المكر السيء

6

#المكر_السيء

بقلمي السيدة العلوية

الجزء 6

تتذكروني لو انشغلتم ب{وعد } رجعتلكم اني مروى.. مرة من المرات نشرت منشور بأحد الكروبات واشوف واحد علق على منشوري

ياس {شاب بلا خلق بلا اي دين .. العمر 23سنة .. العمل :مامكمل دراسةوتركت..اعمل بمحل لتصليح الاجهزة الالكترونية والهواتف النقالة و مدمن التواجد على صفحات التواصل الاجتماعي حاله حال بعض الشباب بلا هدف ولا وعي .. الملامح : اسمر البشرة .. متوسط الطول .. شعري اسود .. اهتم بحلاقتي وتسريحات الشعر الغريبة والصور التي التقطها لنفسي واضعها في صفحتي كلما خرجت مع اصدقائي .. عندي عائلة لكن انا فاشل بلا مستقبل ولا اي طموح .. هوايتي اللعب فقط }

ياس :منورة

مروى: شكرا خيو

ياس : وضعتلها ايقونه وابتسامة

كنت اتابع مروى واشوفها من تنشر عجبتني وتراهنت وية صاحبي عليها ..

..سجاد

كنت هالفترة اطلع بعد الدوام اشتغل بالتكسي ومرات اطلع ارفه عن نفسي وية مهند وزيد .. وبالي ابد ماغابت عنه {ام العباية } ناوي الا ادمر حالها .. بعدين اكول شعلية بيها شلحيت وياها

مرة بالكلية كاعد بمكان كل {اصحاب العلاقات المحرمة } يتواجدون بي .. وكاعد جنت وية وحدة من صديقاتي الالاف الي اعرفهن واغيرهن يومية كلما امل من وحدة .. وشفت نفس البنية الشفتها اول مرة بس كانت كاعدة وية ولد .. ضليت محتار اريد اوصللها مافهمت شلون .. وصديقتي كانت منزعجة من عدهم اهتمامي الواضح

الصديقة : سجودي شبيك

سجاد: شبية

الصديقة : لعد اشو جاي تباوع على هذول

سجاد: معليج حبيبتي بس مشغول بشي

الصديقة : اوك

سجاد: {والله مسكينة بسهولة تصدك }المهم بالي يمها وبالي يم البنية المقابيلي .. اريد بس اللي يمها يكوم .. المهم مااعرف صارت فرصة وانتهزتها بسرعة شمرتلها رقمي ..

فدى: كنت كاعدة وية ولد تعرفت عليه واشوف ولد كدامي بس ملامحه مو غريبة كاعد ويتبسم واني ماكذبت خبر .. عيون هنا وعيون هنا .. واحاول منا ومنا .. شوفو .. اني مبدأ ماعندي .. دين ماعندي .. الحياة بالنسبة الي مجرد لعب وبس .. ماطول اهلي مايدرون .. خليني اكضي هال4 سنين براحتي وعود من ارجع التزم يمهم ...

ليش عود التوبة الها موعد!! لو الموت اله موعد !! لو لااا لحظة لحظة .. الشرف ممكن لو راح يتعوض .. حجابك شرف .. ضحكتك شرف .. كلمتك شرف ..صوتك لو كان عالي وسمعك الغريب اه اه .. نتنازل ونقول تطور .. أي تطور اليخليني عرضة وسلعة تماما مثل خرقة تمسح بها الارض .. الرخيص لا يقترب منه الا المرضى واشباه الذكور .. أي لعبة خطرة هاي التلعب بيها البنية لو فكرت !! أهلي مايدرون .. طيب اهلك مايدرون .. انتي ماراح تدرين !! ماراح تعجبك والله نظرات الذلة والاهانة لانك صرت ارخص من التراب لا بل التراب اعز واغلى ... لاتخونين .. لاتخونين الامانة واول امانه نفسك وشرفك وانت تعرفين وتعلمين .. وبيا عذر .. الحب .. اه ياحب الشيطان

اني متعودة اقضي اكثر وقت وية اي ولد هو شهر زمان .. طلعات .. عزايم بالمطعم واذا عجبتني اللعبة .. تكمل مثل ماصار بأول القصة .. يعني علاقات محرمة والنتيجة حب المال والثمن المدفوع هو ال....شفت هالولد حيل تعب نفسة ولح وياي وطلبت من الولد الي وياي ..

فدى: سامر حباب كوم جيبلنا لفات

سامر: امشي هسة احرك السيارة ونروح سوية

فدى: لا مو خاف الميز الحاجزينه يروح ..

سامر: خوش .. انتضريني ..

سجاد: بدون أنتضار او تردد وعيونها الماكرة وعيوني المفترسة اسرعت ووصلت بالقرب منها ..

سجاد: هذا رقمي اتمنى اتصال

فدى: كانت نظراتي المتغنجة مثل بائعة الهوى تكول انه اي راح يجيك اتصال قريب جدا ..

مروى : يوم بعد يوم كنت ادخل اكثر واكثر بعالم تواصلي مع الشباب والاختلاط .. واكول اني مامسوية غلط ومرة كاعدين على الغداء وخالتي كانت جدا منزعجة من ارتباطي وعدم تركي للتلفون ..

الخالة: بس عوفي التلفون عيونج راحن

مروى: ههههه خالتو شبيج

الخالة: انتي صف سادس واذا ضليتي هيج ابلغ امج تجي تتصرف وياج

مروى: لا خالتو وعيونج ماجاي اسوي شيء غلط .. المهم بالكوة اقتنعت خالتي وادري بيها راح تضل تلح .. هسة قابل شمسوية .. هو اتسلى واتصفح ..وفجأة واجتني رسالة على الدردشة الخاصة من شخص كان اسمه ..ياس

بالبداية رفضته وبعدين ضل يعلق وكان مؤدب جدا وخلوق ولهذا قررت اضيفة لصفحتي .. ومن هنا بدأت علاقتي مع ياس ,, يوم بعد يوم ادمنت على وجود هالشخص في حياتي واعتقد السبب هو نفسي الي دائما كانت تصورلي انه هالطريق حلو وممتع .. اي حالي حال كل بنت .. اريد اجرب ..وياس كان شخص جدا مناسب او هي اوهامي ..لان مستحيل يكون اللص مناسب .. مستحيل يكون الي نيته يسرق مناسب .. مناسب المن ؟؟ لسمعتي ؟ لشرفي ؟ لو لصفحة اعمالي وعلاقتي بربي ؟؟

إن الشياطين المقترنة بالعبد طوال عمره تحصي عليه عثراته ، وتحفظ زلاّتـه ، وتعلم بما يثير غضبه أو حزنه أو شهوته ..فإذا أراد التوجه إلى الرب الكريم في ساعة خلوة أو انقطاع ، ذكّره ببعض ( زلـله ) ليقذف في نفسه اليأس الصارف عن الدعاء ، أو ذكّره بما ( يثـير ) حزنه وقلقه لـيُشغل بالـه ويشتت همّـه ، وبذلك يسلبه التوجه والتركيز في الدعاء ..فعلى العبد أن يجـزم عزمه على عدم الالتفات لأيّ ( صارف ) قلبي أو ذهني ، ما دامت الفرصة سانحة للتحدث مع الرب الجليل ، إذ الإذن بالدعاء - من خلال رقة القلب وجريان الدمع - من علامات الاستجابة قطعاً

كنت اتواصل وية ياس من خلال الرسائل والتعليقات وياما اسهر واسهر معاه نقضي الوقت بالكلام المحرم !!