في مكان بعيد
لنا ماشة في الكورنيش مع سارة ونظرات الكل ملاحقاهم بالاخص الشباب محتارين في جمال البنتين القدامهم ديل والاسر برضو متابعنهم كيف ما يتابعوهم ما ديل بنات ود الميرغني
الحصل لي لنا كل الناس عرفتو اصلا مافي حاجة زي دي بتدسا
اثناء ما هم ماشين وقفت لنا عشان تشتري "اسنكرز" من الكشك القريب للبحر
سمعت بنات وراها بيتهامسوا وحدة فيهم قالت بصوت عالي "اااي دي هي لنا الراجلا شرد وخلاها وكمان بي عين قوية جاية ترفه عن نفسها غايتو ناس ما بتستحي انا لو محلها كان انتحرت"
لنا بس الكلام وصل اضانا دموعا نزلت وبدت تبكي بي صوت علي وجرت علي العربية الكانت منتظراهم سارة اتخلعت شافت اختها جارية وبتبكي مشت لحقتا من غير ما تعرف الحصل شنو
ركبو العربية واتحركو علي البيت طول الشارع لنا بتبكي بصوت مخنوق وساكتة سارة احترمت سكوتها وما سألتها
اول من وصلو البيت لنا جرت علي غرفتها والكل كان موجود في الصالة استغربو من لنا ...امجد رفع يدو بيسأل في سارة"مالا"؟
سارة ردت بسكوت ورفعت اكتافها بمعني "ما عارفة"
لنا دخلت غرفتها وبككت بعدين اتزكرت كلام ابوها ومسحت دموعا اتوضت وصلت وقعدت تقرا قران عشان تهدا وتروق
امجد ما قدر يستحمل يشوف حالة اختو كدا ووقف عشان يطلع وقف معاو حسام قال ليهو"انا ماشي معاك" لانو حسام عارف اخوهو ممكن يعمل اي شي وهو زعلان
طلعو مشو النادي ولحسن حظهم لقو ياسر قاعد مع اصحابو والناس بيباركو ليهو مبروك يا عريس
امجد من غير ما يتلفت مشي لي ياسر وبدا يضرب فيهو ضرب ما طبيعي
ياسر مصدوم حتي ما قدر يدافع عن نفسو ... جو اصحاب ياسر بعدو امجد من ياسر وجا حسام بعّد امجد
امجد بصوت عالي : اقسم بالله يا ياسر دمك ما بيبرد غليلي
حسام بهدؤ: امجد اسبقني علي العربية
طلع امجد وهو بيغلي من الغضب وطوالي ركب عربيتو ودور مشي ولا انتظر حسام
حسام وقف قدام ياسر وقال ببرودة اعصاب : اقسم بالله يا ياسر لو ما جبتك مذلول قدام اختي عشان تسامحك ولو ما ذليتك انت وابوك وخليت الكل شمتان عليكم ما ابقي انا ولد عبدالعزيز الميرغني وطلع بهدوء
حسام كان فيهو هيبة تخلي الكل يحترمو ويعمل الف حساب لي كلمتو رزييين وما بيقول كلام الا وهو متاكد انو قادر يعملو ودا الخلي ياسر يرتبك وقال بصوت عالي بيعكس انو متوتر : " اعلي ما في خيلك اركبو"
ابتسم حسام باستهزاء وطلع
واحد من اصحاب ياسر قال : "والله حسام دا ما هين وقاااادر والبقولو كلو بيسويهو الله يستر عليك يا ياسر "
