الليل كله قعدت صاحية غالبني النوم افكر في الحصل في النادي و العملة العملتها...و قررت اني بكرة من بدري امشي ناس خالتي زينب ....انا لسة ما كنت مقتنعة بكلام نزار انها سمعتني ..وقلت اشوف الموقف كيف ....لو لقيتها زعلانة ح اعتذر ليها طوالي ومن غير لف ودوران... و لو لقيتها عادية ح امشي الموضوع واعمل الحيلة اني جيت اشوفها اشتغلت كيف في البازار..
الصباح قعدت بفارغ الصبر لغاية ما فطرت ابوي و قلت ليه انا ما عايزة افطر..ما كان عندي طريقة انزل لقمة من حلقي...
لما وصلت بيت ناس خالتي زينب ..فتحت لي الباب هي..واول ما شافتني طوالي سلمت علي بضحكتها المعتادة ورحبت بي عادي ودخلتني جوة....
انا طوالي عرفت انها ما سمعت كلامي القلته امس..وحسيت بنفسي صغيرة... صغيرة و تافهة ..شوفوها بالله فرحانة بي كيف ومرحبة بي كيف ...كيف بس قلت الكلام الانا قلته دة؟ ....كيف اسخر بيها كدة...مرة طيبة و مسكينة وبسيطة وكونها بتحب الونسة والكلام دي ما حاجة تخليني اتضايق منها واضحك عليها ...
قالت لي ( ابتسام من امس بالليل راقدة بصداع شديد..اصلها ساعة يقوم عليها كدة 3 يوم تكون راقدة..الدكتور قال دي الشقيقة..قال ليها اتجنبي الحاجات البتجيبوا ليك وما تزعلي نفسك..مافي والله زول زعلها )
قلت ليها (ربنا يشفيها ان شاء الله ..) و اتذكرت انها امس لما قاعدين في النادي بالليل قامت قالت ماشة تجيب موية ودخلت جوة تاني ما جات راجعة الا لما عمي سليمان جاء...يا ربي الزعلها شنو؟
خالتي زينب ما ادتني فرصة احاول اتذكر و قال لي (سمعتي بالخبر؟..)
وما ادتني فرصة اجاوب وواصلت (حبوبة مهند..قالوا وقعت امس جروا بيها المستشفى قالو جلطة...ضربوا لمهند قالوا ليه تجي سريع ...طوالي الليلة الصباح قام رجع بورتسودان...)
انا اتخلعت ..الهام عمتي ما لحقت تضرب تكلمنا وما سمعنا بالخبر دة .....هي واصلت (اصلها هي عندها الضغط و مرض القلب من زمان..عشان كدي بتكون دايرة مهند يكون طوالي معاها...)..
بعد داك خالتي زينب قعدت تحكي حكاوي وشمارات من الحاجات الحصلت في البازار...و لو ما قالتها لي هي ما كنت ح اعرف انها حصلت مع اني كنت قاعدة الوقت كله في النادي..واقتنعت انها عندها موهبة حقيقية في لقيط الاخبار و الشمارات...قعدت معاها زي ساعة كدة وطلعت مطمئنة انه ربنا ستر و العلاقة بيني وبينها زي ماهي...
لما رجعت البيت لقيت ابوي في الصالة معاه نزار ..ابوي اول ما شافني قال ( اهي دي نوسة جات...لقيتيها كيف حاجة زينب؟..)
سلمت على نزار وقلت ليه ( لقيتها كويسة الحمدلله ..)
نزار قام على حيله وقال لي ( انا مسافر الليلة الامارات ..ح اقعد لي اسبوعين ...قلت اجي اودعكم واشوف لو عندكم وصية لناس سلوى...)
