وجهااات النظر السااخرة

#وجـهـة_نـظـر [11]

وتضيق دنيانا فنحسب اننا سنموت يأساً .. وإذا بلطف الله يُحينا .! ❤️
**********************
#فلاش_باك.!!

- أهلاً بيك فِ آلة الزمن .. طلباتك؟

= حضرتك انا لسه واخد من عندكوا 4 شهور من سنة 2018، فَ لو تسمح عايز ارجعهم.

- للأسف يافندم مابنرجعش شهور إلاا لو فيها عيب صناعة

= يا باشا السنة دي فاضل فيها كارثة واحدة ويأجوج ومأجوج يطلعولنا

- طيب خُد شهر يناير 31 يوم ومش هنختلف

= يابيه شهر يناير ده كُنت هنتحر فيه مرتين

- ليه بس؟

= مافيش يا سيدي كُنت قاعد فِ امان الله لقيت حمزة نمرة نزل اغنية بتقول 'بتودع حلم كل يوم .. تستفرد بيك الهموم' لقيتني بجيب الموس وكُنت هقطع شراييني لكن لحقوني فِ اخر لحظة

- والهموم استفردت بيك؟

= دي اغتصبتني

- وبعدين؟

= دخلت مود اكتئاب وبعدين لقيت المارد بيقول 'شحنة وشبرقة رصيد وبعزقة' الأغنية علقت معايا ونسيت الاكتئاب واديتها رقص، وفجأه اُمي دخلت عليا شافتني فِ الحالة دي قالت يعوض عليا عوض الصابرين

- معلش هو يناير بيبقي ميكس بين برج الجدي والدلو والحالة حبة فوق وحبة تحت .. عموماً خُد فبراير.

= وعهد الله مايحصل

- ماله ده كمان؟

= ياعم البلد كلها غرقت بصور السيسي متفهمش دا شارع الحكومة ولا انستجرام السيسي

- بلاش تخرج، اقعد فِ البيت اصنع ساحة لنفسك وانطلق

= لأ الساحة دي بتاعت محمد رمضان وهو الـِ شاكمها

- بقولك ايه انا زهقت منك؛ هات يناير وفبراير وخُد مارس ويلا اتكل علي الله

= مارس لأ أرجوك أنا مقدرتش أتحمل احمد موسي ايام الأنتخابات، اشنقني احرقني بس أحمد موسي لأ

- اعمل اكونت علي الفيسبوك وقضي الشهر فِ البيت

= ولما اتمسك اداب هترتاح يعني؟

- هو انا بقولك روح شقة مفروشة بقولك فيسبوك !

= أصلك مشوفتش الـHug ع الفيسبوك بتبقي قاعد ف امان الله وتلاقي الـِ داخل يحضُنك وحاجة اخر سفالة

- ياعم انزل الشارع تواصل مع الواقع بلاش تواصل اجتماعي

= حضرتك انا لسة متجوزتش وشهر مارس ده كُلة رقص وتطبيل

- ومالة الرقص والتطبيل انت مابتحبش تحضر افراح؟

= لأ دي مش أفراح .. دي حنة السيسي

- طيب اشتري هاند فري واسمع اغاني فِ اوضتك

= انا فلست من كُتر السماعات الـ بشتريها وبتبوظ، حتي تامر عاشور الـ بحب اسمعة مبقاش ينفع اسمعة

- ليه .. مات؟

= انفصل عن مراتة بعد شهر جواز، وهو اساساً كئيب واغانية بعد الأنفصال هتبقي قنبلة نكد

- كرة القدم .. تابع كرة قدم

= ياعم مدحت شلبي كرهني فِ اُم الكوره وعقدني من رقم 7؛ سبعتنا وسبعتهم وحاجة نيلة خالص.

- طيب شوف حد تاخده قُدوَة واتبع سُبل نجاحة فِ الحياة

= وليد العاق كنت بعتبرة مثلي الاعلي ف الحياة؛ وللأسف طلع مُجرد وهم وصورة فوتوشوب

- وليد العاق مين؟

= آلعب شمال ويمين

- ايه؟

= انجد الولية

- بقولك ايه متصدعنيش؛ هات الـ3 شهور وخُد ابريل اهو لسه فِ اولة

= شكلك كدا عايزني انتحر!

- وتنتحر لية؟

= ماهو أنا لو زملكاوي طبيعي هقطع شراييني وانتحر

- ولو مش زملكاوي؟

= هلعب الحوت الازرق وبرضو هقطع شراييني وانتحر

- ينعل ابو اصطباحتك .. هات 2018 وشوف عايز تاخد سنة كام ومشوفش وش اهلك هنا تاني

= طيب هاتلي 2017

- طيب ثواني هدخل اجيبـ..

= ولا بلاش 2017 دي خرا اوي .. خلينا فِ 2016 بس دي اخرر منها .. طيب نقول 2015 ولا برضة خرا؟ ايه ده فِ ايييييه انا حياتي كُلها خرا ليه كده !!

- ياعم انجز بقي شوف عايز انهي سنة علي دماغك خليني اجيبهالك ونخلص

= عندك سم فران؟
------------------------------------------------------
كومنت وفوت ياجماعة 😂
انا نزلت رواية جديدة اسمها قواعد جارتين ياريت تقروها