......سلم عليهم و علا واقفة ....... قال ليهم الامتحان كيف ......ردو الاتنين كويس .......بقى يعاين لي يارا في عيونها المبلولة بالدموع .......ما قدر هيثم يتحمل المنظر قال لي يارا ......يارا عايزك في كلمة ممكن دقيقة ........يارا قالت ليهو لو عندك كلام قولو هنا .......هيثم عاين لي هادية وعلا و ما عرف يتصرف كيف .......جر يارا من يدها و مشى بيها بعيد و يارا بقت شغالة بي يدها التانية تبعد في يدو بس ما قدرت و حست بي رجفة يدو و برودتها و ما عارفة حصل ليها شنو في اللحظة ديك .......علا بقت مفنجلة عيونها و تعاين ليهم لمن مشو و هي واقفة مع هادية .......دخلت في النار و جات مارقة علا غبينتها علي يارا زادت بالذات لما شافت هيثم ماسكها من يدها وعايزين يتكلمو براهم و في خصوصيات بينهم و حركات جديدة .......
.يارا اقسم بالله انا بحبك و انا ما حبيت في الدنيا دي بت زيك .......هيثم انسى الموضوع دا ......أنسي اني بحبك ولا انك كمان بتحبيني .......أنسي الكلام القلتو ليك و مستحيل بعد الامتحانات تحصل حاجة .......لالا يا يارا والله حرام عليك ليه انتي بتعملي فيني كدا عشان واثقة اني بموت في التراب البتمشي عليهو ........يارا نتلت يدها منو و مشت خلتو وهي بتبكي .......بقت تقول انا بحبو بس ما بقدر اكون انانية للدرجة دي اخواني لسة مشوارهم طويل و امي و حاجات كتيرة ......فجأة مسكها من ورا يارا ......فكني انت عايز شنو ياخ قلت ليك انسى .......ما بنسي و حتكوني من نصيبي و مستحيل تكوني لي غيري .....جراها عليهو لمن ضربت في صدرو ....... اتخلعت و بقت تتلفت ......نحن في مدرسة لو سمحت و مشت خلتو .......يارا قلبها كان عايز يقيف لما هيثم قرب منها بس لازم تدوس علي قلبها شوية عشان حاجات كتيرة اهم بالنسبة ليها ......يارا جات قالت لي هادية انا طالعة بعد كدا مع السلامة .......علا جا ت بي ورا يارا ......يارا يا را هيثم قال ليك شنو و في شنو بينك و بينو ......عاينت ليها و مشت ما ردت عليها .......علا اتغاظت .......
نفيسة كانت طالعة من المكتب لما سمعت واحدة جارية وراها ......اهلا وسهلا ......انتي نفيسة .....ايوا انا معليش الظرف دا ليك .....فتحت الظرف لقتو جواب إنهاء خدمة ......نفيسة عضت شلوفتها و عيونها بقو كبار .....حسبي الله و نعم الوكيل .....و قعدت في اقرب كرسي و بقت تبكي ......فجأة قشقشت دموعها و مشت لي مكتب المدير و قالت ليهو انا مالي عملت شنو ......والله حقيقة ما عارف بس قالو في مسألة اشانة سمعة حصلت ليك......نفيسة قربت تقع من الصدمة ........كيف يعني ما فهمت اشانة سمعة دي كيف انا لا اتعمل لي مجلس محاسبة ولا اتقبضت في حاجة ولا انتو بتتهمو من راسكم .........يا استاذة دا موضوع انا ما دخلي فيهو الموضوع جاي من رئيس مجلس الإدارة .........طيب عايزة مستحقاتي .......جدا بتكون مرفقة مع الجواب شوفي كويس .....فعلا فتحت الورق لقتو مشت البنك صرفت و جات البيت و شنطتها كانت باين انو كبيرة شوية على غير العادة.....
جات سلمت على امها و قالت لي علا الامتحان كان كيف .....كويس الحمدلله........علا قالت لي نفيسة ما تقعدي شوية .....دقيقة بس ماشة الحمام مشت نفيسة الحمام و جات لقت شنطتها مافي مكانها بس ما ركزت مشت بي غادي لي بناتها ما حسستهم بي حاجة ......يارا بقت تحكى لي امها الامتحان كان كيف و جابو فيهو شنو ونقيسة ركزت مع حاجة واحدة بس .......امي الاستاذة قالت لي ساعدي سنا البت الجنبي ......اوعك يا يارا اوعك تعملي كدا مالك بيها .....امي يعني مساعدة ما اساعدها ......بقت اسمها مساعدة من متين دا اسمو غش ......ولا انتي ما تسألي زول البتجيبيهو لي برضى بيهو ...... امي لكن والله مرات الزول بكون حافظ بس يعني عايز لزة بسيطة يمنى قعدت تضحك قالت ليها اي والله يا يارا بتكوني حافظة بس البداية ما بتجيك و بعدين الصديق وقت الضيق ......نفيسة عاينت ليهم شديد و ما ضحكت معاهم ......انا قلت ليكم الصاح شنو انتو اعملو البرضي ضميركم بس........يارا و يمنى دنقرو و حسو بالذنب .....خلاص يا ماما اسفين .......عايزة اقول ليكم انا اخدت اجازة لحدي ما امتحانات يارا تخلص .......يا سلااام .......خلاص قومو ارح جهزو شاي و قهوة علا قالت لينا نجي نشرب معاهم شاي المغرب ......من متين علا بتحبنا للدرجة دي ......يا بنات من سكات قومو .......
يتبع....
