......هنا هيثم عاين لي ابو علا قال ليهو يا حاج معليش لولا وجودك والله بتك دي كان دفنتها ليك هنا دا ......دي اخلاق وين دي تعاين بي قد الباب كيف يعني دي حرمة بيت يا حاج انا اسف بس بنتك دي ما ربيتها .....هيثم بي كلامو دا بحاول ينسيهم المشكلة الحقيقية عشان ما ياذو يارا و يقبلو على علا ....و فعلا نجح في تضليلهم ......طوالي ابوهم أدى علا كف لمن وقعت محاسن جات جارية لحقت بتها و قالت ليهو براحة يا حاج البت صغيرة ......قال ليها صغيرة هي ولا يارا ......مشى دخل جاب سلك الكهربا و محاسن بقت بينو و بين علا و علا عايزة تموت من الخوف و البكا .......ابوهم شعر بالاهانة شديد و قلبو ما برد لما هيثم قال ليهو بنتك ما مربية و بقى يضرب فيها مرة تجي في علا و مرة في محاسن و نفيسة برضو اخدت نصيبها بعد قالت لي يارا ادخلي و بقت تحجز في علا مع امها و ابوهم إلا قلبو برد حتى مشى خلاهم ......
هيثم بس كان بعاين و مربع يديهو لانو لو ليهو مراد كان هو برضو ضربها ....نفيسة جات لي هيثم قالت ليهو انت اخو هادية مش كدا اتفضل ......قال ليها والله اسف على الحصل بس دا كان لازم يحصل .....ما مشكلة تتاسف على شنو انا عايزة اشكرك لانك وقفت مع بتي ......لا شكر علي واجب يا خالة و انا عايز اقول ليك حاجة و لو انو الوقت ما مناسب ......اتفضل ......قال ليها بي صراحة بتك ماشاء الله تبارك الله عجبتي و انا عايزها على سنة الله و رسوله و حاجيب اهلي و اطلبها قريب بس هي لما فاتحتها فيالموضوع اترددت....... و قالت إلا تشتغل و تعوضك المهم حكى ليها كلام يارا و قال ليها دا زادها و كبرها في نظري بتك ما بتفكر في روحها بتفكر في اخوانها و في امها انا ما اظن ألقى تاني بت زيها عشان كدا لو ممكن تقنعيها لي ......نفيسة مبسوطة و عايزة تطير من الفرح لي يارا بنتها كبرت و بقت عروسة ......بقنعها ليك بس بعد الامتحانات ......وعد يعني.....ايوة وعد أن شاء الله.......نفيسة بعد كانت مخلوعة و خايفة على يارا بقت مبسوطة و فرحانة ليها و دخلت مشت شافت علا و امها مجرد ما جات قفلو الباب في وشها .....
.نفيسة الفرحة الجواها كانت اكبر من دا كلو مشت لي بيتها........ لقت يارا متضايقة قالت ليها يا امي والله انا غير المشاكل ما بجيب ليك حاجة انا زاتي تعبت ......نفيسة قعدت تتطوطح في كراعها ساي و تاكل في التسالي ......و تحضر في مسلسلها.....يابت ها مشاكل شنو انسي اساسا نحنا ربنا معانا عشان كدا دايما منصورين .......امي انتي مالك.متعاملة مع المشاكل بي برود كدا .......بي صراحة هيثم بردها علي .......يارا اتخلعت .....هيثم مالو قال ليك شنو ..ّّّّّ....انتي احكي قال ليك شنو بالتفاصيل ......يارا خجلت و دنقرت ......يابت انتي عويرة انا امك و صحبتك ما عايزة تحكي لي حاجة مهمة زي دي ......لالا يا امي اقفلي الموضوع دا اسي ......اي بقفلو اسي بس لابد انو يتفتح تاني بعد تخلصي امتحانات.....بس عايزة اطلب منك طلب ......اها يا امي اطلبي ......تاني ما تمشي ليهم في بيتهم بعد اخوهم طلبك عديل ......امي انتي شاكة فيني او ما واثقة ......لالالا والله انا ممكن احلف مصحف عليك عديل بس عشان اهلو ما يفهمو اننا مندلقين عليهم كل يوم ناطة ليهم في البيت .......اي صاح كويس يا امي من عيوني .....
.عدو كم يوم و .نفيسة يوم مشت المكتب حقها و هي مبسوطة انو الحمدلله قدرت تنجز و احوالها ماشة كويس قالت بس اطلب سلفية اعمل لي واطة و ابنيها طوبة طوبة للاولاد ......ّو يارا الحمدلله حتتزوج و كمان ناس وضعهم فوق الممتاز كدا بطمن عليها ......و هي كانت بتفكر و مبتسمة ...ّ.....فجأة في زول طاخ ضرب ليها الطربيزة .......عاينت بي خلعة لقتها مراة لابسة توب انيق قريبة ليها في العمر دا لو ما كانت قدرها .......لو سمحتي دا شنو في شنو ...ّّ...انتي يا اختي لافة علي راجلي مالك .......ناس المكتب اتلمو و نفيسة اعصابها بردت .......انتي منو لو سمحتي اتكلمي بي ادب ........انتي عندك ادب عشان انا اتكلم معاك بي ادب احترمي نفسك يا خالة و خافي لانو عندك بتين ......نفيسة لسة مصدومة و بتعاين و عيونها رقرقو. ......انتي بتقصدي شنو بي كلامك و انتي منو اساسا ......انا زوجة الجكس بتاعك حسين يا حلوة .......نفيسة جات واقعة في الكرسي ......حسين انا علاقتي معاهو شنو لكن ........عايني هنا شوفي دي كلها رسائل بينك و ببينو ........عاينت للتلفون بدون تركيز .......بس دي رسائل عادية و كلها البنات كيف و اولادك كيف و مساء الخير و على فكرة راجلك هو االبسال و انا برد فقط ....... و بعدين فعلا طلب مني الزواج زمااان و انا لو كنت زي ما بتقولي ما كان رفضت عشان خاطرك يا مدام و عشان ما تتشتتو زي ما نحن متشتتين ......عاينت ليها مسافة و .مشت مدام حسين و خلتها تبكي جات واحدة من المكتب قالت ليها .......نفيسة انا واثقة انك ما من النوع دا لكن ما صاح كان تتواصلي معاهو .......والله يا اعتدال انا ما كان قصدي شي كان برسل كتير مرات ارد و مرات ما ارد و بسال من اولادي و كدا انا بقول من الاهل ......نفيسة من الاهل شنو هو طلبك معناها الكلام هنا انتهى تقطعي معاهو عشان ما يكون طمعان لسة ......كلامك صاح انا غلطت بس ما لي درجة الاهانة دي ........و الله يا نفيسة اختي ما تستاهلي لكن دا حال النسوان الزمن دا الواحدة تهبب في راجلها النهار كلو عشان الضبانة ما ترك فيهو اخر الزمن ......الحمدلله علي كل حال .....
.
الامتحانات بدات و علا و يارا كل زول في حالو و نفيسة بتحاول امها بس امها ابت ترضى كلو كلو ......هيثم جا في اول امتحان كان الرياضيات لانو كان مجتهد معاهم فيهو .......جا سلم على يارا وقف سالها ......مستعدة خلاص للامتحان ......أن شاء الله......ما عايز اقل من 90 في الامتحان دا بالذات لاني اجتهدت معاكم......يارا قالت ليهو كويس .....هيثم عاين ليها قال ليها تسلمي لي انتي انا واثق فيك بس ما واثق في المتبومة دي و لكز هادية ......انت بتسهون بي قدراتي اصبر لي لو ما قفلتو ........علا كانت واقفة بعيد و شافت هيثم واقف مع يارا النار انطلقت فيها ......جات عليهم سلمت على هادية و هيثم بس ما ادت يارا اي اهمية .....و بقت تتراشق كانو قبل كدا ما احرجها او بمعنى اصح طردها عديل بس ما تابت و لسة عندها امل حتي لو ما حصلت عليهو تخرب البينو و بين يارا ......دخلو الامتحان و هيثم مشى الشركة لانو اسااسا نزل مع ابوهو و مجتهد عشان ابوهو يقتنع بعدين يعرس ليهو ........بعد انتهت الجلسة اتصل هيثم على هادية و بقى يسأل فيها خلصتو اها اشتغلتو كيف و كدا ......قالت ليهو تمام جابو كتير من المسائل الاشتغلناها سوا ......و يارا اشتغلت كيف كدي اديني ليها اتكلم معاها .......
يتبع....
