.يابت كدي ادي نفسك فرصة شكلو عريسك بتحب .......خليك.مني كيفك و كيف عمر و باقي الشلة ......تمام بخير فاقدنك بس ......عايزة الاقيكم ......تمام تعالي في نفس الكافي البنتلاقي فيهو و جيبي معاك عريسك .......يابت عريس شنو انا عايزة اغير جو معاكم تذكري لي الغم دا قال عريسك قال ......هههههه عليك الله خليهو يتعرف على الشباب .......ديما قفلت من زينا و بقت تفكر.......فكرة برضو عشان انا ما اشيل الهم و اكون بفكر انو مع داليا اكيد و بعمل في شنو و الجوطة دي .......طلعت برة لقتو راقد في كرسي .....يا شاب يا جذاب انت .......حرام عليك والله عايني راجلك راقد كيف يرضيك يعني اتكرفس كدا ....ّ..ديما قلبها نط من مكانو .......راجلي ؟؟......بالاسم يعني ما فرقت ......يلا يا راجلي بالاسم يلا ارح نطلع .......نمشي وين .......ارح عندي اصحابي عايزة الاقيهم في الكافي القريب و مصرين يتعرفو عليك و تجي تتونس معاهم .......خالد حس دي فرصتو يرضي ديما عشان اليوم.ما تعمل نفس موقفها .......رحب بالفكرة و نزلو فعلا و داليا كانت فايرة و بترسل لي خالد في الواتساب بس ما رد عليها خالص و طلع مع ديما .......مشو نزلو و قعدو يتونسو و خالد بقى يراقب في عمر متلصق على ديما و دايما يديهم مع بعض و بضحكو و يتوشوشو ........خالد ما اتحمل الموقف .......جر ديما من يدها قال ليها يلا ارح نمشي .......مالك يا خالد في شنو ......قلت ليك يلا ارح نمشي ......في شنو يا شاب ما تهدى......لما عمر قال كدا خالد ما اتمالك نفسو و ضربو بي يدو في كتفو .......مالك ومالي راجل بتكلم مع مرتو انت دخلك شنو ......خالد دا شنو مافي داعي للمشاكل عمر اتحرج و مشى طلع برة .......ديما عايزة تجري تلحقو خالد قال ليها ارح نمشي و مسكها من يدها و بي قوة جراها لحدي ما وصلو العربية .......فتح الباب و ركبت و هو ففل الباب و ساق بأقصى سرعة .......في شنو يا خالد مالك هايج و جايط كدا .......بالله دا اسي صاحبك ؟ واحد تافه و قليل ادب كمان ......عمل شنو لكن لي دا كلو ......ما شايفاهو لاصق فيك كيف ؟ ......عادي الموضوع ايزي .......ما ايزي ولا زفت بالله و تاني مع الزول دا ما اطلعي خالص ......انت بتغير يعني ......ياخ لا بغير ولا حاجة بس قلت ليك .......نحن البينا دا ما ارتباط على فكرة ......حتى ولو انا زوجك مفروض على الاقل تحترمي وجودي و بقى يدق في الدريكسون .......زوجي لي متين كلها فترة و ننطلق....... خلاص احترمي نفسك لحدي ما اطلقك بالله .......خلاص طلقني اسي دي انا زولة متحررة ما بتحمل الخنقة و التقيد ......اي بطلقك .......ما تطلق منتظر شنو .......في اللحظة ديك دخل خالد في العربية القدامو ......
نقلوهم سريع الحوادث مع انو ما حصلت ليهم حاجة خطيرة ......بعض الكدمات و الرضوض و الفكوك ......ديما و خالد ختوهم في نفس الغرفة و بقو يعاينو لي بعض .......خالد قعد يضحك في عز الالم ......ديما برضو ضحكت مع انو ما كان عندها نفس للضحك بس عاينت لي خالد وشو كان مورم .......الممرضين بقو يعاينو بي استغراب .......عملو ليهم صور أشعة و بعض الفحوص ......قالو ليهم انتو زوجين ؟؟ ......رد خالد بي استغراب ايوة في شنو ؟ ......ديما عاينت ليهم و خايفة من الكلام الحيتقال .......المدام حامل و الحمد لله البيبي بي امان بس ما تتحرك عشان يثبت و كتبو ليها مثبت حبوب و الممرضة ادتها حقنة .......ديما عاينت لي خالد بي صدمة .......خالد بي نفس الصدمة ......ديما فكرت في انها تنزلو و دي حاجة في منتهى البساطة قالو ما تتحرك اكيد حتتحرك و بعنف كمان ........
رجعو البيت بي تاكسي و دخلو و الناس كلها استغربت مناظرهم في شنو الحصل شنو مالكم ......و ديما امها بقت تقعد فيها مالك يابت الحصل شنو .......ما حصل شي حادث بسيط ......دا كلو بسيط سجمنا .......بعد طلاع روح حتى خلوهم يطلعو شقتهم ......خالد قال لي ديما ما تمشي على رجلينك .......ديما فهمتو و مصرة تمشي على رجلينا و تطلع السلالم عسى و لعل تنتهي من المصيبة دي .......خالد جراها و شالها بالقوة طلع بيها السلالم .......داليا جات جارية على اساس يمكن خالد يبرر موقفو بس لما شافت منظرو بقت مصدومة اكيد ما فاضي من الهانم بتاعتو .......ديما و خالد بقو قاعدين و اي واحد ما قادر يعاين في عيون التاني .......خالد راسو يودي و يجيب و حاسي انو مستحيل يستغنى عن طفلو من ديما ....ّّّّ....ديما بتفكر عكس خالد تماما حاسة انو كاتم نفسها و ما حتقدر تتحمل عدم الحرية الحيحصل بعد تلد و تتقيد بي طفل و رضاعة و كرش ما قادرة اساسا تتخيل الفكرة ........قعدو ساكتين الاتنين فترة بعد شوية ديما قالت ليهو نعمل شنو ؟؟........بالنسبة لي شنو .......اكيد بالنسبة للمصيبة دي .......حرام عليك مصيبة كيف يعني دا طفلنا .......انا خلاص قررت اتخلص منو لانو حيكون تقيد بالنسبة لينا .......لالا اووووع تعملي فيهو حاجة دا ما ولدك براك دا ولدي انا كمان .......حتى لو حيربطك بي للابد ؟؟.......عاين ليها مسافة و قطب حواجبو قال ليها حتى ولو بربطنا للابد ........انا مستحيل اقدر اتحمل حاجة زي دي .........بعد نقااش طويل ما وصلو لي حاجة اي واحد مصر على رايه ......
حسين عرس عواطف و طلع القروش الداسيها السنين دي كلها و امو لما شافت الدهب الجابو حسين لي عواطف لمن العبرة خنقتها .......دا كلو عندو و ما حصل كلف نفسو يجيب لي ابوهو حبوب الضغط. .....سكتت و باركت ليهو و لي عروستو عادي و حتى خنساء و نسابتها جو بس ما كلهم ديما طبعا اعتذرت .......
ديما كل ما تلاقي زينا و تتونس معاها حاسة زينا متغيرة منها جدا ما طبيعية ........في مرة اصرت ديما تلاقيها برة و قالت ليها عايزاك فيموضوع مهم و حساس ........انتي يابت مالك مما انا اتزوجت بقيتي تتعاملي معاي بي برود كدا .......انا ؟؟ لالا ولا شئ.......يابت مالك يعني لو انا فارضة نفسي عليك قولي انا تاني زاتي ما بجيك .......يابت دا الوحم اشتغل والنفسيات بدات ولا شنو بتقولي كدا ......زينا قبل الوحم و الزفت قلت ليك انا بشحدك شحدة عشان تطلعي معاي و بتصل كتير ما بتردي و ظاهر انك بتتهربي مني و يوم قلت ليك عاملين كرامة في البيت بي مناسبة وصولنا ليه ما جيتي كل الشلة جات إلا انتي موش حاجة غريبة .......بعد ضغط من ديما و نقاش طويل و احرجت زينا جدا ......زينا اتلبشت و فكرت كتير تقول شنو و خايفة من ردة فعل ديما .......بي صراحة ......ايوووااا بكل صراحة عشان كلنا نكون مرتاحين ......طيب بس ما عايزاك تزعلي ولا تنفعلي و البينا يظل زي ما هو .........يابت انفعل شنو و اتضايق شنو احكي بي راحتك .......تتذكري يا ديما الموقف الحصل لي بيتكم يوم عرسك لما مشيت اودي الحاجات .......اها ايوة متذكرة عشان كدا يعني ما عايزة تتواصلي معاي ........لالا دقيقة خليني اكمل الزول القلت ليك عمل لي الموقف دا عرفتو هو منو .......اها منو و عاينت ليها ديما بي حذر و انتباه شديد ........
دا ....في الحقيقة ......والله صراحة ......يابت ما تقولي قلقلتيني ........دا ابوك و انا اكتشفت بالصدفة انو دا ابوك .....
يتبع.....
