اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
#المكر_السيء
بقلمي السيدة العلوية
الجزء 13
عجيب مصدر تلك القوة عندما لاتريدها تأتي وتقرع بابك .. وعندما تكون بأمس الحاجة اليها لتربط أشلائك المرتجفة لاتجدهـا .. لكن هل تتركني تلك القوة التي طالما كنت اهيء نفسي لهـا عندما احتاجها .. اول مرة بحياتي تصادفني هيج مشكلة .. مزعجة موحشة ومخيفة جدا .. كعدت انتضر صديقاتي ولأول مرة بحياتي احس الدقائق تتأخر يلة تمشي .. ياليتني مت قبل هذا وكنت نسياً منسياً ...
سجاد: الوضع عندي كان عادي مثلها مثل غيرها مااهتميت هواي ضحكت على بنات .. وهواي سويت علاقات مع بنات فعادي انام ليلي قابل شراح يصير .. نمت الليلة واني مرتاح بالي لان اخيراً كدرت اتشفى بأم العباية . بس معقول اكو بشر هيج .. معقول سوء ظني هيج وصلني لهالمرحلة الي خلاني مثل الذيب يترصد للفريسة .. هي مااذتني ولا سوت لي شي ..ليش هيج ترصدت بيها .. كعدت الصبح ..صبحت على أمي وابوية وتريكت ولبست وكشخت اليوم على غير العادة .. واخذت سيارتي الخصوصي ورحت للكلية .. جنت اجتاز الكلية حتى ادخل للقاعات مالتنا ومريت من يم الكافتريا .. توقعتها كانت بالمحاضرة .. بس شفتها كاعدة وكانت عيونها مثل لون حجابها الاسود .. وعباءتها السوداء .. وعود اهتميت بالعكس ميت ضحكت عليها ..
وعد: اتصلت على اشراق وكالت راح تتأخر واتصلت على عبراء وكالت راح تتأخر واني مثل المخنوك ويريد يفجر العبرة الي بصدره .. اريد حجة حتى حتى تنزل دموعي ولكيت نفسي اتصل بمروى ..
مروى: صباح الورد وعد عمري
وعد: مروى محتاجتك حيل
مروى: اني هسة بالطريق 10 دقايق واني يمج
وعد: بمجرد مااغلقت السماعة وبعد ماكدرت اسيطر على اعصابي .. شغلت التلفون على دعاء {يامفزعي } ووالحمدلله كان الصباح الباكر ومحد انتبه الي .. وكدرت دموعي تنزل .. حتى اهدأ وحتى اكدر اتحكم بطريقة لحل هالمشكلة ..
مروى: اول مرة اشوف وعد بهيج حالة وصوتها خوفني حيل وقلقني .. وعد الي رغم الي سولفتلها قصتي ابد ماتركتني وابد مااخذت علية نظرة سيئة بالعكس ساعدتي وحاولت تنصحني وكلما احتاج مشورتها جنت الكاها .. اخت واكثر من اخت حيل قلقت من سمعت صوتها ورجفتها .. وصلت يمها وبمجرد ماوكفت حضنتها وهي دموعها تنزل بقوة وغزارة ومثل الطفل يناشغ ويبتلع الغصة ...شبيج عيوني قلقتيني
وعد: اني بمصيبة وسولفتلها كل شي.. وبهالاثناء اجو عبراء واشراق وعلامات القلق والخوف واضحة عليهم
اشراق : ومنين اجة هالولد
وعد: شمدريني
عبراء اني اكول لازم تخابرينه وتعرفين شيريد
مروى: اني اكول لا .. لان راح يلح وياها
اشراق : عيني لازم تشوفين شيريد بلكت يمسح هالصور .. الله اكبر عليه
جنت داخل المحاضرة ودزيتلها مسج {ها هسة تعلمتي شلون تحجين بأدب ومن اتصل افتحي خط }محتارة بكلام صديقاتي وحلولهم الماعجبتني .. يعني شنو .. اسولف وية ولد ..لان عنده صوري ؟؟ ربي ماعندي كهف انته كهفي وملاذي .. رجعت للقسم واني من كثر التفكير مهمومة حيل حيل .. واني كاعدة واسمع تلفوني يرن هالمرة تشجعت وجاوبت : نعم
سجاد: نعم الله عليج
وعد: اخي انته شرايد مني
سجاد: رايدج
وعد: اخي العنوان الي جاي عليه خطا .. الله يخليك الصور الي عندك امسحهن .. واني مومثل مامتوقع لهذا رجاءً بطل تزعجني وبطل تهددني
سجاد: اني لحد الان مامهدد ولحد الان صورج محتفظ بيهم لنفسي لكن لو ماقبلتي العلاقة وياي راح اشوفج التهديد شلونه
مروى: انتو بس لانسيتوني .. اكيد نسيتوني .. من بعد الي صار مع ياس .. رجعت اعيش وية امي وابوية واخوان ثنين واحد رابع كلية هندسة واني انقبلت كلية ومايحتاج راجع اعيد قصتي .. غيرت كل حياتي من بعدما ربي نقذني وتعرفت على صديقة جدا غالية ومحترمة كان اسمها وعد .. اشتريت جهاز تلفوني غيرت رقمي القديم وتركت كل عالمي والتزمت بحياة جديدة نظيفة .. ورجعت حسابي على الفيس نفسه وسويت حظر لكل صديقاتي القديمات وحتى ياس .. لكن !!!
