الكاتبه اماسي الليل
سبب الانفصال....
هو الخيانه ....
بسبب كل الي ذكرته سابقاصارت بيناتنا مشاكل ... وبتعدنا عن بعض ... منذر بدا يطلع لو يگضيها ويا علي ... واني وحدي ...
اغلب الوكت بيناتنا مشكله وزعلانين ...يمكن انتو تلوموني بس اني جنت طفله وتحملت كل هالضغط ... وصلت مرحله ... تعبت بالاخص ورا كل طفل افقده ... نفسيتي تتعب ... من الكلام
طلعت على شكل اهمال لنفسي ولرجلي ...
اكو فتره جانت نور حماتي دائما تنصحني ... وتگلي انتبهي
على منذر ... ودائما تلح على الرجال من ميرتاح بيته يدور برا ...
اني جنت بهالفتره مثل الثوله ...ويمكن من كثر الثقه واعرف يحبني ... مجنت اتخيل ممكن يسوي شي ....
الى ان نور شافتني ... مدا افتهم تلميحاتها .... طلعت من اخر يوم امتحان ... دا ارجع للبيت لگيتها تنتظرني
نور: ها شلونج اليوم
سماره: الحمد لله
نور: سماره خلي شويه نكعد عندي حجي وياج ماطول خلصتي امتحانات
سماره: يله ماعندي شي ... علواه شويه ارتاح من احجي وياج
رحنا كعدنا بالكافتريا
نور: سماره... اني اعرفج خوش بنيه ورزنه ... بس منذر تعبان من وضعكم ... والتغير الي انتي بي .... والمشاكل
ترى منذر جان يحجيلي قبل اشهر عن المشاكل وتدخلات امي ... ورؤى واني والله شكد حجيت وياهن ومفاد ..انتِ تدرين بيه ما احب المشاكل ولا ادخل بخصوصيات احد حتى ما اسمح لاحد يدخل بحياتي
انتبهي على رجلج ... رجعي علاقتكم مثل قبل ... هسه عندج فرصه ... اتفرغتي ... وماعندج دوام ولا دراسه ارجعي قربي عليج ...
سماره: نور انت طبعج متلحين بشي ... اكو شي تعرفي ...
الله عليج ودتحجين هالحجي
نور: سماره اذا احجي تصيرين عاقله وتفتهمين الموضوع وتحاولين اتصلحي .. ومتسويلي مشكله
اني صار فتره دا انبهج على شغله بس انتِ متاخذين كلامي جد
سماره: گولي نور والله ما اسببلج مشكله ...
نور: راح احجي لان ما اريد وحده تخرب بيتج .... ترى منذر عنده علاقه ببنيه ويا بالشغل
وعرفت من رؤى ... واخذت علي على صفحه ... وحجيت وياه تأكدت منه ... بالاول زماله وعلاقه ميانه وشقى ... بعدين بدا
يرتاحلها ... وصايره بينهم علاقه ... حتى يطلع وياها ...
واني دزيت عليه اجاني للبيت ... واجهته ... گلي لابابا ماعندي شي هيج مجرد بنيه علاقتي قويه بيها وارتاحلها ....اني احبها لمرتي ... وما افكر بوحده غيرها .... بس الكلام الي وصلياه علي
غير ... يگول البنيه كلش دتلح حتى من احجي وياه .. واگله انت متزوج يحاول يبتعد وهي تركض وراه ... وديحسه بدا يتعلق بيها
لان البنيه حتى اكل تجيبله وياها... ومكابلته بالمكتب وكاعده ....
وحلوه ومهتمه بنفسها ... الرجال حتى لو يحب مرته ومتعلق بيها
قلبه يوسع لغيرها ... انتبهي على منذر ... ولتخليها ... تعلقه بيها ....وتاخذه منج ... لان الصدك علي من يرزله يگله ماعندي مشاعرتجاه البنيه بس ارتاح وياها ودا اتعلق بيها ... لان كلامها واهتمامه بيه مريحني ....
سماره اني حجيتلج بالتفصيل لان ... مو قصدي انزل دموعج بس ما اريدج تخسرين بيتج
واعرف منذر يحبج ومتعلق بيج ... اذا يصير بينكم شي هو هم يتأذى
سماره: الصدمه الي عشتها حسيت قلبي تفتت... من الاحساس الي حسيته ... شكد مريت بوجع بس ابد ميشبه الوجع من يطعنك اقرب الناس الك انسان من كثر ماعندك ثقه بي وحياتك وكيانك كلها وياه وتحاول بكل الطرق تحافظ عليه حتى البطرق
الغبيه الي مابيها تفكير وعقل ....
جان الوجع شي اكبر من قابليتي ... اترخصت من ... نور ...
واعرف هاي اخر مره راح تسلم عليه لان ما اكدر اوفي بوعدي
وما اسوي مشكله .... كميه الوجع والالم خلتني امشي واحجي ويا منذر كأنه ديسمعني ... وواگف گبالي ... مكدرت ارجع لبيتي
حسيت هذا المكان خلص انتهت حياتي بي وبالشخص الي يربطني بهالبيت ... طلعت بوجهي للبيت جدي ..... فقدت اي احساس ومشاعر وماعندي ذره عقل براسي .... كلشي اتحمل الا الخيانه ... ماطول بدا يتعلق بيها معناها يحبها وكذب عنده مشاعر تجاه هالانسانه ... واني ماعندي قابليه احارب علمود واحد قرر يختار غيري .... دخلت حجيت لجدي الي صار ... ضاج ومقبل عليه ... وبقوا يهدوني هو وبيبيتي ...بس قلبي ناره تزيد متنقص
اتصلت عليه اعرف وكت رجعته ... الو
منذر: سماره انت وين بقى بالي من دخلت وملگيتج
سماره : احجي وياه وصوتي مخنوگ من البچي ... منذر طلگني
بعد ما اريدك...
منذر: شنو شبيج سماره ليش تبچين كلشي مدا افهم
سماره: سديت التلفون ... انهاريت ... من البچي حياتي انتهت... حسبي الله على كل من اذاني ... وحرگ قلبي ....
ياربي ان شاء الله ينچوون بنفس النار الي دا احس بيها ...
الخيانه تأذي مثل الموت ... وادمر كلشي حلو بحياة المره ....
ورا شويه اندك جرس بيت جدي ... عرفته هو
گتله لجدي ما اريد اشوفه ... فهمه الي بيناتنا انتهى ....
سماره : صعدت لغرفتي ... هلكانه من التعب ... والصداع راح يموتني ...
منذر: سماره افتحي الباب
سماره: بعصبيه منذر الي بيناتنا انتهى وما اريد اشوفك ولا شي يربطني بيك
منذر: سماره خلي افهمج ...انتِ مفتهمه غلط او الي وصلج الحجي فهمج غلط
سماره: كافي منذر ما اريد اسمع شي ... ولا افتهم شي
كلشي اتحمل منك الشك والغيره بس ما اتحمل الخيانه والف مره
گايلتلك ... ما ابقى وياك دقيقه ...
منذر: لج بابا والله زميلتي بالشغل
سماره: زميلتك الي الكل تدري بيك تطلع وياها ومتعلق بيها مفكرت بيه ما وگفت بعينك من مخليني مضحكه لامك ولاختك ... وتدري شكد دا اتحمل منهم ...وشكد عانيت وكل الي اني بي بسببهم ...
مغزر بيك كل الي سويته على مودك والي اتحملته ....لخاطرك
لك منذر راح اتخبل ... مدا اصدك انت تسوي بيه هيج ........
اني اموت من يعيروني بسبب الجهال... واخاف لا يأثرون عليك
وتروح تزوج .... وعقلي كله وياك
وانت تعرف وحده من ورايه ... تضحك وتسولف وياها واني ...
يوميه انام دموعي على خدي بسببكم ....
لو تدري شكد احبك كرهتك ... وكرهت كل لحظه عشتها وياك وتحملت اهلك وظلمهم
منذر: لج بابا ماعندي شي وياها والله صداقه مو حب ولا علاقه ...سماره افتحي الباب خليني افهمج ...حبيبتي
سماره: فتحت الباب ... لتگول حبيبتي ... انت متعرف تحب
ولا حبيتني الي يحب ميكدر يخون ...
منذر: انتِ وصلتيني لمرحله ... ارتاح ويا وحده غيرج ... كل ما احاول اتقربلج تبعديني بمشاكل امي واختي وتحمليني الذنب
لهيتي عني وعن حياتنا بحجي امي الي بزعت واني اكلج لتهتمين ... اني راضي وميهمني حجي احد .. انت تغيرتي
ويايه ... واني تعبت لان ما عندي حل لهالمشكله ... ادري ظلموج
وتعبوج وكومه حجيت وتعاركت وما كدرت اسوي شي لان هي امي .... وهاي شخصيتها ... قابل اشيل سيف عليها ...
گتلج كلامهم ميأثر بيه ... انت تأثرتي واني متأثرت ....
والله ما حبيت ولا احب وحده غيرج ...وراضي وقانع ... بحياتنا بدون جهال... انت ِ الي تخبلتي على طفل ...اني رجال جنت ارجع لبيتي الگاج مثل النسمه البارده ...تشيل عني كل تعب
ومتلهفه تكعد ويايه ... بالها وتفكيرها كله يمي ... وحياتنا مرتبه
ومتراهمين .. وقريبين واحد على الثاني ... كلشي أنگلب .....
ادخل الگاج كآبه وتختلين بنفسج ... لو ادرسين ... لو تلتهين بشغل البيت
شكد نبهتج وحاولت افهمج اني متعلم عليج ... وعلى راحتي وياج
وحاولت اتقربلج وانتِ دماغج مو يمي ... كمتي تفسرين كلامي تحريض من امي ....
بطلت احجي حتى ما اضوجج وازيدها عليج ... الى ان وصلت مرحله .... لگيت شخص احجي ويا واطلع من الهم والمشاكل
وتسمعني كلام حلو ... وتهتم بيه... بس والله ما حبيتها ... ولا عندي نيه ارتبط بيها ... مجرد صديقه
سماره: بعصبيه ...كافي منذر تبرر غلطك ... وتكذب عليه ... لان صدك بعد متهمني ...انت لحد اليوم معرفتني اذا تتخيل اني ضعيفه واقبل
بالخيانه الي انتَ تبررها صداقه ... وتتخيل راح ارجعلك ورا هالحجي الي حجيته
غلطان .... لان بعد ما الي رجعه ... وأتوقع هالايام ارفع قضيه طلاگ وما اريد منك اي شي ... كافي الي شفته وتحملته
يمكن الله ما رايد يصير عندي اطفال منك ... لان انت متستاهل اكمل وياك ... والله راد يخلصني من هم امك .... خلي ترتاح هسه ... خلي أتزوجك على مرامها ... انتو الطيب والي يخاف الله ميعيش وياكم
منذر: واني ما اطلك ولا تصيرلي مره غيرج ... ابقي ارتاحي هنا كم يوم وارجع نتفاهم الي يريحج اسوي ... ومن باجر هالبنيه حتى سلام ما اسلم عليها
سماره: تنهدت لان تعبت اريده يفتهم ماعندي خط رجعه ...
منذر لتعب نفسك ... ماعندي نبه اتراجع عن الانفصال وباجر ...
اتصل على سرمد اسأله على الاجراءات
منذر: كافي سماره ... لتنهين الي بيناتنا بسبب عناد ...على شي انتي اول شخص جبرتيني اتجهله .... يومين واخابرج امر عليج ... فكري زين بحياتنا ... ولتهدمين الي بيناتنا علمود غلطه
سماره: طلع منذر وبيومها حالي الواحد ينازع بين الانقاض ... لكن ثاني يوم اول ما كعدت ... رحت لبيت خالد ...خليت السياره والمفاتيح عدهم ... رادوا يعرفون السبب حجيت كلشي لهمسه صح حاولت تصلح بيناتنا لكن اني جنت مجروحه لدرجه
ما اكدر انطي فرصه ثانيه ....
اخذت تكسي ورحت لمحامي ... سألته شلون اكدر ارفع قضيه طلاگ .... افتهمت.. كلشي ورجعت للبيت ....
انطي خبر لامي ... امي بوكتها مقبلت كلتلي انتظري فتره
حتى بعدين تقررين صح ... گتلها ما اريد ارجعله انتهى ... صفحه
وطويتها ... اريد ابدي حياتي من جديد ....
بنفس اليوم خابرتي منذر الو
سماره: الو
منذر: شنو معناها موديه سيارتج لبيت خالد حتى يسلموني المفاتيح
سماره: ماكو داعي تبقى عندي قبل استخدمها بصفتي مرتك
وهسه راح ننفصل ... رجعتها
منذر: سماره طلاك اني ما اطلك شتريدين تسوين سوي ....وكافي ... ترى دتوصلينا لطريق مسدود ...بهالتصرفات
سماره: خلينا نرتاح ... وعوفني ... شوف حباتك واني هم اشوف حياتي
منذر: شلون بله تشوفين حياتج فهميني ...
سماره: مو الي بالك ... اريد التفت لدراستي ومستقبلي ... بعيد عنكم
منذر:ما اطلك ...
