امهم بدات تخاف و حست انو في حاجة ما طبيعية و رماح عضت شلوفتها كانهم اتكشفو .......في شنو يا بنات ما تتكلمو .......رماح بدات تبكي بدون مقدمات و لحقتها لمياء و بقو يبكو بي فزع و رماح بدات تحكي لي امها بي براءة و بالتفصيل الشافتو .......امهم ختت يديها في راسها و عضت شلوفتها و هي مفتحة عيونها كبار و بقت تكورك سجمنا سجمنا سجمنا ........ّمسكت بناتها و بقت تبكي معاهم .......اتصلت بي زوجها و رد عليها بي نفس مفتوحة ......اهلا يا روووح روحي اشتقتي لي بالسرعة دي .......الحقني يا امام .......بسم الله مالك يا سميرة الحصل شنو .......بدات تحكي ليهو الحصل لمياء اساسا ما بنتو بنت اخوهو المتوفي اللي حصل ليهو حادث فجأة و اتوفى و اتزوج مرتو عشان يلم بنت اخوهو لمياء و ما تتيتم رغم اعتراض امو و اهلو بس اصر يلم بنت اخوهو و مرتو و جاب منها رماح و عصام الصغير و اغترب عشان يوسع ليهم المعيشة و رغم مضايقات امو لي سميرة مرتو بس صبرت على كل كلامهم لحدي ما فصل ليهم بيت براهم شقة جنب ناس امها عشان تكون متوازرة بي اهلها ......قال ليها و هو بضرب بي يدو التربيزة و هو بتنفس غضب و بقى جايط في سميرة البتبكي و ما عارفة تتصرف كيف .......انتي كيف تخليهم يطلعو براهم ......انا بيدي شنو اصرو البنات و البقالة قريبة .......قريبة كيف وين يعني ......اسمها بقالة (.....) ......ايوااا عرفتها حقت عمك الكبير الاسمو الشاذلي .......ايوة ياها انا حابلغ الشرطة ما بقدر اقعد ........لالالا اووووع تكلمي زول انا بدق خروج نهائي و بجي اقعد معاك لا اغتراب لا قروش ما دايرين ان شاء الله نموت من الجوع بس اكون معاكم .......كيف يا امام ما نبلغ و حقنا لازم ناخدو منو و البت حتضيع .......يا سميرة بالله اصبري انا قلت ليك جاي و بتصرف .......لكن يا امام اي تاخير حيكون ضدنا .......هاج فيها و قال ليها قلت ليك لما اجي ياخ ......بس امام كلامك دا ما منطقي السكات ......امام قبل تكمل قفل الخط في وشها .......مشى و هو ما شايف قدامو قال ليهم انا ماشي بس لاقتو صعوبات كتيرة و مدة العقد لسة باقي عليها فترة عشان يتجدد و الشرط الجزائي كبير جدا و ما قدر يعمل اي شي غير انو ينتظر كم شهر .......كلم سميرة بالحاصل .......طيب قلت ليك احسن نبلغ يا امام ......سميرة اسمعي كلامي دا انا الا اجي اتصرف سامعة اووووع تتصرفي اي تصرف سامعاني اوع تكوني كلمتي زول ........ قالت ليهو سميرة مستحيل اكلم زول بالحصل طيب خلاص في انتظارك .......
خنساء و عواطف الاتنين بقو تقال و قربو للولادة بس عواطف بتتدلع و خنساء ما طايقة نفسها ولا طايقة تتكلم مع طارق الرافض يطلقها إلا بعد تلد .....ناس ديما كملو كل الجرعات و عكس توقعات دلال و طارق و عم الشاذلي كانت رغم اثار العلاج و الكيميائي نفسياتها مرتاحة و مبسوطة جدا و خالد فرحان لي فرحها و قال لي خالو و حسنية عايزين نسكن برانا بعد كدا ..ّّ...ّبس ابوها رفض تماما و قال ليهو انا اديتكم الشقة الفوق عشان بتي ما تبعد عني انا عايزها تعيش معاي ......في الاخر استسلمو لي امر عم الشاذلي و قعدو في الشقة و طارق بتقلب على نار الاشواق لي خنساء الما مفهوم ليه بقت نفسياتها محطمة كدا .......و ما عندو اي تصرف تجاه حالتها غير الصبر لحدي ما تلد و نفسياتها تتحسن و ترجع زي اول .......و بس بمشي البيت يديها مصاريف و جهز ليها جهاز الولادة كامل و رغم انو حسين و مرتو شالو منها حاجات بس ما اثر فيها كانو الموضوع ما بخصها و عارفة و ما سالتهم ........
قبل مواعيد الولادة عواطف قالت لي حسين انا عندي قروش لاماها عايزة اشتري لي بيت .......حسين بحلق فيها .....عندك قروش قدر دا يا عواطف و داسة مني .......هي دي ما قروشي مالك بيها انت دخلك شنو تصرف زيك زي الرجال ......في الاخر حسين ما قدر يتكلم معاها قالت ليهو المهم ارح معاي نفتش .......فتشي براك موش لميتيها براك ما عندي بيك اي شغلة ......عواطف ما اشتغلت بيهو مشت براها مكاتب العقارات لحدي ما لقت بيت مناسب بس عندها نص القروش اتصلت بي حسين و كلمتو قالت ليهو تعال ساهم معاي .......قال ليها كمان اساهم معاك عشان تكتبيهو بي اسمك لا ياخ .......قالت ليهو دا بيت فرررصة اتفقو في الاخر يقسمو البيت نصو يكتبو حسين بي اسمو و النص التاني عواطف تكتبو بي اسمها .......عواطف عارفة راجلها على قلبو قدر دا عندو القروش بس بخيل ساي ......في الاخر مشو المحامي و سجلو البيت نصو بي اسم عواطف و النص التاني بي اسم حسين .......فعلا بعدها بدا كل واحد يجهز في الجزو بتاعو نقاشة و بوهية و سراميك و عواطف ولدت قبل خنساء .......و بعد السماية حسين قال ليها انا بنقل الحاجات للبيت و بعد تتمي الاربعين نرحل .......قالت ليهو تمام .......قال ليها خلاص حانقل الحاجات في الجزو بتاعك عشان اكتمل ......لالا يا اخوي اووووع تهبش الجزء بتاعي عايزة ااجرو و استفيد من قروشو نرحل في الجزء حقك و بعدين انت للان بتتحكحك مالك ما خلصت .......حسين بقى مصدوم بس ما عارف يقول ليها شنو مراة بتفكر بالعقلية المادية البحتة دي ........اساسا انا تحت ولايتك مفروض السكن و. الماكل و المشرب عليك .......حسين كان فاكر انو حيستفيد من عواطف و لقى العكس تماما ........
خنساء اتخلعت قالت لي حسين و ابوك و امك تمشي تخليهم براهم هنا .......قال ليها ما عندي شغلة اقعدي انتي اساسا عايزة تتطلقي موش اقعدي لازمي امك و ابوك .......خنساء في الاول زعلت تاني قالت لي روحها ما صحي اساسا انا كدا كدا حاتطلق بقعد معاهم مالي ما بقعد عرس تاني زاتو ما دايرة بربي ولدي ولا بتي الما معروف من وين دا و خلاص .......خنساء كانت بتتعب بس بترفض تماما تمشي دكتور تفحص و ما اهتمت بي نفسها نهائيا و طارق كان بلح عليها عشان تجي تحمد لي اختو السلامة بس كانت بتتحجج بي تعب الحمل و كدا و طارق خلاص فاض بيهو منها ما عارف مالها معاهو بس برجع بقول يمكن الحمل مؤثر علي نفسياتها ........في الاخر جاتها حسنية زارتها مخصوص ......مما شافتها خنساء اترمت فيها و بقت تبكي مافي زول حاسي بي وجعها و المها زي حسنية نسيبتها .......طارق استغرب من الموقف بس ما خت حاجة في راسو .......قعدت مع حسنية و اصرت تدخلها غرفتها و يتكلمو براهم .......خنساء حكت لي حسنية مخاوفها .......حاسة بيك و الله يا خنساء حاسة بيك و عارفة الالم الانتي فيهو بس العرفك شنو انو الولد الفي بطنك دا طفلو هو .......الزمن و التوقيت نفسو .......لا حول ولا قوة إلا بالله يارب ما يحصل كدا بس انتي ما تحسسي طارق بي حاجة ليه بتعملي كدا خليك عادية كانو مافي حاجة .......كيف يا خالتي اعتبر كانو مافي حاجة ما بقدر ارجع البيت دا تاني ......خلاص انا حاقنع طارق ترحلو مكان تاني و تسكنو براكم .....لالا يا خالتي انا خلاص قنعانة ......ليه كدا يا خنساء طارق ذنبو شنو .......خنساء بقت تبكي بي قهر و انا يا خالتي ذنبي شنووو انا ذنبي شنووو .......ابوها جا ماري بالغرفة و سمع الم بتو و القهر البتتكلم بيهو حس انو ممكن تكون نسيبتها بتضايقها .......
يتبع....
