جبروت العشق 🥀

مشاعر طفوله ❤️

ما أحلل لأي شخص ياخذ كتاباتي وينشرهم (ذمه)

#بقلمي_الاميره_الموسويه 👑

.............

بالبدايه خلي اعرفكم بنفسي .....

اسمي فيصل عمري29 سنه خريج هندسه وحالياً متعين بشركة مالتنا مو حكوميه لان اني شخصيتي ومكانتي متسمحلي انو اشتغل عند احد ، اني ما عندي تكبر ولا اي اعتراض انو اتعين بشركه ثانيه بس هذي أوامر الوالد .. لان هو شيخ ومعروف فصعبه عليه ابنه يشتغل موظف عند الناس.

المهم .. اني بشكل عام انسان هادئ مااحب المشاكل ولا اكره احد ، شكلي اعتبره مقبول مع العلم هواي يكولولي انت حلوو انت صاك انت وسيم من هذي السوالف طبعاً هذا مو مدح لا ابد (لانو من مدح نفسه فقد ذمها ) بس هذي الحقيقه
وبالنسبه الي الرجل مو بجماله ولا بشكله لا الرجوله اخلاق ومواقف.

ترتيبي قبل الاخير بين اخواني اثنين الكبار متزوجين وعدهم اطفال ، واني واخويه الصغير بعدنا ، وعندي اخوات 2 وحده متزوجه و وحده بعدها صغيره صف خامس اعدادي انريدها تكمل لان شاطره ما شاء الله ، اكيد هسه البعض يستغرب اشلون نخلي بنيه تكمل دراستها؟!!
احنا مو معقدين ولا همجيين مثل ميحجون عنه اهل المدينه لا بالعكس حالياً الوقت اختلف والعالم بدت تتطور وتغير عاداتها المتخلفه ، بس احنا ناس محافظين ..
يعني .... ما عدنا انفلات وحريه زايده مثل اهل المدينه .. انواكب التطور والانفتاح بس بحدود ، وبنفس الوقت محافظين على عاداتنا وتقاليدنا.

اتركونا من هذا الموضوع هسه لان اذا حجيتلكم بي مراح نخلص بعد .. خلوني احجيلكم قصتي حتى تتعرفون عليه اكثر وأكثر

قبل 15 سنه اني كان عمري تقريبا 14 سنه كنا ننجمع ابيت جدنا الكبير شيخ عبدالله اني واخواني وجهال اعمامي كلهم .. نلعب سويه ونتونس ، مره دنلعب لعبة الغميضه بالبستان كل واحد ختل بمكان بعدين خلصت اللعبه والكل طلع ما عدا بنت عمي الصغيره ( يَسر ) عمرها كان بوقتها يمكن 6 سنوات لو 7 مااتذكر
المهم طلع الكل وخي ماكو؟!!
البستان كبير وصارت الدنيا المغرب وهي ماكو.. بدينا اندور عليها كل مجموعه راحو لمكان بس اني رحت لوحدي لان اني مااخاف من صغري .. بقيت ادور عليها ادور واصيح بأسمها وهي ماكوو ، وصلت لمنطقه بالبستان حيل بعيده عنهم وعن البيت ، ادور عليها بس اريد الكاها ماااااكوو
الشمس بدت تغيب ويحل الظلام ، وصلت لمرحله فقدت الامل وكلبي حسيته وكف من القلق صح اني كنت طفل بس كل تفكيري انو  هي عرضي واني مسؤول عنها ولازم الكاها ، تعبت واني ادور عليها وهي ماكوو بعدين وكفت بنص الزرع وصفنت مااعرف شسوي و وين اروح؟!!
بحركه عفويه مني وبدون اي تفكير رفعت راسي للسماء ووالدموع اتجمعت بعيني .. كلت ربي دخيلك اريدها من عندك .. واذا ما الكاها اخذ روحي بهاي اللحظه!