وجهااات النظر السااخرة

#ووجه__نظر(1)

#بتاع_الخزين_يابصل..!!

* عارف إن العمل عبادة و إسعي ياعبد وانا اسعي معاك, أنا راجل مؤمن ومُدرك كُل الكلام دة ؛ لكن مايرضيش ربنا انك تنادي بـ ميكروفونات الساعه 7 الصبح عشان تقول رووومي يابتشنجان.

* زي ما حضرتك بتدور علي لُقمه العيش إحنا كمان محتاجين ننام كويس عشان نصحي نشوف شُغلنا زيك, هستأذنك تعدي الساعه 10 لما نصحي, ومُجرد ما تقول بتاعت التحمير يا بطاطس اُمي هتنزلك جري ولو معاك جبنة كمان هتعمل احلي فلوس من ورانا, امي اساساً مبتعملش اكل غير بطاطس وجبنة!

* يا حاج كُلنا عارفين ان الطماطم حمراا وكُل ستات البيوت بيشتروا الطماطم الحمرا, ا فَ مالهومش لزمه الـ5 ميكروفونات ع الصبح عشان تقول حمراا يا طماطم ! هي فعلاً حمرااا بس مش الطماطم ياحااج.

* وربنا ما هشتري كوسه انا مبحبهاش أساساً, أنا خايف من بعد عمرو دياب ما قال ' والله بحبك موت وأحب برج الحوت ' ألاقي الحاج سعيد بتاع الخُضار بيقول ' خُدلك 2 كيلو كوسه وتعالي اديلك بوسه ' !

* الناس بتصحي علي مورنينج مسج, يصوحوا يلاقوا الفطار جاهز, يصحوا ع ميعاد شُغلهم وهُما شبعانين نوم وفايقين, لكن انا ذنب اهلي ايه اصحي علي صوت واحد بيقول ' بتاااع الخزين يا بصل ' !

* تخلص من الخُضار تلاقي واحد بيقول 'بيكيا حديد قديم ورق جرايد قديم موتور غساله قديم للبييع' وصوته ابن جزمه يجيب صُداع, ولو قررت تبيعله حاجه يقولك دي قديمه ملهاش لزمه وب 5ج ! طب ما انت يابن العبيطه الِ بتقول بيكيا واي حاجه قديمه ! عاوزني ابيعلك النيش بتاع امي مثلاً ؟