.اتصل ليها بيهو و اداها التلفون .......قعدت ترتب معاهو في الامور و كلام كتير كددا و ادت معمر التلفون ........شنو يا عمك المفاجآت دي ..........هههههه عقبالك عملت لي خميرة كويسة بتعرس لي .......ماشاء الله بالتوفيق يا زول ربتا يتمم على خير ان شاء الله ........اللهم امين بس ان شاء الله يوافقو. .......لكن يا عمار فاطمة دي شافعة .......يا زول انا قاصد تكون كدا عشان اربيها براي ما بضمن بنات الزمن ديل كلهن اسغفر الله بقو جنهن علاقات اخير الصغار الما عرفن للدنيا شئ ديل........معمر شاف كلام عمار منطقي جدا اي صاح والله عين العقل احسن شئ انا زاتي كان جيت اعرس يختارها صغيرة الضمان امان يا زول ........اي والله اها الجديد شنو ........قعدو اتونسو و قفلو .......الصباح هدى ناقة في امها عايزة تلفون .......والله يا امي بنات الجامعة كلهم عندهم تلفونات الا انا معقول نحن في القرن الواحد و عشرين ..........يا بت انا اسي ابيت ؟ كان تكلمي ابوك قبل ما يمشي الشغل عشان يشوف ليك واحد ........خلاص كلميهو انتي انا خايفاهو يرفض. .........خلاص بكلمو ليك .........صباح الخير .......صباح النور كيف اصبحت يا معمر يا ولدي.......الحمد لله بخير مالها دي جايطة و تلعلع من الصباح ........قالت دايرة تلفون ........هووووي تلفون شنو الليك مافي كلام زي دا كمان جابت ليها قلة ادب جديدة قال تلفون قال. ........هدى اتمغصت من اخوها و اتغاظت و عايزة تبكي ........و بعدين عايزة تتصلي بي منو بالتلفون دا. .......كيف عايزة اتصل بي منو بي صحباتي و زميلاتي ........لالا مافي كلام زي دا صحباتك تلاقيهم في الجامعة و مافي داعي للونسة بالتلفون و بعدين خليك في قرايتك ........مالك عليها يا معمر عادي ما فيها حاجة كان شالت ليها تلفون .......لالا يا امي كان ولد معليش لكن بنت تشيل تلفون دي مافي .......هدى مشت الجامعة مكشرة وشها و بعد وصلت الجامعة نست الفكرة و خلتها ........
يوم الجمعة جا و فعلا مشو معمر و هدى و امهم و ابوهم و كمان معاهم سلوى اختهم الكبيرة (متزوجة و بي اولادها ساكنين بعيد منهم ) .......و كمان اخوهم عمر برضو جا معاهم (برضو متزوج و عندو اطفالو بعيد منهم ) ........استقبلوهم بي حفاوة و لما طلبو فاطمة امها و ابوها فرحو شديد و قالو ليهم ما عندنا اي مانع ........علوية قالت ليهم خلاص بنجيب المال و الشيلة و نحدد العرس ........فعلا عمار رسل لي امو شيلة و ريحة من برة و كمان طقم صيغة و قروش كتيرة عشان يرتبو كل الامور ........بداو في جوطة العرس و الناس بقت داخلة و مارقة عشان يرتبو الشيلة يودوها ليهم .......فعلا حددو ليهم يوم و مشو ودوها ليهم ........هدى اليوم داك دخلت لي فاطمة اتونست معاها لقتها صغيرة ما ناقشة حاجة .......و لقتها فرحانة شديد بالعرس و الحاجات الجابوها ليها ........هدى قالت ليها انتي بتعرفي عمار. ......والله ما بعرفو شديد بس مرات بشوفو في الحلة و انا ماشة المدرسة قبل ما يسافر .......ايوااا ما شايفاك مبسوطة بيهو جدا .......هههههه بعرفو بعد العرس ما مشكلة ........فعلا مرت الايام سريعة و معمر استلم شغلو مع عم عثمان في الوكالة ........اول يوم ليهو اتشيك تمام و مشى مبسوط بالشغل الجديد و حيكون عندو راتب ثابت ........ لما وصل الوكالة لقى شغالين معاهو بنتبن .......هيام و رنا ....... بس هيام اكتشف انها متزوجة و راجلها في الامارات .......اما رنا ما متزوجة ياداب اتخرجت .......الاثنين مختلفات تماما مظهرا و جوهرا........هيام انيقة و بتلبس حلو و الريحة ماركة و الشنطة و النضارة الشمسية حاجة الستايل اخر حاجة حتى في كلامها .......رنا عادية جدا و لبسها عادى مافيهو شئ ملفت و صراحة ما انيقة خالص و كمان زولة شايفنها معقدة حبتين ما بتحب تتونس معاهم ما بتحب تاكل مع راجل مهما حصل.......و معاهم عامل تاني للمراسيل و معاهم عم عثمان مرات مرات بجي يتابع الشغل معاهم و مرات بسلمو معمر لانو واثق فيهو. ......المهم بعد اشتغل بي كم اسبوع كان عمار جا عشان العرس و بداو يجهزو و معمر عزم رنا و هيام لعرس عمار و معاهم علي (المراسلة ) .......
.فعلا العرس تم على اكمل وجه و عمار كان مبسوط جدا بي فاطمة الصغيرة و جاهلة ........و يوم العرس جات هيام لكن رنا ما جات ........اتفضلو اتفضلو وين رنا ما جات معاكم .......هيام قالت ليهو والله معليش يا معمر اعذرها هي اهلها صعبين شويتين ما بخلوها اعذرها ......ايوااا ما مشكلة اتفضلو اتفضلو .......جاب ليهم صينية غداء براهم هيام و علي و عم عثمان ...... هيام اساسا شخصية عادية بتاكل معاهم و بتتونس و تضحك ما عندها مشكلة ما ملتزمة للاخر ........بعد العرس هيام اتعرفت بي معمر اكتر كمان معمر برضو عرف ظروفها .......راجلها في الامارات و اتزوجو قريب بجي في الاجازات بس و ما عندهم طفل لسة .......
يتبع....
