وجهااات النظر السااخرة

#وجـهـة_نـظـر (10)

#عندما_يجتمع_البيست_فريند..!!

- وحشتيني ياجزمه

= وإنتي أكتر يا قلب الجزمه

- يومين غايبه عني ! يومين يا حقيره

= قناه الجزيرة

- اكُل فطيرة

= والله وحشني ألشنا وتفاهتنا وهزارنا.. وكمان فاتك أحداث كتيير وبلاوي

- احكيلي احكيلي

= هحكي كدا حاف ؟

- نطلب 2 شاورما

= الأحداث الـِ فاتتك فيها إرتباط وفركشه

- يبقي 4 شاورما

= وفِ ساينس فيكشن الـِ بتحبيه

- مدام فيها ساينس فيكشن يبقوا 4 شاورما و2 كريب

= وفِ سفالة واعراض ناس

- يبقي نخليهم 8 شاورما و4 كريب عشان أنا بموت فِ السفاله

= وفِ سكرين شوتس وفضايح

- كدا هبيع الموبايل ونجيب سيخ الشاورما بالراجل السوري نفسه

= أجلي بيع الموبايل لما اقولك شيماء بتكراش علي مين, عشان حوار كُله ضحك وفرهده وأنا بجوع بسرعه

- هي شيماء بقي عندها كراش وانا غايبه ؟

= فِ نفس اليوم الـِ سارة فركشت مع محمود

- هي ساره فركشت كمان ؟

= بعد هيثم ما طلب ايد نورهان

- نورهان اتخطبت !! لأ ثواني أجيب بيبسي بقي عشان الموضوع عاوز تركيز

= بس دايت عشان الرچيم

- اساسي يعني .. وهجيبلك شوكولاته كيت كات معايا ومندولين

= بس ياريت دايت برضو

- يابنتي اساسي

= شوفتي ياستي, أهي نورهان اتخطبت وهيثم كمان الـِ خطبها

- المعفنه دي تتخطب لـ هيثم ؟

= دي صفرا يابنتي ومش حلوة اساسا

- بتلبس بديهات بُرتقاني

= يعععع .. لأ ولبسالي حلق فِ مناخيرها

- اُم مناخير كبيره المعفنه

= ف مره خدت معاها سيلفي, لقيت الصوره كلها عباره عن مناخير بس ؛ إنتي مُتخيله ؟

- بقي دي تتخطب .. دي تتخطب !!

= أنا زيك مش مصدقه والمُصحف

- هيسيبوا بعض .. إسمعي مني هيسيبوا بعض .. وبرهان

= يابيبي واضحه زي الشمس مش هيكملوا بمناخيرها دي

- هيتخانقوا الأسبوع الجاي .. وهيضربوا بعض هنا قُدامنا وهنقعد نضحك عليهم .. أنا متأكده

= هيفركشوا فِ وسط الأسبوع .. دي لابسه بدي برتقاني بقولك

- لأ قبل الاسبوع بيوم هيسيبوا بعض عشان مُختلفين مين الـِ هيجيب الخلاط

= يسيبوا بعض بقي ولا يولعوا بجاز حتي .. إحنا ميشغلناش ومش بنحب نتكلم علي حد

- عندك حق , هو مبقاش إلاا نورهان دي الـِ نتكلم عليها .. كُلي كُلي يا شيخه

= شاوما فراخ دي ؟

- آة

= طب هاتيها وخُدي انتي شاورما لحمه

- هاتي

= خُدي

- هيسيبوا بعض صدقيني

= .........................

- مبترديش ليه ؟

= يابنتي ببلع ثواني

- بقولك هيسيبوا بعض

= مناخيرها كبيره اصلاً

*******-**--***************---***
اعملوو فووت وكومنت متابعوش في صمت 😒