أعطيني فرصة

الفصل الرابع

مهاب : شن صار ف هديكا ؟

حمزة مستغرب : من هديكا ؟

ماشاء الله طبعا من قبيلة البنات اللي يعرفهم مافهمش ع من يحكي

مهاب : غفران ي راجل

حمزة : لا شورني بنتعب شوية معاها

مهاب : مش كان تفوتها خير. . .

حمزة : لا!

مهاب : غير بجديات خلي البنت ف حالها

حمزة شبحله ومعش تكلم و الدكتور ماجاش وحمزة ع طول رجع لحوشه وكسد مع امه اللي لاهية ادير ف الكاكاوية وتحط ف الفحم ع الكانون ، أمه محافظة هلبا وتحب عادات زمان رغم انها متوسطة السن لكن اسلوبها كان مبني ع التقاليد واللي يشوف ولدها حمزة احتمال يحلف وهو مش مصدق انه هادا ولدها . . . .

اما بوه كان جوه جميل وعقليته متفتحة ويتقبل كل تطورات العالم وفاهم ان ناس توا مش زي ناس زمان والوقت تغير والتفكير معاه ، طبعا هدا الشي اللي ماتتقبلش فيه نورية ل توا . .

بما انه كان الدلوع والوحيد لامه و بوه ،عيون الناس تركزت عليه وصارو المدامات يوصو ف بناتهم وهكدا نورية خايفة ع ولدها ، حمزة رغم شكله ورغم ذكائه كان عنده مشكلة طبعا ف التفكير ويمكن نقولو انه يحب يميل للقسوة والاساليب الحقيرة ويتمتع ف احراج الناس وكأنه يتغذى منه .

كيف عنده صاحب زي مهاب ؟ مش حاجة غريبة لصديق طفولته اذ انه الكل ماعجبهمش جو حمزة ومهاب الوحيد اللي كان فاهمه وعارف طبعه ، مهاب جاته فترة وهو خايف ع صاحبه يمكن انه يكون مريض نفسي لكن لا كان بكامل عقله ومهاب تعب من المحاولة معاه وخلا الامر لله . .

حمزة : السلام عليكم . . شنجوك ي حبي

نورية : وعليكم السلام ..وين كنت ؟

حمزة : ف الجامعة . . علاش ؟

نورية : لا غير عطلت بس

حمزة : به نمشي نساوي اموري ونجيك

نورية : به

خش حمزة للدار وهو مش مرتاح وكأنه حاس ب حاجة غريبة ف الحوش ، كمل تبديله ومشي بحدا امه ونورية ماقالتش حتى حرف وهو يشبحلها وعارفها انها تبي تقول حاجة لكن ساكتة وهي عارفة الشي هادا . ..

حمزة : يما

نورية : همم

حمزة : عندك كلام وماتبيش تقوليه . . شن فيه ؟

نورية : كانت عندي . .

حمزة : زهرة ؟

نورية : عمتك ي حمزة !

حمزة : اي لاحظت !

نورية : ع الاقل من باب الاحترم والتقدير . ..