شو يمي كلاص مي ميشيل
لو تعيب على ترتيب الشقه وتگلي يله ...تتعلمين بعدين على الخير
ومن نزل منذر راح يجيب ... شغله نسيناها ... واني دا ارتب بغرفة النوم ... طلعت لگيتها هي وروئ مغيرين ترتيب الصاله ...
كلش انغثيت بس بقيت ساكته ... بس بين على وجهي ... من رجع منذر ... اجاني ليش غيرتي الديكور ... لعد صار ساعة نشتغل شنو
گتله ما ادري جنت بالغرفه من خاله ورؤى مغيريه ...
گلي امي غيرته جاوبته اي .... محجى شي ... بس بعدين
من طلع سمعتها گلتله ... شوف الصاله مو احلى هسه ....
جاوبها لا ... گلتله انت هالايام صاير ماعندك ذوق .... بكلشي
مجاوبها ... بقى متحمل سوالفها لان مهما يكون هي امه
بس من رجعني ... گلي سماره اني ادري بأمي تدخل ... وتحب تفرض الي براسها
اني خليتها براحتها لان ... مردت يصير بيني وبينها مشكله على شي تافه
الاثاث ... ورا العرس انت تكدرين ترجعي مثل متريدي ... بس اتحملي لخاطري ...ولتجاوبيها ... ابقى ساكته
جاوبته ... لتخاف ما احب المشاكل ولا راح اجاوبها... خليها براحتها ... لتدخل بمشاكل وياها ... وتالي يگولون مرته حركته علينا ... انت ابنها متشيل منك بس اني راح تحقد عليه
منذر: اعرف لهسبب اني مكدرت احجي ... لان شفت بعيني مشاكلهم ويا همسه ...
سماره: مجرد جنت اعرف هو مقابل بتصرفاتهم ... ومينطي بيه ولا بيهم يخليني احترمه واقدره اكثر ...
الى يوم العرس اني يوميه ... اسمع واشوف امور متعجبني ...
واتحمل
